ލ. އިސްދޫ/ކަލައިދޫ ސްކޫލުގެ ދަރިވަރުންތަކަކަށް އުސޫލާ ޚިލާފަށް އަދަބުދިން މައްސަލައެއް އެޑިޔުކޭޝަން މިނިސްޓްރީން ބަލަން ފަށައިފި އެވެ.
އެ ސްކޫލުގެ ގްރޭޑް 10ގެ ތިން ދަރިވަރަކު ސްކޫލު ގަޑީގައި ބޭރަށް ދިއުމުން އަދަބެއްގެ ގޮތުން "ދެން ސްކޫލު ގަޑީގައި ބޭރަށް ނުދާނެ" ކަމަށް އެ ކުދިން ލައްވައި ގަނޑެއްގައި ލިޔުއްވި އެވެ.
އަދި އެ ތިން ކުދިން ލައްވައި ގަނޑު ހިފަހައްޓައިގެން ސްކޫލް ހުރިހާ ކުދިންނަށް ފެންނަ ގޮތަަށް، އެސްމްބްލީގެ ސްޓޭޖް މަތީ ދެ ގަޑިއިރު ކޮޅަށް ބޭތިއްބި ކަމަށް ވެ އެވެ. މި މައްސަލާގައި ބެލެނިވެރިން ވަނީ ހިތްހަމަނުޖެހުންފާޅުކޮށްފަ އެވެ.
އެޑިޔުކޭޝަން މިނިސްޓްރީގެ މީޑިއާ އޮފިޝަލް "މިހާރު" އަށް ވިދާޅުވީ އެ މައްސަލައިގައި ކަން ހިނގާފައި ވަނީ މިނިސްޓްރީގެ އުސޫލާ ހިލާފަށް ކަމަށެވެ. އަދި އެ މައްސަލަ ބަލަމުން އަންނަ ކަމަށް ވެސް އޭނާ ވިދާޅުވި އެވެ.
ކުދިންނަށް އަދަބު ދިން މައްސަލާގައި ސްކޫލުން މިހާތަނަށް ވާހަކައެއް ނުދައްކަ އެވެ.
އެ ރަށުގެ ކައުންސިލުން ބުނީ އިއްޔެ އެ ސްކޫލުގެ ޕްރިންސިޕަލް ބަދަލުކޮށް، އާ ޕްރިންސިޕަލެއް ހަމަޖައްސާފައިވާ ކަމަށެވެ. އެކަމަކު ޕްރިންސިލް ބަދަލުކޮށްފައި ވަނީ ކުދިންނަށް އަދަބު ދިން މައްސަލާގައި ކަމެއް ނުވަތަ އެހެން ކަމަކާ ގުޅިގެން ކަމެއް އަދި ސާފެއް ނުވެ އެވެ.
