އިންތިހާބާ ހަމައަށް އެކުގައި ނުތިބެވޭ ނަމަ ކޯލިޝަން އެއްބަސްވުން ނިމުމަކަށް ގެންނަން ޖެހޭނެ: ރައީސް

ފަސް އަހަރުގެ ވެރިކަމަކަށް ސިޔާސީ ޕާޓީތަކުން އެކުލަވާލި މި ވެރިކަން ހިންގާ ކޯލިޝަންގައި ދައުރު ނިމެންދެން ނުތިބެވޭ ނަމަ އެއްބަސްވުން ނިމުމަކަށް ގެންނަން ޖެހޭނެ ކަަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

މި ވެރިކަން 2018 ގައި އެކުލަވާލީ އެމްޑީޕީ އިސްވެ އޮވެ ޖުމްހޫރީ ޕާޓީ އާއި އަދާލަތު ޕާޓީގެ އިތުރުން އެމްއާރުއެމް ހިމެނޭ ކޯލިޝަނަކުންނެވެ. ރައީސް ދެ ވަނަ ދައުރަކަށް ރިޔާސީ ޓިކެޓް ކަށަވަރުކޮށް، ކޯލިޝަން އިތުރު ދައުރަކަށް ދަމަހައްޓަން އެއްބާރުލެއްވުމަށް އެދިވަޑައިގެންފައި ވަނިކޮށް، ޖުމްހޫރީ ޕާޓީން ވަނީ އިންތިހާބުގައި ވަކިން ވާދަކުރަން ނިންމައިފަ އެވެ.

އަދި އެ ޕާޓީ އިސްވެ އޮންނަ ވަކި ކޯލިޝަނެއް ހެދުމުގެ މަސައްކަތް ވެސް ވަނީ ފަށައިފަ އެވެ.

އެހެން ނަމަވެސް ކޯލިޝަން އެއްބަސްވުމުގައި ކަނޑައެޅި ގޮތަށް ކެބިނެޓުންނާއި ސަރުކާރުގެ އެކި މަގާމްތަކުގައި ޖުމްހޫރީ ޕާޓީން ވެސް ވަނީ މަގާމްތައް ކަށަވަރުކޮށްފަ އެވެ. އެކަމަކު ސަރުކާރުގައި ޖޭޕީ ހިއްސާވާން ކަނޑައެޅި މިންވަރަށް މަގާމްތައް ނުލިބޭ ކަމުގެ ހިތްހަމަނުޖެހުން ވެސް ދަނީ ފާޅުކުރަމުންނެވެ.

ސަރުކާރުގައި މިވަގުތު ވެސް ޓްރާންސްޕޯޓް މިނިސްޓްރީ އާއި ފިޝަަރީޒް މިނިސްޓްރީ އަދި ޓޫރިޒަމް މިނިސްޓްރީގައި ޖުމްހޫރީ ޕާޓީ އަށް ނިސްބަތްވާ މިނިސްޓަރުން އެބަތިއްބެވި އެވެ. ޖޭޕީ ވަކިން ވާދަކުރަން ބައެއް ވަޒީރުން އެ ޕާޓީގެ ކައުންސިލްގައި ވޯޓު ދެއްވާފައިވާތީ، އެމްޑީޕީގެ މެންބަރުން އަންނަނީ އެ މިނިސްޓަރުން ވަކި ކުރާނެ ކަމުގެ އިންޒާރު ދެމުންނެވެ.

އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބަށް އެމްޑީޕީއާ އެކު ކޯލިޝަން ހަދަން ނިންމާފައިވާ އަދާލަތު ޕާޓީ އާއި އެމްޑީއޭއާ އެކު ބޭއްވެވި ބައްދަލުވުމަށް ފަހު ނޫސްވެރިން ކުރި ސުވާލުތަކާ ގުޅިގެން ރައީސް ވަނީ ޖޭޕީން ވަކިން ވާދަކުރާ ނަމަ ސަރުކާރުގައި ނުބޭތިއްބޭނެ ކަމުގެ އިޝާރާތެއް ދެއްވައިފަ އެވެ.

އެމަނިކުފާނު ވިދާޅުވީ ސަރުކާރު ކޯލިޝަންގައި މިހާރު ހިމެނޭ ޕާޓީތަކުގެ ތެެރެއިން ކުރިއަށް އޮތް ރިޔާސީ އިންތިހާބަށް ކެންޑިޑޭޓަކު ނެރެ ވަކިން ވާދަކުރާ ޕާޓީތައް ސަރުކާރުގައި ބައިތިއްބައިގެން ވައުދު ފުއްދުމުގެ މަސައްކަތްތަކެއް ނުކުރެވޭނެ ކަމަށެވެ. އަދި ހިޔާލުތަފާތުވާ ބަޔަކާ އެކީގައި އިންތިހާބުގެ ކެމްޕޭން ވެސް ނުކުރެވޭނެ ކަމަށް ވިދާޅުވި އެވެ.

މިހާރު ވެސް ކޯލިޝަން އޮއްވައި އެމަނިކުފާނު އަދާލަތާއި އެމްޑީއޭއާއެކު އާ ކޯލިޝަނެއް ހަދާފައިވާ ކަން ފާހަގަކުރައްވައި ވިދާޅުވީ ޖޭޕީއާ މެދު ގޮތެއް ނުނިންމަވާ ކަމަށެވެ. އަދިވެސް ހުންނެވީ ކޯލިޝަން ހަދަން ޖުމްހޫރީ ޕާޓީއަށް ދެއްވި ދައުވަތުގެ އިންތިޒާރުގައި ކަަމަށް ވިދާޅުވި އެވެ.

"ގަބޫލު ކުރަންވާނެ ހިޔާލު ތަފާތުވާ ބައެއް، ޑިޒިޝަންތަކެއް ނަގާއިރު ތިބޭކަމަށް ވާނަމަ އެކަމެއް އެގޮތަކަށް ނުކުރެވޭނެ،" ރައީސް ވިދާޅުވި އެވެ.

ސަރުކާރު ކޯލިޝަންގައި މިހާރު ހިމެނޭ ޕާޓީތަކާ އެކު 2018 ވަނަ އަހަރު ހެދި އެއްބަސްވުމުގައި ނިންމާފައި ވަނީ ދައުރު ނިމެންދެން އެކުގައި ތިބުމަށް ކަމަށާއި އެހެން ނަމަވެސް ރިޔާސީ އިންތިހާބުގައި ކުރިޔަށް ދާއިރު އެކުގައި ނުތިބެވޭ ނަމަ އެ އެއްބަސްވުން ނިމުމަކަށް ގެންނަން ޖެހޭނެ ކަމަށް ރައީސް ވިދާޅުވި އެވެ.

"އޭގެ މާނައަކީ ކޯލިޝަން ނެތީއެއް ނޫން، އެއްބަސްވެވޭ އެއްބަސްވުމަކީ ތަންފީޒު ކުރެވޭ އެއްޗެއް ކަމަށްވާނެ. ތަންފީޒު ނުކުރެވޭ އެއްޗެއް ކަމަށްވަންޏާ އޭގެ ބޭނުމެއް ނޯންނާނެ." ރައީސް ވިދާޅުވި އެވެ.

ރައީސް ވިދާޅުވީ އެ މައްސަލާގައި އެމަނިކުފާނު ޖުމްހޫރީ ޕާޓީގެ ލީޑަރު ގާސިމް އިބްރާހިމް އާ ވާހަކަފުޅު ދެއްކެވި ކަމަށެވެ. ބާކީ އޮތް މުއްދަތުގައި ކުރިޔަށް ދާނީ ކިހިނެތްތޯ ގާސިމް އަރިހުގައި އެއްސެވި ކަމަށް ރައީސް ވިދާޅުވި އެވެ.

ގާސިމްގެ ޖަވާބެއް ނުވަތަ އެކަމާ ބެހޭ އިތުރު ތަފްސީލެއް ރައީސް ނުދެއްވަ އެވެ. ވިދާޅުވީ އެ މައްސަލާގައި އަދި އެމަނިކުފާނު ވަކި ގޮތެއް ނުނިންމަވާ ކަމަށެވެ.

"އަޅުގަނޑުމެންނާއި އަދާލަތު ޕާޓީ އާއި އެމްއާރްއެމް އާއި ޖުމްހޫރީ ޕާޓީ ކޮންމެ ޕާޓީއަކުން ކެނޑިޑޭޓަކު ނެރޭ ކަމަށްވަންޏާ އޭގެ މާނައަކީ ކެމްޕެއިން ކުރިޔަށް ދާއިރު ހިޔާލު ތަފާތުވުންތައް އޮންނާނެ." ރައީސް ވިދާޅުވި އެވެ.

ރައީސް މިއަދު ވަނީ އަދާލަތާއި އެމްޑީއޭ އާއެކު މުލިއާ ގޭގައި ބައްދަލު ކުރައްވައި ކެމްޕެއިން ފައްޓަވަން ނިންމަވައިފަ އެވެ. އަދި އެ ދެ ޕާޓީއާ އެކު މެނިފެސްޓޯއެއް އެކުލަވައިލުމުގެ މަސައްކަތް ކުރަން ވެސް އެމަނިކުފާނު ވަނީ ނިންމަވައިފަ އެވެ.