އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި ވާދަކުރައްވާ ޖުމްހޫރީ ޕާޓީގެ ލީޑަރު ގާސިމް އިބްރާހިމަށް އެ ޕާޓިގެ ރިޔާސީ ޓިކެޓު މިރޭ އަރުވައިފި އެވެ.
ކާނިވަލް ސަރަހައްދުގައި މިހާރު ކުރިއަށްގެންދާ ޖަލްސާގައި، ފެހި ގާނޫނު އަސާސީގެ ކޮޕީއަކާއެކު ރިޔާސީ ޓިކެޓު ހަވާލުކޮށްދެއްވީ، ޖޭޕީގެ ސެކްރެޓަރީ ޖެނެރަލް، ވައިކަރަދޫ ދާއިރާގެ ކުރީގެ މެމްބަރު އަލީ އާރިފެވެ.
"ހާސްކަނޑާލަ، ކުރިއަށް ދެވޭނެ" ޝިއާރުގެ ދަށުން ޖޭޕީގެ ރިޔާސީ ޓިކެޓު ހަވާލުކޮށް، ކެމްޕެއިން ފެށުމަށް ބޭއްވި ޖަލްސާގައި، މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމް ވިދާޅުވީ ރިޔާސީ އިންތިހާބުގައި ވާދަކުރައްވަން ނިންމެވީ ދިވެހިންނަށް ހިތްފަސޭހަ އަދި އުފާވެރި މާހައުލެއް ގާއިމްކޮށްދިނުމަށް ކަމަށެވެ.
އޭނާ ރައީސްކަމަށް އިންތިހާބު ކޮށްފިނަމަ ތައުލީމާއި ތަޖުރިބާގެ ގޮތުން އަދި މިއިން ޒަމާނެއްގައި ވެސް ނުފެންނަ ވަރުގެ ހަރުދަނާ ސަރުކާރެއް ގާއިމްކޮށްދޭނެ ކަމަށް ގާސިމް ވިދާޅުވި އެވެ.
މާޒީގައި ވެސް އަދި މިހާރު ވެސް ކަންތައް ކުރާ ގޮތުން ރައްޔިތުން ނިކަމެތިކަން ތަހައްމަލުކުރާ ކަމަށާއި އިންތިހާބުގައި ވާދަކުރަން ނިންމީ އެ ނިކަމެތިކަމުން ސަލާމަތްކޮށްދިނުމުގެ އަޒުމުގައި ކަމަށް ވެސް ވިދާޅުވި އެވެ.
ގާސިމް ވަނީ ރިޔާސީ އިންތިހާބަށް އެ ޕާޓީގެ މެނިފެސްޓޯގެ ބައެއް ކަންތައްތައް ހިއްސާކުރައްވައިފަ އެވެ.
އެގޮތުން، އުމުރުން ދުވަސްވީ މީހުންގެ އެލަވަންސް 7،000ރ. އަށް އިތުރުކޮށް، ބޭސްފަރުވާއަށް ސަލާންޖަހަން ނުޖެހޭ ގޮތަށް ހަތް ދުވަހުގެ ތެރޭގައި ސްޕެޝަލިސްޓް ޑޮކްޓަރަށް ދެއްކޭ ރިފަރަލް ސިސްޓަމެއް ގާއިމްކޮށްދޭނެ ކަމަށް ވައުދުވެވަޑައިގެންނެވި އެވެ.
ކުދި ވިޔަފާރިތައް ފެށުމަށް އެހީތެރިވެ، އޭނާގެ ވެރިކަމުގެ ފަސް އަހަރުގެ ތެރޭގައި 100 މިލިއަނަރުން އުފައްދާނެ ކަމަށް ވެސް ވިދާޅުވި އެވެ.
އޭގެ އިތުރުން، ޔޫސަބަލް ރިޒާވް އެއް ބިލިއަނަށް ޑޮލަރަށް އިތުރުކޮށް، ފަހުގެ ތާރީހުގައި ކޮރަޕްޝަނާ އެންމެ ދުރު ސަރުކާރަށް އޭނާގެ ސަރުކާރު ވާނެ ކަމަށް ގާސިމް ވިދާޅުވި އެވެ.