ރާއްޖޭގައި ފުރަތަމަ ފަހަރަށް ދެމަފިރިއަކު ރައީސް ކަމާއި ނައިބު ރައީސް ކަމަށް ކުރިމަތިލައްވައިފި އެވެ.
ޑިފެންސް މިނިސްޓަރުގެ ނައިބުގެ މަގާމުން ދާދިފަހުން އިސްތިއުފާ ދެއްވި މއ. މާވެޔޮވިލާ ހަސަން ޒަމީލް އަމިއްލަގޮތުން ރިޔާސީ އިންތިޚާބުގައި ވާދަކުރެއްވުމަށް ފޯމު މިއަދު ހުށަހެޅުއްވި އިރު އޭނާގެ ރަނިންމޭޓަކީ އަނބިކަނބަލުން މަރިޔަމް އަލީމް އެވެ. އަދި އިންތިހާބީ އެޖެންޓަކީ އެ ދެބޭފުޅުންގެ ދަރިފުޅު އަހުމަދު މަހުރާން ޒަމީލް އެވެ.
ކޯލިޝަން ސަރުކާރުތަކާ ދެކޮޅު ވިސްނުންތަކަކާ އެކު އިންތިހާބުގައި ވާދަކުރެއްވުމުގެ ޝައުގުވެރިކަން ޒަމީލް ފާޅުކުރެއްވީ މިދިޔަ ޖުލައި މަހުގެ ތެރޭގަ އެވެ.
އޭރު އާއިލާގެ އެހީތެރިކަމާ އެކު ތައްޔާރުކުރި ލިޔުމެއްގައި ޒަމީލް ވަނީ އަމިއްލަގޮތުން ވާދަކުރާ ކެންޑިޑޭޓުން އީސީއަށް ދައްކަންޖެހޭ 100،000ރ. އާއި 1،500 މީހުންގެ ސޮއި ހަމަކުރަންޖެހުމާ ދެކޮޅަށް ވެސް ވާހަކަ ދައްކަވައިފަ އެވެ. ރައީސް ކަމަށް ހުށަހަޅާ ފޯމާ އެކު 100،000ރ. ހުށަހަޅަން ޖެހެ އެވެ.
އިންތިޚާބަށް ކުރިމަތިލުމުގެ ވަގުތު މިއަދު މެންދުރު 2:00 އަށް ހަމަވާއިރު، މިހާތަނަށް އަށް ބޭފުޅަކު ވަނީ ވާދަކުރެއްވުމުގެ ފޯމު ހުށަހަޅުއްވައިފަ އެވެ.
އޭގެތެރެއިން، އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހާއި، އެމްއެންޕީގެ ފަރާތުން ދަނގެތި ދާއިރާގެ މެމްބަރު މުހައްމަދު ނާޒިމާއި ދަ ޑިމޮކްރެޓްސްގެ ކެންޑިޑޭޓު ހުޅުދޫ ދާއިރާގެ މެމްބަރު އިލްޔާސް ލަބީބްގެ ކެންޑިޑެސީ އީސީން ވަނީ ބަލައިގެންފަ އެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަމިއްލަގޮތުން ވާދަކުރައްވާ ކުރީގެ ހޯމް މިނިސްޓަރު އުމަރު ނަސީރާއި އަމިއްލަ ގޮތުން ކުރިމަތިލައްވާ އަހުމަދު ފާރިސް މައުމޫން މިއަދު ވަނީ ފޯމު ހުށަހަޅުއްވައިފަ އެވެ.
އިދިކޮޅު ޕީޕީއެމް/ޕީއެންސީން އިންތިޚާބު ބޮއިކޮޓު ކުރަން ޔާމީން އެދިވަޑައިގަންނަވާފައިވީ ނަމަވެސް، ޕީއެންސީގެ ފަރާތުން މާލޭގެ މޭޔަރު ޑރ. މުހައްމަދު މުއިއްޒުގެ ކެންޑިޑެސީ މިއަދު ހެނދުނު ވަނީ ހުށަހަޅުއްވައިފަ އެވެ.
