ސްކޫލްތަކުގެ ބޮޑު ޗުއްޓީ އަލުން ޑިސެމްބަރަށް ބަދަލުކުރާނަން: މުއިއްޒު

ސްކޫލްތަކުގެ ބޮޑު ޗުއްޓީ އަށް މި ސަރުކާރުން ގެނައި ބަދަލު އާންމުން ބަލައި ނުގަންނާތީ، އޭނާގެ ވެރިކަމެއްގައި އެ ޗުއްޓީ އަލުން ޑިސެމްބަރު މަހަށް ބަދަލުކުރައްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އަންނަ މަހުގެ 9 ގައި ބާއްވާ ރިޔާސީ އިންތިހާބުގެ ކެމްޕެއިނަށް ވ، މ، ފ އަދި ދ. އަތޮޅުގެ ރަށްތަކަށް މުއިއްޒު މިއަދު ފެއްޓެވި ދަތުރުގައި އެންމެ ފުރަތަމަ ވަޑައިގަތީ ދ. ކުޑަހުވަދު އަށެވެ.

ކުޑަހުވަދޫގެ ބަނދަރު ސަރަހައްދުގައި ބޭއްވި ޖަލްސާގައި މުއިއްޒު ވިދާޅުވީ މި ސަރުކާރުން ކަންކަން ނިންމަނީ އާންމުންގެ ހިޔާލު ނުހޯދައި އުނދަގޫވާނެ ގޮތްގޮތަށް ކަމަށެވެ. ސްކޫލްތަކުގެ ބޮޑު ޗުއްޓީ ޖޫން/ޖުލައި މަހަށް ބަދަލުކުރުމަކީ ވެސް އެ ގޮތަށް ނިންމި ނިންމުމެއް ކަމަށް އޭނާ ވިދާޅުވި އެވެ.

މާލޭގެ މޭޔަރުކަން ވެސް ކުރައްވާ މުއިއްޒު ވިދާޅުވި ގޮތުގައި، ބޮޑު ޗުއްޓީ އަހަރުގެ މެދަށް ބަދަލުކުރުމުން އެ ދުވަސްވަރު ދިމާވަނީ ހުޅަނގު މޫސުމުގެ ވިއްސާރަ ދުވަސްވަރާ އެވެ. އޭގެ ސަބަބުން ދަތުރުފަތުރުކުރުމަށް ދަތިވެ، ބެލެނިވެރިންނާއި ދަރިވަރުންނަށް ޗުއްޓީ ރަނގަޅަށް ހޭދަކުރަން ދަތިވެ އެވެ.

"އަނެއް ކަމަކީ [ބޮޑު ޗުއްޓީގެ ތެރެއިން] ޖުލައި 26 އާދޭ. ޖުލައި 26 އައުމުން ސްކޫލްތަކުން މިނިވަން ދުވަހުގެ ކުޅިވަރުތަކުގައި ބައިވެރިވާ ހުރިހާ ދަރިވަރުން އެކަމުގައި ޝާމިލުވާން އެބަ މަޑުކުރަން ޖެހޭ. އެހެންވީމާ، ބޮޑު ބަންދުގެ ބޮޑު ބައެއް އެބަ ގެއްލޭ ޕްރެކްޓިސް ކުރުމަށް މަޑުކުރަން ޖެހިގެން ވެސް،" މުއިއްޒު ވިދާޅުވި އެވެ.

"މިފަދަ އެތައް ކަމެއް ވެގެން ވަރަށް ގިނަ ބެލެނިވެރިން، ވަރަށް ގިނަ އާއިލާތަކުން އެކަމާ ކަންބޮޑުވުން ފާޅުކޮށް ސަރުކާރަށް ތަކުރާރުކޮށް، އެ ބަދަލު ގެނައީއްސުރެ މި އަންނަނީ އެކަން ހުށަހަޅަމުން."

މުއިއްޒު ވިދާޅުވި ގޮތުގައި، ސަރުކާރުން އެ ބަދަލު ގެނައީ ޓޫރިޒަމްގެ ދާއިރާގައި މަސައްކަތްކުރާ މުވައްޒަފުންނާ މެދުގައި ވިސްނައިގެން ކަމަށް ބުންޏަސް، އެ މީހުންނަށް ވެސް މި ބަދަލުން އެއްވެސް ފައިދާއެއް ނުކުރެ އެވެ. އެހެންވެ، މިއީ އާންމުން ބޭނުންވި ބަދަލަކަށް ނުވި ކަމަށް ވިދާޅުވި އެވެ.

އޭނާ ވިދާޅުވީ ބޮޑު ޗުއްޓީ އަލުން ޑިސެމްބަރަށް ބަދަލުކުރަން ވަގުތު ބޭނުންވާނެ ކަމަށެވެ. އެކަން އެންމެ އަވަހަށް ވެސް ކުރެވޭނީ ޖެނުއަރީ 2025 ގެ ދިރާސީ އާ އަހަރުގެ ކިޔެވުން ފެށޭ ގޮތަށް ބަދަލު ގެނެސްގެން ކަމަށް މުއިއްޒު ވިދާޅުވި އެވެ.

ޑިސެމްބަރަށް ޗުއްޓީ ބަދަލުކުރުމުގެ ކުރިން ޓޫރިޒަމްގެ ދާއިރާގައި މަސައްކަތްކުރާ މުވައްޒަފުންނަށް ގެއްލުން ނުވާނެ ގޮތަށް، ލުއި ގޮތެއް ހަމަޖައްސަން އެ ދާއިރާގެ އިސްވެރިންނާ މަޝްވަރާ ކުރައްވާނެ ކަމަށް ވެސް މުއިއްޒު ވިދާޅުވި އެވެ.

"އެ ފަރާތްތަކަށް ވެސް ގެއްލުން ނުވާނެ ކަހަލަ ފޯމިއުލާއެއް ނެރެވިދާނެ. ނެރެވޭ ގޮތަށް އެކަން ބަދަލުކުރުމަކީ އަޅުގަނޑުމެންގެ ސިޔާސަތެއް ކަން އަޅުގަނޑު މިތާ ހާމަކޮށްލަން،" އޭނާ ވިދާޅުވި އެވެ.

ކުޑަހުވަދުއަށް މުއިއްޒުގެ ވައުދުތައް

• ކޮމާޝަލް ޕޯޓެއް ހެދުން.

• ހިއްކި ބިމަށް ފެނާއި ނަރުދަމާ އަދި ކަރަންޓުގެ ހިދުމަތް ދިނުން.

• ރަށުގެ ބިން އިތުރުކުރުން.

• އާންމުން ބޭނުންވާ ގޮތަށް ބަނދަރު ބޮޑުކުރުމުގެ މަޝްރޫއަށް ބަދަލު ގެނައުން.

• ސްޕޯޓްސް ކޮމްޕްލެކްސް ހެދުން.

މިރޭގެ ޖަލްސާގައި މުއިއްޒު ވިދާޅުވި ގޮތުގައި އޭނާ ވެރިކަމެއްގައި ރާއްޖޭގައި އެއާ އެންބިއުލެންސްގެ ހިދުމަތް ފަށާނެ އެވެ. އަދި އައިވީއެފްގެ ހަރަދުތައް އާސަންދައިގެ ދަށުން ލިބޭ އިންތިޒާމު ވެސް ހަމަޖައްސާނެ އެވެ.

މުއިއްޒުގެ މި ދަތުރުގައި މާދަމާ ވަޑައިގަންނަވާނީ މި އަތޮޅު މާއެނބޫދު އާއި މީދުއަށެވެ. އަދި ފ. ނިލަންދުއަށް ވެސް މާދަމާ ވަޑައިގަންނަވާނެ އެވެ.