އާ ދައުރު ފަށާނީ ވެސް ނުނިމުނު ދާއިމީ ކޮމިޓީތަކުގެ މައްސަލައިން

މާދަމާ ފަށާ ރައްޔިތުންގެ މަޖިލީހުގެ ތިން ވަނަ ދައުރުގެ ފުރަތަމަ ޖަލްސާ އަށް ދާއިމީ ކޮމިޓީތަކަށް މެންބަރުންގެ ކަނޑައެޅުމުގެ މައްސަލަ އެޖެންޑާކޮށްފި އެވެ.

މަސް ދުވަހުގެ ޗުއްޓީއަކަށް ފަހު، މި އަހަރުގެ ފަހު ދައުރުގެ ފުރަތަމަ ޖަލްސާގެ އެޖެންޑާ މަޖިލިހުގެ އިދާރާ އިން މިއަދު ވަނީ އާންމުކޮށްފަ އެވެ. އެ އެޖެންޑާގައި އޮތީ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވާ މެންބަރުންނާއި ވަކި ޕާޓީއަކަށް ނިސްބަތް ނުވާ މެންބަރުން ތަމްސީލް ކުރާނެ ގޮތުގެ މައްސަލަ އެކަންޏެވެ.

މަޖިލީހުގެ ޖަލްސާތައް ގަވާއިދުން ނުބޭއްވި މަރުތަޅު އެޅި، މިދިޔަ ބޮޑު އީދު ބަންދުގެ ކުރިން މަޖިލީހުގެ ދެވަނަ ދައުރު ނިންމައި ޗުއްޓީ އަށް ދިޔައީ މުހިންމު މަސައްކަތްތަކެއް ނުނިންމަ އެވެ. ޖޫން 22 ގައި ޗުއްޓީ އަށް ދިޔައީ ދައުރު ދަންމާލުމަށް މެޖޯރިޓީ ޕާޓީ އެމްޑީޕީން އެދެމުން އަންނަނިކޮށެވެ.

އޭގެ ފަހުން އެމްޑީޕީން ދައުރުން ބޭރުން ބޭއްވި ފުރަތަމަ ޖަލްސާގައި ވެސް އެ މަސައްކަތް ކުރިއަށް ނުގެންދެވި، ދާއިމީ ކޮމިޓީތައް ފާސްކޮށްފައި ވަނީ ދެ ވަނަ ޖަލްސާގަ އެވެ.

އެ ޖަލްސާގައި ދާއިމީ ކޮމިޓީތައް ފާސްކުރި ފަހުން، އޭރު މިނިވަން މެންބަރުންގެ ގޮތުގައި ތިއްބެވި ބައެއް މެންބަރުން ވަނީ މަޖިލީހުގެ ރައީސް މުހައްމަދު ނަޝީދު ފަހަތުގައި ހުންނަވައިގެން އުފެއްދެވި ޑިމޮކްރެޓްސް ޕާޓީއަށް ސޮއިކުރައްވައިފަ އެވެ. އަދި ޑިމޮކްރެޓްސް މެންބަރެއްގެ ގޮތުގައި ހުންނެވުމަށް ފަހު ކުޅުދުއްފުށީ އުތުރު ޔާސިރު އަބްދުލަތީފް ވަނީ އަލުން އެމްޑީޕީއާ ވެސް ގުޅިވަޑައިގެންފަ އެވެ. ޔާސިރު ޑިމޮކްރެޓްސްއިން ވަކިވެވަޑައިގަތަސް، މަޖިލީހުގެ އާ މައިނޯރިޓީ ޕާޓީއަކީ މިހާރު ޑިމޮކްރެޓްސް އެވެ. އެކަމަކު އެކަން މަޖިލީހުން ރަސްމީކޮށް ބަލައިގަންނާނީ، އެ ބަދަލު މަޖިލީހުގެ ރިޔާސަތުން އިއުލާނު ކުރައްވައި، މަޖިލިސް ތަމްސީލުކުރާ ޕާޓީތަކުގެ ދަފްތަރުގައި ހިމެނުނުމުންނެވެ.

މަޖިލީހުގެ ކޮމްޕޮޒިޝަން

އެމްޑީޕީ - 56

ޑިމޮކްރެޓްސް - 14

ޕީޕީއެމް - 5

ޕީއެންސީ - 3

އެމްއެންޕީ - 3

ޖުމްހޫރީ ޕާޓީ - 2

އެމްޑީއޭ - 2

ވަކި ޕާޓީއަކަށް ނިސްބަތްނުވާ - 2

މަޖިލިސް ޗުއްޓީ އަށް ދިޔައިރު މުހިންމު މަސައްކަތްތަކެއް ހުރީ ނުނިމި އެވެ. އޭގެ ތެރޭގައި ބައެއް ވަޒީރުންނާއި މަޖިލީހުގެ ރައީސާއި ނައިބު ރައީސްގެ އިތުބާރު ނެތް ކަމުގެ މައްސަލަ ހިމެނެ އެވެ. އަދި އިލެކްޝަންސް ކޮމިޝަންގެ މެންބަރެއްގެ ދައުރު ހަމަވެފައިވާތީ މެންބަރެއް ކަނޑައެޅުމުގެ މައްސަލަ ވެސް އޮތީ ހުއްޓިފަ އެވެ.