މުއިއްޒުގެ އެންމެ ބޮޑު ސަޕޯޓަރަކަށް އަނބިކަނބަލުން، މުޅިން ސަޕްރައިޒް!

އޭނާ އަށް ބައެއް ފަހަރު އަނބިކަނބަލުން ސާޖިދާ މުހައްމަދު ފެނިވަޑައިގަންނަވަނީ ކެމްޕެއިނަށް ވަޑައިގަންނަވާ ކޮންމެވެސް ރަށެއްގައި ސަލާން ކުރަން ހަދާފައިވާ ސަފުތަކުގައި ހުންނަވާ ތަނެވެ. އެކި މީހުންނާ ސަލާން ކުރައްވަމުން ގެންދަވާއިރު، ބައެއް ފަހަރު ކުއްލި ގޮތަކަށް ސަލާން ކުރައްވަން އަތް ދިއްކޮށްލައްވަނީ އަނބިކަނބަލުންނެވެ. ކުރިން އެންގެވުމެއް ނެތި ފިރިކަލުންގެ ކެމްޕެއިނަށް ވަޑައިގެން އާންމު މީހެއްގެ ގޮތުގައި ސަލާން ކުރައްވަން ސަފަށް އަރުއްވަނީ އެވެ.

ޕީޕީއެމް/ޕީއެންސީގެ ރިޔާސީގެ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިންގައި ކުއްލި ގޮތަކަށް އަނބިކަނބަލުން ފެންނަން ފެށުމުން ބައެއް މީހުންގެ ޝައުގުވެރިކަން އެ ދިމާ އަށް ދިޔަ އެވެ. މޭޔަރުކަމަށް ކުރިމަތިލައްވައިގެން ހިންގެވި ކެމްޕެއިންގައި އެއްގޮތަކަށް ވެސް ސާޖިދާއެއް ނުފެނެ އެވެ.

"މިހާރު" އަށް މިއަދު ދެއްވި ވީޑިއޯ އިންޓަވިއުގައި، މި ކެމްޕޭންގައި އަނބިކަނބަލުން ވަރަށް ހަރަކާތްތެރިކޮށް އުޅުއްވުމާ ގުޅޭ ގޮތުން ސުވާލު ކުރުމުން ޑރ. މުއިއްޒު ވެސް ވަރަށް ގަޔާވެގެން އެ ސުވާލުތަކަށް ޖަވާބު ދެއްވި އެވެ.

މުއިއްޒު ވިދާޅުވީ، އަނބިކަނބަލުންނަކީ އަމިއްލަ ވިސްނުންތަކެއް ގެންގުޅުއްވާ، ވަރަށް މިނިވަން ބޭފުޅެއް ކަމަށެވެ. ކުރިއާ ޚިލާފަށް މި ފަހަރުގެ ކެމްޕެއިންގައި ސާޖިދާ ނުކުމެވަޑައިގަތީ އަމިއްލަ އަށް ބޭނުންވެގެން ކަމަށް މުއިއްޒު ވިދާޅުވި އެވެ.

އަމިއްލަ ދިރިއުޅުއްވުމުގައި އަދި ސިޔާސީ ނިންމެވުންތަކުގައި ވެސް އެންމެ އުނދަގޫ ވަގުތު، ސާޖިދާ އަބަދުވެސް އެންމެ ގާތުގައި ހުންނަވަ އެވެ.

މުއިއްޒަށް މިފަހަރު އެންމެ ބޮޑު ހިތްހަމަޖެހުމަކީ ބިޒީ ޝެޑިއުލްގެ ދޭތެރެއަކުން އަނބިކަނބަލުން އެ ދެއްވާ "ސަޕްރައިޒެވެ". ކުރިން އެންގުމަކާ ނުލައި އެ ރަށަކަށް ވަޑައިގެން ކެމްޕޭން ހަރަކާތްތަކުގައި އުޅުއްވައި އެ ދެއްވާ ހިތްވަރަކީ މުއިއްޒަށް ލިބިވަޑައިގަންނަވާ ވަރަށް ބޮޑު އުފަލެކެވެ. އޭނާ ސިފަކުރައްވާ ގޮތުގައި، އަނބިކަނބަލުންނަކީ މި ކެމްޕޭންގައި އޭނާގެ އެންމެ ބޮޑު އެއް ސަޕޯޓަރު ވެސް މެ އެވެ.

"އަޅުގަނޑު ނުބުނަން [ކެމްޕެއިނަށް ނުކުނަންނަން]،" އަޅުގަނޑު މި މަގާމަށް ހޮވަން ބޭނުންވާތީ އަމިއްލަ އަށް މިނިވަންކަމާ އެކު އެ މަސައްކަތް ކުރައްވަނީ،" ތިން ކުދިންގެ ބައްޕަ މުއިއްޒު ވިދާޅުވި އެވެ.

ރިޔާސީ އިންތިހާބަށް ނުކުމެވަޑައިގަންނަވަން އުޅުއްވާ ވާހަކަ ދެއްކުމުން އަނބިކަނބަލުން ފުރަތަމަ ދެކޮޅު ހެއްދެވި ކަމަށް މުއިއްޒު ވިދާޅުވި އެވެ. އެކަމަކު، ގައުމުގެ ކަންކަން ގޯސްކޮށް ދާތީ ފަހުން އެއްބަސްވެވަޑައިގަތީ ކަމަށް މުއިއްޒު ވިދާޅުވި އެވެ.

މުއިއްޒު ވިދާޅުވި ގޮތުގައި އަނބިކަނބަލުން ސިޔާސީ ކަންކަމުގައި އުޅުއްވަން ބޭނުން ނުވާނެ ކަމަށެވެ. ދަރިންނާ އެކު ކޮންމެ ހަފުތާ ބަންދެއްގައި ސަޔަށް ނުކުމެވަޑައިގަންނަވާ ދެމަފިރިން ލޯބިކުރައްވާ އާދައިގެ ދިރިއުޅުމުން ދުރަށް ވަޑައިގަންނަވަން ވެސް ބޭނުން ނުވާތީ އެވެ.

"ފަހުން ބާރު ވެސް ދެއްވި ކުރިއަށް ދާން. ޓިކެޓް ލިބުނު ހިސާބުން ދެން އަމިއްލަ އިސްނެގުމެއްގެ ގޮތުގައި މަސައްކަތް ކުރަމުން ދަނީ،" މުއިއްޒު ވިދާޅުވި އެވެ.

ސާޖިދާ މަސައްކަތް ކުރައްވަނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ސީނިއާ ސައިންޓިފިކް އޮފިސަރެއްގެ ގޮތުގަ އެވެ.

މުއިއްޒު ވިދާޅުވީ، އަނބިކަނބަލުންނަކީ ވަރަށް ފަންނީ ބޭފުޅަކަށް ވާތީ މިހާތަނަށް ސިޔާސީ ކަންކަމުގެ ޝައުގުވެރިކަން ނުހުންނަ ކަމަށެވެ.

މުއިއްޒު "މިހާރު" އަށް މިއަދު ދެއްވި ވީޑިއޯ އިންޓަވިއުގެ ކުރިން ބައެއް ސެޓަޕްތައް ހެދުމުގައި ވެސް އަމަލީ ގޮތުން ހަރަކާތްތެރިވި ތަން ފެނުނީ ސާޖިދާ އެވެ. ކަންކަން ކުރާނެ ގޮތުގެ އިރުޝާދުތައް މުއިއްޒުގެ ސެކްރެޓޭރިއޭޓްގެ މުވައްޒަފަކަށް ދެއްވާ ތަން ފެނެ އެވެ. އިންޓަވިއު ކުރިއަށް ދިޔަ ވަގުތު ވެސް ދޭތެރެއަކުން ބޯދިއްކޮއްލައްވަ އެވެ.

އެއީ ވެސް ސާޖިދާގެ އަމިއްލަ އިސް ނެންގެވުމަކަށް ދެއްވާ ސަޕްރައިޒެކެވެ. ސެކްރެޓޭރިއޭޓެއް އޮތަސް ފިރިކަލުންގެ ކަންކަން އަމިއްލަ އަށް ބައްލަވައި ހަމައަކަށް އެޅުވުމަށް ދެއްވާ އިސްކަން ކަމަށް ބެލެވެ އެވެ.

މުއިއްޒާއި ސާޖިދާ ކައިވެނި ކުރެއްވީ މޭ 18، 2003 ގަ އެވެ. ކައިވެނި ބައްލަވައިގަތީ ދެ ބޭފުޅުންގެ އުމުރުން ވެސް 24 އަހަރުގަ އެވެ.

ސިޔާސީ ކަންކަން މުހިއްމު ނުވިޔަސް އެއީ ފިރިކަލުން މުއިއްޒުގެ މަސައްކަތަށް ސާޖިދާ ދެއްވާ ހިތްވަރެވެ. ދިރިއުޅުމެކޭ އެއްގޮތަށް ސިޔާސީ މައިދާނުގެ އެންމެ އުނދަގޫ ވަގުތު ފިރިކަލުންނާ އެކުގައި ހުންނެވި ކަމުގެ ޔަގީންކަމެވެ.