ރިސޯޓް މުވައްޒަފުންނަށް މިހާރަށް ވުރެ ގިނައިން އާއިލާ ކައިރިއަށް ދެވޭނެ ގޮތް އޭނާ އަށް ވެރިކަން ލިބިއްޖެ ނަމަ ހަދައިދޭނެ ކަމަށް އިދިކޮޅު ޕީއެންސީ/ޕީޕީއެމްގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވައުދުވެވަޑައިގެންފި އެވެ.
ލ. ގަމުގައި ރޭ ބޭއްވި ކެމްޕެއިން ޖަލްސާގައި އޭނާ ވިދާޅުވީ، އޮފް ދުވަސްތައް އެއްކޮށްލައިގެން ޗުއްޓީއެއް ނަގަން ފުރުސަތު ދޭން ގަސްދު ކުރައްވާ ކަމަށެވެ. އެކަން ކުރުމަށް ގާނޫނަށް ބަދަލުތައް ވެސް ގެންނާނެ ކަމަށް ވިދާޅުވި އެވެ.
އޭރުން ތިން މަހުގެ އޮފް ދުވަސްތައް އެއްކޮށްލުމުން 8 ވަރަކަށް ދުވަހުގެ ޗުއްޓީއެއް ލިބޭނެކަން މުއިއްޒު ފާހަގަކުރެއްވި އެވެ. އަހަރީ ޗުއްޓީ އާއި ސްކޫލް ބަންދު ޗުއްޓީތަކުގެ އިތުރުން އޮފް ދުވަސްތަކުގެ ޗުއްޓީ ނެގުމުގެ ފުރުސަތު ރިސޯޓް މުވައްޒަފުންނަށް ލިބޭނެ ކަމަށް އޭނާ ވިދާޅުވި އެވެ.
"ގިނަގިނައިން ރިސޯޓް މުވައްޒަފުންނަށް އާއިލާ ކައިރިއަށް ދެވޭނެ ގޮތް ހަދައިދޭން ގަސްދުކުރާ ވާހަކަ ދަންނަވާލަން،" މުއިއްޒު ވިދާޅުވި އެވެ.
ރިސޯޓްތަކުގައި ރިޓެއިނާ އުސޫލުން މަސައްކަތް ކުރާ ފޮޓޯގްރާފަރުން ފަދަ މީހުންގެ މުސާރަ ގާނޫނަށް ބަދަލު ގެނެސްގެން ބޮޑުކޮށް ދޭނެ ކަމަށް ވެސް މުއިއްޒު ވިދާޅުވި އެވެ. މިހާރު އޮންނަ ގޮތުން މިފަދަ މުވައްޒަފުންނަށް ލިބެނީ އެ ރިސޯޓަކުން ކަނޑައަޅާ މުސާރައެކެވެ.
މުއިއްޒު ވިދާޅުވީ، އޭނާގެ ސަރުކާރެއްގައި އެއީ ކަނޑައެޅިފައިވާ ވަކި އަދަދެއްގެ ގޮތުގައި ބޭއްވުމުގެ ބަދަލުގައި ކުރެވޭ މަސައްކަތަށް އެކަށީގެންވާ ގޮތެއްގައި އިންސަންތަ އިން ބޮޑު ކުރެވޭ މުސާރައެއްގެ ގޮތުގައި ހަދާނެ ކަމަށެވެ.
އޭނާ ވިދާޅުވި ގޮތުގައި ރިސޯޓް މުވައްޒަފުންނަށް އެންމެ ފަހި ފުރުސަތުތަކެއް ހުށަހަޅާފައިވަނީ ޕީޕީއެމް/ޕީއެންސީގެ މެނިފެސްޓޯގަ އެވެ. އެކަމަށް ބާރު ދެއްވުމުގެ ގޮތުން، ފާހަގަ ކުރެއްވީ ރިސޯޓް މުވައްޒަފުންނަށް ހާއްސަކޮށް ހައުސިން ޔުނިޓްތަކެއް ރާއްޖޭގެ އެކި ސަރަހައްދުތަކުގައި ހަދަން ނިންމާފައިވުމެވެ.
އޭގެއިތުރުން؛
- ހާއްސަ އިނާޔަތްތަކާ އެކު ރިޓަޔަމެންޓް އެލަވެންސެއް
- ހޮޓެލް ސްކޫލެއް އިމާރާތްކުރުން.
- ތިން ސަރަަހައްދެއްގައި ލޭންގްއޭޖް ސްކޫލެއް ހެދުން.
މުއިއްޒު ވިދާޅުވީ، ރިސޯޓް މުވައްޒަފުންނަށްޓަކައި އޭނާގެ މެނިފެސްޓޯގައި ހިމަނާފައިވާ ކަންކަމަށް ބެލުމުން، އެއީ މުވައްޒަފުންނަށް އެންމެ ފައިދާވާނެ އެންމެ ފަހި ފުރުސަތުތައް ކަން ގަބޫލު ކުރެވޭނެ ކަމަށެވެ. އެކަންކަން މުވައްޒަފުންނަށް ފުރިހަމަކޮށް ދިނުމަށްޓަކައި އިހުލާސްތެރިކަމާ އެކު މަސައްކަތް ކުރައްވާނެ ކަމަށް ވިދާޅުވި އެވެ.
"އަޅުގަނޑު ޔަގީން ކުރަނީ ރިސޯޓް މުވައްޒަފުން އެގޮތަށް ގަބޫލުކުރައްވައި އަޅުގަނޑުމެންނާ އެކު ކުރިއަށް ދާނެ ކަމަށް ސެޕްޓެމްބަރު 9 ގައި،" މުއިއްޒު ވިދާޅުވި އެވެ.