މަންޑޭގެ ތަހުގީގު އަވަސްކޮށް ދައުވާ ކޮށްދީ: ހަންބޯ

ހުޅުމާލޭގައި ހަދަމުން އަންނަ ކޭ ޕާކް ރެސިޑެންސްގެ ފްލެޓްތަކުގެ މައްސަލާގައި ފުލުހުން ޖިނާއީ ތަހުގީގު ހިންގަމުންދާ ހަސަން މަމްދޫހު (މަންޑޭ)ގެ މައްސަލައިގެ ތަހުގީގު އަވަސްކޮށް ދިނުމަށާއި އޭނާގެ މައްޗަށް ދައުވާ ކޮށްދޭން، އެޖެންޓުގެ ގޮތުގައި މަސައްކަތްކުރި ހަންބޯ ކޮމްޕެނީ ޕްރައިވެޓް ލިމިޓެޑުން ބުނެފި އެވެ.

ކޭ ޕާކް އިމާރާތް ކުރަމުން އަންނަ ހަންބޯ ކުންފުނީގެ އެއް ހިއްސާދާރު ކަމަށްވާ ޝިއުން ޖިންގެ ފަރާތުން އެ ކުންފުނީގެ އަނެއް ހިއްސާދާރު މަންޑޭގެ މައްޗަށް ބޮޑެތި ތުހުމަތުތަކެއްކޮށް ފުލުހުންނަށް މައްސަލަ ހުށަހެޅީ މިދިޔަ މެއި މަހު އެވެ.

ކޭޕާކުން އެތަނުގައި އެޕާޓްމަންޓް ހުރި އަދަދަށް ވުރެ އިތުރަށް މީހުންނަށް ވިއްކާފައިވާ ކަމަށް ވަނީ ތުހުމަތުކޮށްފަ އެވެ. އަދި އެއް ހިއްސާދާރު އަނެއް ހިއްސާދާރަށް ނޭނގި ބޭންކް އެކައުންޓްތައް ހުޅުވުމާއި ފައިސާގެ މުއާމަލާތްތައް ހިންގުމާއި ކަސްޓަމަރުންނާ އެކު އެއްބަސްވުންތައް ހެދުން ފަދަ އެތައް ކަމެއް ކޮށްފައިވާ ކަމަށް ވެސް ތުހުމަތުކޮށްފައިވެ އެވެ.

އެ މައްސަލައިގެ ތުހުމަތަށް މަންޑޭ ހައްޔަރުކޮށް ޕާސްޕޯޓު ވެސް އޭރު ހިފެހެއްޓި އެވެ. ނަމަވެސް ކޯޓުން އޭނާގެ ޕާސްޕޯޓު ދޫކޮށްލަން އެންގުމުން މިހާރު ދޫކޮށްލައިފަ އެވެ.

ހަންބޯ އިން މިއަދު ނެރުނު ބަޔާނުގައި ވަނީ މަންޑޭ ދޫކޮށްލާފައި ހުރުމުން ކަންބޮޑުވުން ފާޅުކޮށްފަ އެވެ.

އެ ކުންފުނިން ބުނީ މަންޑޭގެ ފަރާތުން 100 އަށްވުރެ ގިނަ އާންމުންނަށް މަކަރާއި ހީލާތް ހަދައިގެން އޮޅުވާލުމުގެ ތެރެއިން އެޕާޓްމަންޓުގެ މުއާމަލާތް ކޮށްފައިވާ ކަމަށެވެ. އެކަން ރިޕޯޓުކޮށް ތަހުގީގު ކުރަމުންދާ ނަމަވެސް މިހާރު ހިނގަމުންދާ ތަހުގީގު އަވަސްކޮށް މަންޑޭގެ މައްޗަށް ދައުވާ ކުރުމަށް ދައުލަތުގެ ކަމާބެހޭ އިދާރާތަކަށް ވަނީ ގޮވާލައިފަ އެވެ.

"މިކަމަކީ ރައްޔިތުންގެ ހައްގުގައި އަދި މުސްތަގުބަލުގައި މިފަދަ ކަންކަން ހުއްޓުވުމަށާއ،ި އަދުލު އިންސާފަށްޓަކައި ކުރަންޖެހޭ ކަމެއްގެ ގޮތުގައި ދެކެމެވެ. ވުމާއެކު، މިހާރުގެ ސަރުކާރާއ،ި އަދި މުސްތަގުބަލުގައި ސަރުކާރާ ހަވާލުވާން ތިބި ހުރިހާ ފަރާތްތަކަށް މި ކުންފުނީގެ ފަރާތުން މިކަމަށް އިލްތިމާސްކުރަމެވެ،" އެ ބަޔާނުގައިވެ އެވެ.

އެ ކުންފުނިން ބުނީ ހުޅުމާލޭގައި އަޅައި 110 ޔުނިޓުގެ މިކްސްޑް ޔޫސް ރެސިޑެންޝަލް ކޮމްޕްލެކްސް އެޅުމަށް އާބަންކޯއާ އެކު ވެފައިވާ އެއްބަސްވުމާ އެއްގޮތަށް މި އަހަރުގެ ނިޔަލަށް ތަނުގެ މަސައްކަތް ނިންމުމަަށް މަސައްކަތް ކުރަމުންދާ ކަމަށެވެ.

އަދި އެ އެޕާޓްމަންޓުތައް އޭގެ ހަވާލުކުރުމުގެ މަސައްކަތް ވެސް ކުރިއަށްދާ ކަމަށް ހަންބޯއިން ބުންޏެވެ.

އެ ކުންފުންޏަށް ޝަކުވާ ހުށަހެޅި މީހުންނާ ބައްދަލުކޮށް، އިތުރަށް ކުރިއަށްދެވޭނެ ގޮތްތަކާއި މަޝްވަރާ ކުރުމަށްޓަކައި މިއަދުން ފެށިގެން ޝަކުވާ ހުށަހެޅި މީހުންނާ ވަކިވަކިން ބައްދަލުކުރަމުންދާނެ ކަމަށް ވެސް ބުންޏެވެ.

އަދި އެ ކުންފުނީގެ އިތުބާރު ދެމެހެއްޓުމަށްޓަކައ،ި މަންޑޭ އެ ކުންފުނީގެ ޑިރެކްޓަރުންގެ ބޯޑުން ވަކިކޮށްފައިވާތީ އޭނައާ އެއްވެސް މުއާމަލާތެއް ނުކުރުމަށް ހަންބޯއިން ވަނީ އިލްތިމާސް ކޮށްފަ އެވެ.