ދިރާސީ އާ އަހަރުގެ ކިޔެވުން ފެށިގެން ކުރިއަށްދާއިރު ވ. ރަކީދޫ ސްކޫލުގައި ކިޔަވައިދޭން ނުފަށައި، ހަތަރު ކުއްޖަކު ކިޔެވުމުން މަހުރޫމުވެފައިވާ މައްސަލަ އެ ރަށު ކައުންސިލުން އެޑިޔުކޭޝަން މިނިސްޓްރީއަށް ހުށަހަޅައިފި އެވެ.
އޮގަސްޓު މަހު ކިޔަވައިދޭން ފެށި ދިރާސީ އާ އަހަރާ އެކު ރަކީދޫ ސެޓްލައިޓް ސްކޫލްގައި ކިޔަވައިދޭން ނުފެށުނީ އެޕްލައި ކުރި ކުދިންގެ އުމުރު ހަމަނުވާތީ ކަމަށް އެޑިޔުކޭޝަން މިނިސްޓްރީން ވަނީ ބުނެފަ އެވެ.
ނަމަވެސް ވ. އަތޮޅު ކައުންސިލްގެ ރައީސް ޝުޖާއު އަލީ ވިދާޅުވީ ތައުލީމު ފޯރުކޮށްދޭންޖެހޭ، ސްކޫލަށް ވަނުމަށް އުމުރު ހަމަވެފައިވާ ހަތަރު ކުއްޖަކު ތައުލީމު ހޯދުމުގެ އެއްވެސް ފުރުސަތެއްނެތި ރަކީދޫގައި ދިރިއުޅެމުންދާ ކަމަށެވެ.
އެއީ އުމުރުން ހަ އަހަރުގެ ކުއްޖަކާއި، ހަތް އަހަރުގެ ކުއްޖަކާއި، 11 އަހަރުގެ ކުއްޖެއްގެ އިތުރުން 15 އަހަރުގެ ކުއްޖެއް ކަމަށް އޭނާ ވިދާޅުވި އެވެ.
ޝުޖާއު ވިދާޅުވީ އެ ކުދިންނަކީ އެ ރަށުގެ ސްކޫލު ހުޅުވިފައި ނެތުމުގެ ސަބަބުންނާއި، އާއިލާގެ ދިރިއުޅުމުގެ ހާލަތު ހުރިގޮތުން އެހެން ރަށަކަށް ކުދިންނަށް ކިޔަވައިދިނުމަށް ދިރިއުޅުން ބަދަލު ކުރުމަށް ދަތިވުމުގެ ސަބަބުން ސްކޫލުގައި ތައުލީމު ހާސިލް ކުރުމުގެ ފުރުސަތު ލިބިފައި ނުވާ ކުދިން ކަމަށެވެ.
"މިހާރު ދެ އަހަރު މި ވަނީ ސްކޫލުގައި ކިޔަވައިދޭން ފަށަން ކިޔާތާ. ކޮންމެ ފަހަރަކު ވެސް ކުދިން ތިބޭ. އެކަމަކު މިނިސްޓްރީން ކޮންމެވެސް ކަމެއް ލަސްވެގެން ނޫނީ ސްކޫލުގެ އިމާރާތް ނުހެދިގެން އަނެއްކާ ކިޔެވުން ނުފެށެނީ. މިހާރު އެ ތިބި ހަތަރު ކުދިން އެއީ ދިރާސީ އާ އަހަރުން ފެށިގެން ވެސް އަދި ކިޔަަވަން އެއްވެސް ތަނަކަށް ނުގޮސް ތިބި ކުދިން،" އޭނާ ވިދާޅުވި އެވެ.
"ރަށުގަ ސްކޫލުން ކިޔެވޭނެ ކަމަށް ކޮންމެ ފަހަރަކު ބުނާތީ އަންނަނީ. އެކަމަކު މިހާރު ދެން ބެލެނިވެރިން ވެސް އިތުބާރެއް ނުކުރާނެ މިނިސްޓްރީ އަކަށް، ކޮންމެ ފަހަރަކު މިހެން ވާތީ."
ޝުޖާއު ވިދާޅުވީ އެ ކުދިން ކިޔެވުމުން މަހުރޫމު ވެފައިވާކަން ސަރުކާރުގެ ކަމާ ގުޅުންހުރި ހުރިހާ އިދާރާތަކެއްގެ ސަމާލުކަމަށް ގެންނަވަން ބޭނުންވާ ކަމަށެވެ.
އެ އަތޮޅު ކައުންސިލުން މިނިސްޓްރީއަށް ފޮނުވި ސިޓީގައި ވަނީ ރަކީދޫ ސްކޫލުގައި ކިޔަވައިދިނުން ވީ އެންމެ އަވަހަކަށް ފައްޓައި ދިނުމަށް އެދިފަ އެވެ. އަދި ރަކީދޫ ސުކޫލުގައި ކިޔަވައިދިނުން ފެއްޓުމަށް ފެލިދެއަތޮޅު ކައުންސިލްގެ ފުރިހަމަ އެއްބާރުލުން ދޭނެ ކަމަށް ވެސް އެ ސިޓީގައި ވެ އެވެ.
އެޑިއުކޭޝަން މިނިސްޓަރު ޑރ. އާއިޝަތު އަލީ ވިދާޅުވީ މިހާތަނަށް ރަކީދޫ ސްކޫލަށް ވަނުމަށް ހުށަހަޅާފައި ވަނީ ހަތަރު އަހަރު ނުފެރޭ ތިން ކުދިން ކަމަށެވެ. އަދި އެޑިއުކޭޝަން މިނިސްޓްރީގެ މައްޗަށް ލާޒިމް ކުރަނީ ހަތަރު އަހަރުން މަތީގެ ކުދިންނަށް ތައުލީމު ދިނުމަށް ކަމަށް ވެސް މިނިސްޓަރު ވިދާޅުވި އެވެ. އަދި ހަތަރު އަހަރުން މަތީގެ ކުދިން ތިބި ނަމަ އަވަހަށް ފޯމު ހުށަހެޅުމަށް އެދިވަޑައިގަންނަވާ ކަމަށާއި އެ ސްކޫލުގައި ކިޔެވުން ފެއްޓުމަށް ތައްޔާރަށް ތިއްބެވި ކަމަށް ވެސް އޭނާ ވިދާޅުވި އެވެ.
ރަކީދޫ ސްކޫލްގައި މިދިޔަ އަހަރު ވެސް ކިޔަވައިދޭން ފަށާނެ ކަމަށް އެޑިއުކޭޝަން މިނިސްޓްރީން ބުންޏެވެ. އެކަމަކު، އެ ސްކޫލް އެޅުން ލަސްވެ މިދިޔަ އަހަރު ވެސް ނުފަށަ އެވެ.
އާބާދީގައި 100 އެއްހާ މީހުން ދިރިއުޅޭ ރަކީދޫގައި އެންމެ ފަހުން ކިޔަވައިދީފައި ވަނީ 2008 ގަ އެވެ. އެ ރަށުގައި ކިޔަވައިދިނުން މެދުކަނޑާލަން ޖެހުނީ އާބާދީ މަދުވެ، އަސާސީ ހިދުމަތްތައް ނުލިބި އެހެން ރަށްތަކަށް މީހުން ބަދަލުވުމުންނެވެ.
މި އަހަރު އަލަށް ފެށި ތިން ސްކޫލުގެ އިތުރުން މިހާރު ސެޓްލައިޓް ސްކޫލަށް ކިޔަވައިދެނީ ބ. ފެހެންދު އާއި ވ. ތިނަދޫގަ އެވެ.
