ކޮވިޑުގެ ބަލިމަޑުކަމުން ފުރިހަމައަށް އަރައިގަތުމަށްޓަކައި ޗައިނާ އާއި ރާއްޖެ އާ ދެމެދު އޮންނަ ޒަމާންވީ ގުޅުން އިތުރަށް ވަރުގަދަ ކުރުމަށް "ފާސްޓުފޯވަޑް" ބަޓަނަށް ފިތާފައިވާ ކަމަށް ޗައިނާ އިން ރާއްޖެއަށް ކަނޑައަޅާފައި ހުންނަވާ ސަފީރު ވަންގް ލީޝިން ވިދާޅުވެއްޖެ އެވެ.
ޗައިނާގެ 74 ވަނަ އަހަރީ ދުވަސް ފާހަގަކުރަން ރޭ ސޯޝަލް ސެންޓަރުގައި ބޭއްވި ހަފްލާގައި ވާހަކަ ދައްކަވަމުން ލީޝިން ވިދާޅުވީ ޗައިނާ އާއި ރާއްޖެ އަކީ ޒަމާނުއްސުރެ ގާތް ގުޅުމެއް ދަމަހައްޓަމުން އައި އަވަށްޓެރިން ކަމަށެވެ.
"ޗައިނާ އާއި ރާއްޖެއާ ދެމެދު ހާރިޖީ ގުޅުން ގާއިމުކުރިތާ 51 އަހަރު ވެފައިވާ އިރު، އެއް ގައުމުން އަނެއް ގައުމަށް އިހުތިރާމުކޮށް އެހީތެރިވުމުގެ ސަބަބުން، ސައިޒުގެ ގޮތުން ތަފާތު ދެ ގައުމެއްގެ މެދުގައި ހަމަހަމަ ގޮތެއްގައި ފައިދާ ކުރުމުގެ ރަނގަޅު މިސާލެއް ވަނީ ގާއިމުކޮށްދީފައި،" ސަފީރު ވިދާޅުވި އެވެ.
ޗައިނާގެ ރައީސް ޝީ ޖިންޕިންގެ ފުޅާ ތަސައްވަރުގެ ދަށުން ފަށާފައިވާ ބެލްޓު އެންޑް ރޯޑު މަޝްރޫއުއަށް 10 އަހަރު ފުރިފައިވާއިރު، އެ މަޝްރޫއުގެ ބައިވެރިއެއްގެ ގޮތުން ލީޝިން ވިދާޅުވި ގޮތުގައި ރާއްޖެއަށް ވެސް ގިނަ ފައިދާތަކެއް ވަނީ ކޮށްފަ އެވެ.
އޭގެ މިސާލެއްގެ ގޮތުން، ސަފީރު ވަނީ ޗައިނާ ސަރުކާރުގެ އެހީގައި އެޅި ސިނަމާލެ ބުރިޖާއި ވެލާނާ އެއާޕޯޓު ތަރައްގީ ކުރުމުގެ މަޝްރޫއުގެ އިތުރުން ސޯޝަލް ހައުސިންގެ ގިނަ މަޝްރޫއުތައް ފާހަގަކުރައްވައިފަ އެވެ.
އަދި ބެލްޓް އެންޑް ރޯޑް ފޯރަމްގެ ތިން ވަނަ ބައްދަލުވުން މި މަހު ޗައިނާގެ ވެރިރަށް ބެއިޖިންގައި ބާއްވާ ކަން ފާހަގަކުރައްވައި، އެ ބައްދަލުވުމުގައި ގައުމުތަކާ ގުޅިގެން އިތުރު ތަރައްގީ އާއި ކުރިއެރުން ގެންނަން ޗައިނާ އިން ތައްޔާރަށް އޮތް ކަމަށް ސަފީރު ވިދާޅުވި އެވެ.
ރާއްޖޭގެ އިންތިހާބީ ރައީސް ޑރ. މުހައްމަދު މުއިއްޒާއި އިންތިހާބީ ނައިބު ރައީސް ހުސެއިން މުހައްމަދު ލަތީފް ވެސް ބައިވެރިވެވަޑައިގެންނެވި އެ ހަފްލާގައި ލީޝިން ވިދާޅުވި ގޮތުގައި ފާއިތުވި އަހަރުތަކުގައި ދެ ގައުމުގެ ލީޑަރުންގެ ހަރުދަނާ އިރުޝާދުގެ ދަށުން ދެ ގައުމުގެ ގުޅުން ވަރަށް ރަނގަޅު މިސްރާބެއްގައި ވަނީ ހިފެހެއްޓިފަ އެވެ.
"މި އަހަރު ފެށުނު ފަހުން، ކޮވިޑުން އަރައިގަތުމަށްޓަކައި ޗައިނާ އާއި ރާއްޖޭގެ ގުޅުމުގެ ފާސްޓްފޯވަޑް ބަޓަނަށް ވަނީ ފިތާފައި،" ސަފީރު ވިދާޅުވި އެވެ.
އެ ކަން ކުރުމަށްޓަކައިި ޗައިނާ އާއި ރާއްޖެ އާ ދެމެދު ސީދާ ދަތުރުތައް އަލުން ފެށުމުގެ ސަބަބުން ދެ ގައުމުގެ ދެމެދުގައި އޮންނަ ޓޫރިޒަމް ގުޅުން އިތުރަށް އަވަސްވެގެން ދިޔަ ކަން އޭނާ ފާހަގަކުރެއްވި އެވެ.
މީގެއިތުރުން، ދެ ގައުމުގެ ދެމެދުގައި ސޮއިކުރެވުނު ވިސާ އެގްޒެމްޕްޝަން އެއްބަސްވުމަށް މިހާރު އަމަލުކުރަން ފަށާފައިވާއިރު، ލީޝިން ވިދާޅުވީ ދެ ސަރުކާރުގެ އިސް އޮފިޝަލުންގެ އިތުރުން އާންމު ރައްޔިތުން ވެސް ދެ ގައުމަށް ދަތުރުކުރުމުގެ މަގު ވަރަށް ބޮޑަށް ފަހިވެފައިވާ ކަމަށެވެ.
އަދި ކުރިއަށް ތަނުގައި، ދިވެހި ސަރުކާރާ އެކު ގުޅިގެން، ދެ ގައުމަށް ވެސް ދެމެހެއްޓެނިވި ފައިދާ ލިއްބައިދޭ ތަރައްގީ އާއި ކުރިއެރުން ގެނައުމަށް ޗައިނާ އިން ތައްޔާރަށް އޮތް ކަމުގެ ޔަގީންކަން އޭނާ ރޭ ދެއްވި އެވެ.