ފަލަސްތީނަށް އެހީވުމަށް އިންޓަނޭޝަނަލް އެއިޑް ކެމްޕެއިން (އައިއޭސީ) ހުޅުވި ފަންޑަށް މިހާތަނަށް ހަތް މިލިއަނަށް ވުރެ ގިނަ ރުފިޔާ ލިބިފައިވާ ކަމަށް އެ ޖަމިއްޔާ އިން މިއަދު ބުނެފި އެވެ.
އެ ޖަމިއްޔާގެ އޮފިޝަލަކު ވިދާޅުވީ މި މަހުގެ 8 ވަނަ ދުވަހު ހުޅުވި އިމަޖެންސީ ފަންޑަށް، އޮންލައިންކޮށް އެކަނި ވެސް ހަތް މިލިއަނަށް ވުރެ ގިނަ ރުފިޔާ ލިބިފައިވާ ކަމަށެވެ.
އޭގެ އިތުރަށް، އެހެން ފަރާތްތަކުން ހިންގި ފަންޑްރެއިޒިންގެ ހަރަކާތްތަކުން ލިބިފައިވާ ފައިސާ ވެސް އެބަހުރި ކަމަށް އޭނާ ވިދާޅުވި އެވެ.
"ހަތް މިލިއަނަށް ވުރެ ގިނަ ރުފިޔާއަކީ ސީދާ އެކައުންޓަށް ވަދެފައި ހުރި ވަރު،" އޮފިޝަލް ވިދާޅުވި އެވެ.
އައިއޭސީގެ ފަންޑު ބަންދުކުރާނެ ދުވަހެއް އަދި ނޭނގެ އެވެ.
އެ ފަރާތުން ހިންގާ ޕްރޮޖެކްޓު އަގުތައް ހަދާފައި ވަނީ އެ ޕްރޮޖެކްޓެއް ހިންގުމާއި ބެލެހެއްޓުމާއި ދެމެހެއްޓުމާއި އިދާރީ ހިންގުމާއި ތަރައްގީ އަށް ދާނެ ކަމަށް ލަފާކުރާ ހަރަދުތަކާ އެކު، އެވްރެޖު 12.5 ޕަސެންޓް ހިމެނޭ ގޮތަށެވެ.
އިޒްރޭލުން މިހާރު ގާޒާ އަށް ދެމުން ދަނީ މިހާތަނަށް ދިން އެންމެ ވަރުގަދަ ހަމަލާތަކެވެ. މި މަހުގެ ހަތް ވަނަ ދުވަހު ފެށި ހަނގުރާމައިގައި، އިޒްރޭލުގައި ހަމަލާތަކުގައި ފަލަސްތީނުގެ 2،700 އަށް ވުރެ ގިނަ މީހުން ވަނީ ޝަހީދުވެފަ އެވެ. އެތައް ސަތޭކަ ބަޔަކު ހާލުގައި ޖެހި، ގެދޮރު ގެއްލިފައިވެ އެވެ.