ހދ. މަކުނުދޫގައި ގޭސް ފުޅިއެއް ގޮވައި، ދެ މީހަކު މަރުވެފައިވާ ކަމަށް ފުލުހުން ބުނެފި އެވެ.
ފުލުހުން ބުނީ، އެ ހާދިސާގައި ގޮވާފައިވަނީ އެ ރަށު ބަނދަރުމަތީގައި ހުންނަ މަސްމާރުކޭޓު ކައިރީގައި އޮތް ގޭސް ފުޅިއެއް ކަމަށް މިހާތަނަށް ބެލި ބެލުމުން އެނގިފައިވާ ކަމަށެވެ.
އަދި އެ ހާދިސާގައި މަރުވީ ބިދޭސީ ދެ ފިރިހެނުން ކަން ވެސް ފުލުހުން މިހާރު ވަނީ ޔަގީންކޮށްދީފަ އެވެ.
އެއީ މަކުނުދޫ އެއާޕޯޓުގެ ބިން ހިއްކުމުގެ މަސައްކަތް ކުރަމުންދާ ކުންފުނީގެ ދެ މުވައްޒަފުން ކަމަށް ފުލުހުން ބުންޏެވެ.
މައުލޫމާތު ލިބިފައިވާ ގޮތުގައި ގޭސް ފުޅި ގޮވި ގަޑީގައި މުޅި ރަށް ގުޑައިގެން ދިޔަ އެވެ.
އަދި އެ ބާރުގަދަ ގޮވުމާ އެކު، މަރުވި ދެ މީހުންގެ ހަށިގަނޑުގެ ބައިތައް ދުރަށް ވިއްސައިގެން ދިޔަ ކަމަށް ވެސް މައުލޫމާތު ލިބިފައި ވެ އެވެ. އަދި އެތަނުގެ ކައިރީގައި ހުރި އިމާރާތުންގެ ސީލިންގެ ބައެއް ވެސް ވެއްޓިފައިވާ މަންޒަރު ސޯޝަލް މީޑިޔާގައި ދައުރުވަމުންދާ ބައެއް ފޮޓޯތަކުން ފެނެ އެވެ.
އެމްއެންޑީއެފުން ބުނީ ފުލުހުންނާ ގުޅިގެން އެ ހާދިސާ ހިނގި ގޮތުގެ ތަހުގީގެއް ކުރަމުން އަންނަ ކަމަށެވެ.
