ހައިވޭގައި ހުރި ސޯލާޕެނަލްތައް ނަގައި ރަށަކަށް ބަދަލުކުރާނަން: މުއިއްޒު

ހުޅުމާލޭ ލިންކު ރޯޑުގައި ހަރުކޮށްފައިވާ ސޯލާ ޕެނަލްތައް ނަގައި، އެކަމަށް ހާއްސަ ދެ ރަށަކަށް ބަދަލުކުރައްވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ސިނަމާލެ ބްރިޖުން މާލެ، ހުޅުލެ އަދި ހުޅުމާލެ ގުޅުވައިދޭ ލިންކު ރޯޑުގައި ނުވަތަ ހައިވޭގައި ގާއިމުކުރާ 5.6 މެގަވޮޓްގެ ސޯލާ ހަކަތައިގެ ނިޒާމަކީ ރާއްޖޭގައި އެއް ގްރިޑެއްގައި މިހާރު ކުރިއަށްދާ އެންމެ ބޮޑު ސޯލާ ޕީވީ އިންސްޓޯލްމަންޓެވެ.

މިއަދު ހުޅުމާލެ 1 ގެ ރައްޔިތުންނާ ބައްދަލުކުރައްވައި މުއިއްޒު ވިދާޅުވީ ސޯލާ ޕެނަލްތަކާ އެކު ހުޅުމާލެ ހައިވޭ މިހާރު ފެންނަނީ ވަރަށް ހާސްކަން ބޮޑު ތަނެއްގެ ގޮތުގައި ކަމަށެވެ. މާލެ ސަރަހައްދުގައި މޫދު އެންމެ ރީތިކޮށް ފެންނަން އޮންނަ ސަރަހައްދަކީ އެއީ ކަމަށާއި ނަމަވެސް މިހާރު ޖަހާފައިވާ ސޯލާ ޕެނަލްތަކުން އެ ސަރަަހައްސުގެ ރީތިކަން ގެއްލިފައިވާ ކަމަށް މުއިއްޒު ވިދާޅުވި އެވެ.

"އިއާދަކުރަނިވި ހަކަތަ އަކީ މުހިންމުކަމެއް. އެއީ އަޅުގަނޑުމެން ވެސް އިސްކަމެއް ދޭނެ ކަމެއް. ކްލައިމެޓް ޗޭންޖަކީ، އެންވަޔަރްމެންޓަކީ އަޅުގަނޑުމެން އިސްކަމެއް ދޭނެ ސިޔާސަތެއް. ނަމަވެސް އެކަން ކުރުމަށް އެންމެ ރަނގަޅު ގޮތް އޮންނަ ފަދައިން މިކަން ކުރަން ވެސް ރަނގަޅު ގޮތް އޮންނާނެ،" މުއިއްޒު ވިދާޅުވި އެވެ.

ހައިވޭގައި ސޯލާ ޕެނަލް ހަރުކުރުމަށް ގާއިމްކޮށްފައިވާ ސްޓްރަކްޗާ.-- ފޮޓޯ: ނިޝާން އަލީ | މިހާރު

އެހެންވެ، ހައިވޭގައި ޖަހާފައި ހުރި ސޯލާ ޕެނަލްތައް ނަގާނެ ކަމަށާއި އެ ޕަނަލްތައް ކުޑަ ނުވަތަ މެދު ސައިޒުގެ އެއް ރަށް ނުވަތަ ދެ ރަށަށް އެ ޕެނަލްތަކަށް ފަންޑުކުރި ފަރާތާއި ވާހަކަ ދައްކައިގެން ބަދަލުކުރައްވާނެކަމަށް އެ މަނިކުފާނު ވިދާޅުވި އެވެ.

ހައިވޭގައި ސޯލާ ހަކަތައިގެ ނިޒާމު ގާއިމުކުރަނީ ތައިލެންޑުގެ އެންސިސް ކޯ ލިމިޓެޑް ކުންފުންޏާ ހަވާލުކޮށްގެންނެވެ. އެ ކުންފުންޏާ މި މަސައްކަތް ހަވާލުކުރީ ނޮވެމްބަރު 2020 ގަ އެވެ. އަދި އަމަލީ މަސައްކަތް ފެށީ މިދިޔަ އަހަރު ޑިސެމްބަރުގަ އެވެ.

Highway ge penal thah STELCO ge grid ah gulhuvumuge masahkaiy fashaifi

The most trusted news source in the Maldives

Mihaaru

މި ސޯލާ ޕީވީ އިންސްޓޯލްމަންޓުން އަހަރަކު ގާތްގަނޑަކަށް 9.1 މިލިއަން ސޯލާ ޔުނިޓް އުފެއްދޭނެކަމަށް އެންވަޔަރްމެންޓް މިނިސްޓްރީން ވަނީ ބުނެފަ އެވެ. އެއީ ދެ މިލިޔަން ލިޓަރުގެ ޑީސަލުން އުފެއްދޭހާ ކަރަންޓެވެ. އެހެންވެ ސަރުކާރުން ތެލަށް ކުރާ ހަރަދުތަކުން އަހަރަކު 20 މިލިޔަން ރުފިޔާ ސަލާމަތްވާނެކަމަށް މިނިސްޓްރީން ކުރިން ބުނެފައިވެ އެވެ.

މިނިސްޓްރީން ބުނެފައިވާ ގޮތުގައި، އެ މަސައްކަތް ނިންމައި ސޯލާ ޕެނަލްތަކުން މި މަހު ކަރަންޓު އުފައްދަން ފެށޭނެ އެވެ.