ބޮލީވުޑްގެ ތަރި، އަރުޖުން ކަޕޫރުގެ އާ ފިލްމު "ދަ ލޭޑީ ކިލާ" އަންނަ މަހުގެ ތިނެއްގައި ރިލީޒްކުރަން ނިންމައިފި އެވެ.
އަރުޖުން ވަރަށް ތަފާތު، ޑާކް ކެރެކްޓާއެއް ކުޅެފައިވާ އެ ފިލްމުގެ ޓްރެއިލާ ވަނީ އިއްޔެ ނެރެފަ އެވެ. މި ފިލްމުގައި ދައްކާނީ ވެސް ކުށުގެ ވެށިން ދިމާވާ ދެމީހަކުގެ މެދުގައި ލޯބީގެ ގުޅުން އުފެދި ހިނގާ ކަންތައްތަކެކެވެ.
އަރުޖުންއާ އެކު މި ފިލްމުގެ ލީޑު ރޯލުން ފެންނާނީ ބޫމީ ޕަޑްނޭކަރެވެ. މިއީ އެ ދެމީހުން އެކުގައި ފެންނަ ފުރަތަމަ ފިލްމެވެ.
"ދަ ލޭޑީ ކިލާ"ގެ ޑައިރެކްޓަރަކީ މިދިޔަ އަހަރު ތާޕްސީ ޕައްނޫގެ ބިރުވެރި ފިލްމު "ބްލާ" އަދި 2019 ވަނަ އަހަރުގެ މަޝްހޫރު ފިލްމު "ސެކްޝަން 375" ގެނެސްދިން އަޖޭ ބާލް އެވެ.
އަރުޖުން ފިލްމަކަށް އެންމެ ފަހުން ނުކުތީ މިދިޔަ ޖެނުއަރީ މަހު ނެޓްފްލިކްސް އިން ގެނެސްދިން "ކުއްތޭ" އެވެ. ބޫމީ އެންމެފަހުން ކުޅުނީ މިދިޔަ މަހު ރިލީޒްކުރި "ތެންކް ޔޫ ފޯ ކަމިން" އެވެ. މި އަހަރު ބޫމީގެ އިތުރު ދެ ފިލްމެއް ނުކުތެވެ. އެއީ "ބީޑް" އާއި "އަފްވާ" އެވެ.