އެތައް ގަޑިއިރެއްގެ އޮޕަރޭޝަނަކަށް ފަހު ފުލުހުން އާރުޑީސީން ގިނަ ހެކިތަކެއް ގެންގޮސްފި

ފުލުހުން ހިންގާ ތަހުގީގަށް އާރުޑީސީން ގިނަ އަދަދެއްގެ ލިޔެކިޔުންތަކެއް ރޭ ގެންގޮސްފި އެވެ.

އިއްޔެ ހެނދުނު 10 ޖަހަން އުޅެނިކޮށް އާރުޑީސީގެ އޮފީހަށް ފުލުހުން ވަދެ އެ ތަން ފާސްކުރުމަށް ފަހު، ރޭ 11 ޖަހާކަންހާއިރު ވަރަށް ގިނަ އަދަދެއްގެ ބޮކްސް ފައިލްތަކާއި ކަރުދާސްތައް ފުލުހުންގެ ޕިކަޕަކަށް އަރުވައިގެން ގެންދިޔަ އެވެ.

ފުލުހުން އާރުޑީސީއާ ގުޅޭ ގޮތުން ކުރަނީ ދާދި ފަހުން ފެންމަތިވި 13 މިލިއަން ރުފިޔާގެ ޕެޓީ ކޭޝް މައްސަލައިގެ ތަހުގީގެވެ. އެ ތަހުގީގަށް ބޭނުންވާ ހެކި ހޯދަން އޯކިޑް މަގުގައި ހިންގާ އާރުޑީސީގެ އޮފީހަށް ފުލުހުން ވަނީ ކޯޓު އަމުރެއްގެ ދަށުންނެވެ.

މި މައްސަލައިގެ ތަފުސީލެއް އަދި ނުލިބެ އެވެ.

އާރުޑީސީގެ މުވައްޒަފުންގެ އަމިއްލަ އެކައުންޓުތަކަށް 2019 އިން ފެށިގެން ފައިސާ ވަދެފައިވާ އިރު އެއީ ޕެޓީ ކޭޝް ކަމަށް އެ ކުންފުނިން ވަނީ ބުނެފަ އެވެ.

ފައިނޭންސް ޑިޕާޓްމަންޓްގެ ތިން މުވައްޒަފުންގެ އެކައުންޓްތަކަށް ގިނަ އަދަދެއްގެ ފައިސާ ކޮންމެ މަހަކު ވެސް ފޮނުވަނީ ޕެޓީ ކޭޝް ގެންގުޅުމާ ގުޅޭ ގޮތުން އެ ކުންފުނިން އެކަލަވައިލި އުސޫލެއްގެ ދަށުން ކަމަށް ވެސް އާރުޑީސީން ކުރިން ބުންޏެވެ.

އެ އޮޕަރޭޝަނާ ގުޅޭގޮތުން، އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕުގައި، އާރުޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ވިދާޅުވީ އެއްވެސް ކަމެއް ނުވާ ކަމަށާއި އެ އޮފީހަށް ފުލުހުން ވަނީ "ހެޑްލައިން ހަދަން" ކަމަށެވެ. އެއާ އެކު، އޭނާ ވަނީ ޕޮލިސް ކޮމިޝަނަރު މުހައްމަދު ހަމީދަށް ފާޑުވިދާޅުވެފަ އެވެ.

މޫކޭ ވިދާޅުވި ގޮތުގައި، ވެރިކަމުގެ މި ފަސް އަހަރު ހޭދަކުރެއްވީ ހަމީދުގެ އުނދަލުން ސަލާމަތް ނުވެގެންނެވެ.

"ކިނިނެއް މަގު ހަދާނީ،" އެމްޑީޕީގެ މެމްބަރަކު ނިސްބަތްވާ ދާއިރާގެ ރަށެއްގެ މަގު ހެދުމުގެ އަޕްޑޭޓާ ގުޅޭ ގޮތުން އެ މެމްބަރު ސުވާލު ކުރެއްވުމުން މޫކޭ ދެއްވި ޖަވާބުގައި ވިދާޅުވި އެވެ.