ރިޔާސީ އިންތިހާބުގެ ކެމްޕެއިން ފޯރި ގަދަވިއިރު، އިންތިހާބުގައި ވާދަކުރައްވަނީ ރިޝްވަތާއި މަނީ ލޯންޑަރިންގެ ކުށުގައި ޖަލުގައި އޮންނެވި ކުރީގެ ރައީސް އަބްދުﷲ ޔާމީނޭ ހީވާ ވަރަށް އެ މަނިކުފާނުގެ ފޮޓޯތައް ބޮޑުވެފައި ގިނަވި އެވެ. ޔާމީންގެ ވެރިކަމުގައި ގައުމަށް ގެނައި ތަރައްގީގެ ވާހަކަ ފަހުރުވެރިކަމާ އެކު ރައްޔިތުންނަށް ހަނދާންކޮށްދެމުން ދިޔަ އެވެ.
އާންމު ސަޕޯޓަރުންނަށް، ޔާމީންގެ ފުރިހަމަ ބާރުވެރިކަމުގައި އޮއްވައި ފެނުނު ޕީޕީއެމް/ޕީއެންސީ އެތެރެއިން ކުނިވަމުން ގޮސް ރޭ ފަޅައިގެން ދިޔައިރު އެ މަނިކުފާނުގެ އިސް ވަކީލް ޑރ. މުހައްމަދު ޖަމީލް އަހްމަދު ދެއްކެވީ ވެސް މި ވާހަކަ އެވެ. މިދިޔަ ހުކުރު ދުވަހު ވެރިކަމުގެ ހުވާކުރެއްވި ޑރ. މުހައްމަދު މުއިއްޒު އާއި ކުރީގެ ރައީސް ޔާމީންގެ ގުޅުން ކެނޑި ހަނގުރާމަ ފެށިއްޖެ ކަމުގެ ވާހަކަ އެވެ.
"ވެރިކަމުގެ ފަސް އަހަރުގެ ތެރޭގައި އެ މަނިކުފާނު ކުރެއްވި ތަރައްގީގެ ވާހަކަ، މި ފަސް އަަހަރު ހޯދުމަށްޓަކައި ޕީޕީއެމްގެ ލީޑަޝިޕުން ދެއްކި. އެ މަނިކުފާނު ކުރެއްވި ބުރަ މަސައްކަތުގެ ވާހަކަ ދެއްކި. އެ މަނިކުފާނުގެ ހުސް ގޮނޑި ދެއްކެވި. އެ މަނިކުފާނުގެ ފޮޓޯފުޅު ބޭނުންކުރެއްވި. މިއީ ރާއްޖޭގެ ތާރީހުން ފެންނަން އޮތް ކަމެއް. މިއީ މިހާ އަވަހަށް ހަނދާން ނައްތާލެވެން އޮތް ކަންތައްތަކެއް ނޫން،" ޕީޕީއެމްގައި ޔާމީންގެ ސިޔާސީ ފިކުރު ކުރިއެރުވޭނެ ގޮތެއް ނެތުމުން ޕާޓީން ވަކިވެވަޑައިގެން އާ ޕާޓީއެއް ހަދަން ނިންމެވިކަން އިއުލާނުކުރައްވަމުން ޖަމީލް ވިދާޅުވި އެވެ.
ކަންތައްތައް ގޯސްވެފައި އޮތް ވަރު ހާމަކުރައްވަން ޖަމީލް ވިދާޅުވީ ރައީސް މުއިއްޒާއި ޔާމީންގެ ގުޅުން ނެތް ކަމުގެ ވާހަކަ އެވެ.
"އަޅުގަނޑު މިއަދު ކަށަވަރުކޮށްދޭން ބޭނުންވޭ، ދިވެހިރާއްޖޭގެ ރައްޔިތުންނަށް، ވެރިކަމަށް ހޮވިޑައިގަތުމަށް ފަހު ޑރ. މުއިއްޒު ފޯނެއް ވެސް ނުނަންގަވާ."
ރައީސް ޑރ. މުއިއްޒުގެ އަރިސް ބޭފުޅުން ވިދާޅުވީ، ޔާމީން މިނިވަންކުރަން ގޮވާލައި ގެކޮޅު ކައިރިއަށް އެއްވުމުގެ ބަދަލުގައި ވަގުތު ދީގެން، ހަމަނުޖެހުން ނަގާނުލައި ކަންކަން ކުރަން ރައީސް ޑރ. މުއިއްޒު އެދިވަޑައިގެންނެވި ހިސާބުން މައްސަލަ ގޯސްވެއްޖެ ކަމަށެވެ. ރައީސް ޑރ. މުއިއްޒު އެކަމަށް އެދިވަޑައިގަތް ޖަލްސާގައި އެ މަނިކުފާނު އިންނަވަނިކޮށް ޔާމީން ގުޅުއްވި ކަމަށް އަރިސް ބޭފުޅަކު ވިދާޅުވި އެވެ.
ޔާމީން މިނިވަންކުރުމުގެ ކަންކަން ރީތި ގޮތުގައި ކުރަން ބޭނުންފުޅުވާތީ، އަބަދު މަގުމައްޗަށް އެއްވެ ނޫޅުމަށް ރައީސް ޑރ. މުއިއްޒު އެދިވަޑައިގެންނެވުމާ އެކު ހަމަ އެ ރޭ ވެސް ޔާމީންގެ ސަޕޯޓަރުންތަކެއް ޔާމީންގެ ގެކޮޅު ކައިރި އަށް އެއްވެ އަޑުއުފުލި އެވެ.
"ޔާމީން އެ ރޭ ގުޅުއްވމުން އެ ވަގުތު ރައީސް ޑރ. މުއިއްޒު ޖަވާބެއް ނުދެއްވާ. އޭގެ ފަހުން ދެ ބޭފުޅުން ވެސް ނުގުޅުއްވާ. ޔާމީން ވެސް އޭގެ ފަހުން ރައީސް ޑރ. މުއިއްޒަށް ނުގުޅުއްވާ،" ރައީސް ޑރ. މުއިއްޒުގެ އަރިސް ބޭފުޅަކު ވިދާޅުވި އެވެ.
ޔާމީން ޖަލުން ގެ އަށް ބަދަލުކުރި ދުވަހު ވެސް ދެއްކެވީ ރައީސް ޑރ. މުއިއްޒާ މެދު އޮތް ހިތްހަމަޖެހިވަޑައިނުގަތުމެވެ. ރީއްޗަށް ވާހަކަފުޅެއް ނުދައްކަވަ އެވެ. ސަލާން ކުރެއްވީ ވެސް "ވަރަށް ނޫން ގޮތަކަށް" ހުންނަވައިގެންނެވެ.
"ޔާމީން އެ ދުވަހު ގެކޮޅަށް ވަދެވަޑައިގަތުމުން ރައީސް ޑރ. މުއިއްޒު އަރިހުގައި އެދިވަޑައިގަތީ އިންތިހާބުގެ ކާމިޔާބީ ވެސް ފާހަގަނުކުރަން. ކީއްކުރަން ކުރާ ކަމެއްހޭ ވިދާޅުވީ،" ރައީސް ޑރ. މުއިއްޒުގެ އަރިސް ބޭފުޅަކު ވިދާޅުވި އެވެ.
ޔާމީން/މައުމޫންގެ ކޯޅުން ތަކުރާރުވީ
ޔާމީން 2013 ވަނަ އަަހަރު ރިޔާސީ އިންތިހާބު ކާމިޔާބުކުރެއްވި ހިސާބުން ކުރީގެ ރައީސް މައުމޫން އަބްދުލްގައްޔޫމާ ދެބަސްވުންތައް އުފެދުނެވެ. ޔާމީންގެ އެކި ނިންމެވުންތަކަށް މައުމޫންގެ ނުރުހުން އަމާޒުވަމުން ގޮސް އެންމެ ފަހުން ހުޅުގަނޑު ފަޅައިގެންދިޔައީ ވެރިކަމަށް ތިން އަހަރު ފަހުން 2016 ވަނަ އަހަރުގެ އޮކްޓޫބަރު މަހު އެވެ. ޕާޓީގެ ކޮންޓްރޯލް ހޯދަން ޔާމީން ފަޅީގެ މީހުންނާއި މައުމޫން ފަޅީގެ މީހުން ފިނި ހަނގުރާމައެއް ފެށި އެވެ. އެއީ މައުމޫން ބޭނުންފުޅުވާ ގޮތަށްް ޕާޓީ ހިންގިޔަ ނުދޭން ޔާމީންގެ ބާރު އޮތް ބޭފުޅުން ފާޅުގައި ނުކުތް ހިސާބުންނެވެ.
އާރާއި ބާރުގައި ހުންނެވި ޔާމީނަށް ޕާޓީ ހޯދައިގެން ބަޔަކު ކޯޓަށް މައްސަލަ ހުށަހަޅައި ޔާމީން ބޭނުންފުޅުވި ގޮތަށް ހުކުމް ނެރެ، އަދި ނުވިތާކަށް ޕީޕީއެމްގެ އޮފީހުގެ ތަޅު ހަލާކުކޮށްލައިގެން އެއް ރެޔަކު ވަދެގަނެ އެތަނުގައި ހުރި އެއްޗެހި ވެސް ގެންދިޔަ އެވެ. މި ހުރިހާ ކަމެއް ކުރި އިރު އެކަން ކުރި މީހުންނަށް ހިމާޔަތް ދީގެން ފުލުހުން ޕީޕީއެމް އޮފީސް ބޭރުގައި ފޯރިމަރަމުން ވެސް ދިޔަ އެވެ.
އެކަމަކު މިފަހަރު ހުރިހާ ކަމެއް މި ބަދަލުވީ ވެރިކަމަށް ހަފްތާއެއް ނުވެ އުޅެނިކޮށެވެ. ޔާމީނަށް ޕާޓީގެ ކޮންޓްރޯލް އެއްކޮށް ގެއްލި އަމިއްލަފުޅަށް ދުރަށް ވަޑައިގަތީ އެވެ.
ރިޔާސީ އިންތިހާބުގެ ފުރަތަމަ ބުރުގައި ޔާމީންގެ ނަމާ އެކު ރަނިންމޭޓަކަށް ހުށަހެޅި ޖަމީލް ވިދާޅުވީ ޔާމީން ޕީޕީއެމާ ދުރަށް ޖެހިވަޑައިގަތީ ވަރަށް ގިނަ ކަންތައްތަކެއް ހިނގައިގެން ކަމަށެވެ. ޕީޕީއެމްގެ ލީޑަޝިޕްގައި ތިއްބެވި ބޭފުޅުން ޔާމީންގެ ލަފައެއް މަޝްވަރާއެއް ނުހޯއްދަވާ ކަމަށާއި ރައީސް މުއިއްޒު ސަރުކާރު އެކުލަވާލުމުގައި ވެސް ޔާމީންގެ ލަފައެއް ނުހޯއްދަވާތާ، މިހާރު ފޯނު ވެސް ނުނަންގަވާ ކަމަށް ވިދާޅުވި އެވެ.
"...ޕީޕީއެމްގެ ލީޑަޝިޕުން މި ވަނީ ރައީސް ޔާމީނަށް ދުރަށް ވަޑައިގެންފައި. ރައީސް ޔާމީނާ މަޝްވަރާއެއް ނުއެއް ކުރައްވާ... ރައީސް ޔާމީންގެ މަޝްވަރާ ނަގައިގެން ޕާޓީ ހިންގަވަން އެ ބޭފުޅުން ބޭނުމެއް ނުވޭ،"
ޖަމީލް ވިދާޅުވީ ވަކި ކަންތައްތަކެއް ހާސިލްވުމުން ޔާމީންގެ ލަފައެއް، އިރުޝާދެއް، މަޝްވަރާއެއް ޕީޕީއެމުން ބޭނުން ނުވި ކަމަށެވެ.
"ސީދާ ރައީސް ޔާމީނަށާއި ޕީޕީއެމް އަށް، ހަގީގަތުގައި ވަރަށް ބޮޑު ބޭވަފާތެރިކަމެއް ޕީޕީއެމްގެ ލީޑަޝިޕްގެ އިސް ބޭފުޅުންނާއި ޑރ. މުއިއްޒާއި ވަރަށް ގިނަ ބޭފުޅުންތަކެއް ވެ ވަޑައިގެންފި،" ޖަމީލް ވިދާޅުވި އެވެ.
ޖަމީލް ވިދާޅުވި ގޮތުގައި ކޯލިޝަނަކުން އައި ވެރިކަމެއްގައި އެއްވެސް ވަރަކަށް ހިޔާލް ބަދަލުކުރުމެއް، މަޝްވަރާކުރުމެއް ނެތި ސަރުކާރު އެކުލަވާލައިގެން މިހާރު ކުރިއަށް ދާއިރު މީގެ ތެރޭގައި ބުރަކޮށް މަސައްކަތްކުރެއްވި ވަރަށް މަދު ބޭފުޅަކު ނޫނީ ނެތް ކަމަށެވެ.
"މުޅިންހެން ބޭރުން އެކި ދިމަދިމާލުން އައިސް ތިބި ބައެއް."
ޔާމީން ނެތުމުން ޕީޕީއެމް/ޕީއެންސީ ހިންގެވި، މިހާރު ރައީސްގެ އެޑްވައިޒަރު އަބްދުއްރަހީމް އަބްދުﷲ އާއި އާއިލާގެ އެތައް ބަޔަކަށް ވަޒީފާތައް ދީފައިވާ ކަމަށް ވިދާޅުވެ ޖަމީލް ވަނީ މިއީ ވަކި ފަރާތެއްގެ ޖާހަތާއި އިއްޒަތް ބޮޑުކުރުމަށް ގެނައި ވެރިކަމެއް ނޫން ކަމަށް ވިދާޅުވެފަ އެވެ.
ހަމަ މި ހުރިހާ ވާހަކައެއް 2013 ގެ އިންތިހާބަށް ފަހު މައުމޫންގެ ފަރާތުން ޔާމީނަށް ވެސް އަމާޒުވި އެވެ.
ޔާމީން ހާއްސަ ނުވުމާއި މިނިވަންވުން ލަސްވުން!
މުއިއްޒަށް ރިޔާސީ އިންތިހާބު ކާމިޔާބުވެ ވަޑައިގަތުމާ އެކު ކުރީގެ ސަރުކާރުގައި އެދިވަޑައިގެން ޔާމީން ޖަލުން ގޭބަންދަށް ބަދަލުކުރި އެވެ. ޔާމީން ގެޔަށް ވަޑައިގަތް ދުވަހަކީ ސަޕޯޓަރުންނަށް އީދަކަށްވި އެވެ. އެކަމަކު، ޕާޓީގެ އެތެރޭގެ ކަންކަން އެނގޭ ބައެއް މީހުން ކިޔައިދިން ގޮތުގައި، ޔާމީން ގެޔަށް ވަޑައިގަތް ދުވަސް ވެސް ވަނީ އަބްދުއްރަހީމަށް ބަހުގެ ހަމަލާ ދެއްވައިފަ އެވެ.
ޔާމީނަށް އިންތިހާބުގައި ވާދަ ނުކުރެއްވޭނެ ކަމަށް ސުޕްރީމް ކޯޓުން ކަނޑައެޅުމުން، އިންތިހާބު ބޮއިކޮޓްކުރުމަށް ޔާމީން ދެއްވި އިރުޝާދަށް ތަބާނުވެ މުއިއްޒަށް ރިޔާސީ ޓިކެޓް ލިބޭނެ މަގު ފަހިކޮށްދެއްވީ އަބްދުއްރަހީމް ކަމަށް ވާތީ އެއީ ޣައްދާރުވުން ކަމަށް ޔާމީން ދެކެވަޑައިގަތީ އެވެ.
އޭގެ ކުރިން، ރިޔާސީ އިންތިހާބުގެ ދެ ވަނަ ބުރުގެ ވޯޓުގެ ކުރިން ޔާމީން ކޯޓަށް ހާޒިރުކުރި ދުވަހަކު ވަކީލުންނާ އެކު ދެއްކެވި ވާހަކައެއްގައި، މުއިއްޒަށް ކާމިޔާބުވާން އޮތީ ޔާމީނަށް އޮތް ތާއީދަކުން ކަމަށް ސިފަކުރައްވައި މުއިއްޒަކީ ގިނަ މީހުންނަށް އެނގޭ ބޭފުޅެއް ނޫން ކަމަށް ވިދާޅުވެ ދެއްކެވި ވާހަކަތަކެއްގެ އޯޑިއޯއެއް ވެސް ލީކުވި އެވެ. އޭގައި ވެސް އިވެނީ މުއިއްޒު ކަންތައް ކުރައްވަންވީ ގޮތް ޔާމީން ވިދާޅުވާތީ އެވެ.
މި އަޑުތައް ޕީޕީއެމް/ޕީއެންސީން ކުރިން ދޮގުކުރި އެވެ. އެކަމަކު ހިރަފުސް އޮބުނު އިރު އެ ވީ ހަގީގަތަށެވެ.
ޔާމީން ގޭބަންދުގައި ހުންނަވައިގެން ގޭދޮށަށް ސަޕޯޓަރުން އެއްކުރައްވައި ކުޑަދޮރުން ދެއްކެވީ ވެސް އެ ވާހަކަ އެވެ. މަގާމުތައް ލިބުމުން ފިނި ކޮޓަރިއަށް ވަދެ ކަންކަން ހަނދާން ނެތޭ ބޭފުޅުން ވަރަށް ގިނަ ކަމަށް ވިދާޅުވި އެވެ. އެ މަނިކުފާނު ދެކެ ލޯބިވާ އާންމު ރައްޔިތުން ތިބޭނީ ގައުމުގެ ހައްގުގައި މަގުމަތީގައި ކަމަށް ވިދާޅުވި އެވެ.
"އެކަމަކު ބޮޑެތި ގޮނޑިތަކުގައި ތިބޭ މީހުންނަށް އެ ފަސޭހަތައް ލިބިގެން އެ ދިޔައީ ރައީސް ޔާމީނާއި ތި ރައްޔިތުން ކުރި މަސައްކަތުން. އެހެންވީމާ އިންސާނީ ތޮބިއްޔަތަކަށް މި ވަނީ މަގާމުތަކަށް އާދެވުނީމާ އެ ކަންކަން ހަނދާން ނެތުން،" ޔާމީން ވިދާޅުވެފައިވެ އެވެ. "އެހެން ނަމަވެސް، ރައްޔިތުންގެ ލޯތްބަކީ އަދި ޖަލު ގޮޅީގައި އޮތަސް އަނބުރާ ގެންދެވޭނެ އެއްޗެއް ނޫން."
ގައުމުގެ ހައްގުގައި އެންމެ ބޮޑަށް މަސައްކަތްކުރި ލީޑަރަކީ ޔާމީން ކަމަށް އެ މަނިކުފާނު އަމިއްލަފުޅަށް ސިފަކުރައްވައި ވިދާޅުވީ ގައުމީ ހައްގުގައި މަސައްކަތް ކުރާ ނަމަ، "ގައުމުގެ ހައްގުގައި އެންމެ ބޮޑު މަސައްކަތެއް ކުރި ލީޑަރުގެ ހައްގުގައި" ތިބެން ވާނީ ރައްޔިތުންނާ އެކު މަގުމަތީގައި ކަމަށެވެ.
"ކެރެން ވާނެ މަގުމަތީގައި އުޅެން. މަގާމުތައް ލިބުނީމައެއް ނޫން ބޮޑެތި ބަސްތައް ބުނަން ވާނީ. އެ މީހާގެ އެތެރޭގައި ހުރި ކަމެއް ދައްކަން ވާނީ އޭގެ ކުރިން،" ޔާމީން މިނިވަންކުރުމަށް ގޮވާލައި މުޒާހަރާކުރާތީ، އެކަން ގާނޫނީ ހަމަތަކުގެ މަތިން ކުރުމަށް ފުރުސަތު ދެއްވުމަށް ރައީސް މުއިއްޒު ވިދާޅުވެފައި ވަނިކޮށް ދެއްވި ބަހުގެ ހަމަލާގައި ޔާމީން ވިދާޅުވި އެވެ.
ޔާމީން މިއަދު ކޯޓަށް އެ ވަޑައިގަންނަވަނީ ގިނިކަންޏާ. މިއަދަކު ނުއެއް ފެނޭ މި ދެންނެވި ލީޑަޝިޕްގެ ބޭފުޅުން ވެސް އަދި އެ މަނިކުފާނާ އެކީގައި މީގެ ކުރިން އެ ތަންތަނަށް ވަޑައިގަތް ބޭފުޅުންކޮޅެއް: ޖަމީލް
މި ނުތަނަވަސްކަމަށް ފަހު ޔާމީންގެ ނިންމެވުމުން ޗެނަލް13 އިން އިއުލާނުކުރެއްވި އިރު ޖަމީލް ވެސް ދެއްކެވީ ރައީސްކަމަށް މުއިއްޒު އިންތިހާބުވީ ޔާމީނަށް އޮތް ތާއީދުގެ ސަބަބުންކަމެވެ. ޔާމީންގެ އާއިލާ އާއި ސަޕޯޓަރުން މުއިއްޒަށް ކާމިޔާބީ ހޯދައިގެން ކުރި މަސައްކަތުގެ ވާހަކަ ދެއްކެވި އެވެ.
"އަޅުގަނޑުމެން އެންމެން ކެމްޕޭނުގައި އުޅުނިން، ވަކިން ހާއްސަކޮށް ޔާމީންގެ އާއިލާ ބޭފުޅުންނާއި އަނބިކަނބަލުން ފާތިމަތު އިބްރާހިމް،" ޖަމީލް ވިދާޅުވި އެވެ.
މުއިއްޒަށް ވޯޓު ދެނީ ޔާމީން މިނިވަންކުރަން ކަމަށް ރައްޔިތުން ބުނަމުން ދިޔަ ކަމަށާއި އެއީ ރާއްޖެއަށް ކުރިމަތިވެފައިވާ ނުރައްކާތަކުން ސަލާމަތްކުރުމަށް ދިން ވޯޓެއް ކަމަށް ވެސް ވިދާޅުވި އެވެ.
ވެރިކަން ބަދަލުވުމަށް ފަހުގައި، އެންމެ ފުރަތަމަ ކަމެއްގެ ގޮތުގައި ރައީސް މުއިއްޒު ވެސް އެންމެ ފުރަތަމަ ކުރައްވާނެ ކަމެއްގެ ގޮތުގައި ޔާމީނަށް އިންސާފު ހޯދައިދިނުން ހިމެނޭކަން ފާހަގަކުރައްވައި ޖަމީލް ދެއްކެވީ ކާމިޔާބީއަށް ފަހު ޔާމީން ބާކީކޮށްލާފައިވާ ކަމުގެ ވާހަކަ އެވެ.
"ޔާމީން މިއަދު ކޯޓަށް އެ ވަޑައިގަންނަވަނީ ގިނިކަންޏާ. މިއަދަކު ނުއެއް ފެނޭ މި ދެންނެވި ލީޑަޝިޕްގެ ބޭފުޅުން ވެސް އަދި އެ މަނިކުފާނާ އެކީގައި މީގެ ކުރިން އެ ތަންތަނަށް ވަޑައިގަތް ބޭފުޅުންކޮޅެއް،" ޖަމީލް ވިދާޅުވި އެވެ.
މުއިއްޒު ރިޔާސީ އިންތިހާބުގެ ތެރޭގައި، އެ އިންތިހާބު ކާމިޔާބު ކުރެއްވުމަށްޓަކައި، އެންމެ ގިނައިން، އެންމެ ބޮޑަށް ދެއްކެވި ވާހަކަ އަކީ ވެސް، ރައީސް ޔާމީންގެ ފިކުރާއި ރައީސް ޔާމީންގެ ތަރައްގީގެ ވާހަކަ ކަމަށާއި އެކަމަކު މިއަދު މަންޒަރު ބަދަލުވެއްޖެ ކަމަށް ވިދާޅުވި އެވެ. އޭނާ ވިދާޅުވީ އިންތިހާބު ކާމިޔާބު ވުމަށް ފަހު، މިއަދާ ހަމަޔަށް އައި އިރު، ޕީޕީއެމަށް ވޯޓު ދިން އެތައް ހާސް ރައްޔިތުންނަށް، އަދި ބުރަ މަސައްކަތްކުރި އެތައް ބަޔަކަށް ވަރަށް ބޮޑު މާޔޫސްކަމަކާއި ވަރަށް ބޮޑު ނުތަނަވަސްކަމަކާ ކުރިމަތިވެއްޖެ ކަމަށެވެ.
މުއިއްޒު ވައުދުވެވެ ވަޑައިގަތް ގޮތަށް ޔާމީން މިނިވަން ނުވާ ކަމަށް އިޝާރާތްކުރައްވަމުން ޖަމީލް ވިދާޅުވީ ކުރީގެ ރައީސް މުހައްމަދު ނަޝީދަށް ޔާމީންގެ ވެރިކަމުގައި ކުރި ޖަލު ހުކުމަށް ފަހު ރާއްޖޭން ބޭރަށް ވަޑައިގެން އުޅުއްވުމަށް ފަހު 2018 ގައި ރާއްޖެ ވަޑައިގެން އުޅުއްވީ މިނިވަނެއްގެ ގޮތުގައި ކަމަށެވެ. އެކަމަކު މިހާރު ޔާމީން މިނިވަންކުރުމުގެ ވާހަކަ ނުދައްކާތީ ޖަމީލް ވިދާޅުވީ ޕީޕީއެމްގެ ލީޑަޝިޕްގެ ބޭފުޅަކު ޔާމީންގެ ޝަރީއަތަކަށް ވެސް މިހާރު ވަޑައިނުގަންނަވާ ކަމަށެވެ.
"... މިހާރު ބޭއްވޭ ޝަރީއަތުގެ މަޖިލީހަކަށް އަޅުގަނޑުމެންނަކަށް ފެނިގެންނެއް ވެސް ނުދޭ ޕީޕީއެމް/ޕީއެންސީގެ އެ ވިދާޅުވާ ލީޑަޝިޕް އަމުދުން، މި ދެ ޕާޓީ އިސްވެ ހިންގަވަން މި ހުރިހާ ދުވަހު ހުންނެވި އަބްދުއްރަހީމް، އިންތިހާބު ނިމުނު ހިސާބުން ފެށިގެން ވެސް ފެނިފައެއް ނުވޭ ... ހަމައެކަނި ފެންނަނީ ރައީސް ޔާމީނަށް ކުޑައިމީސްވާ ގޮތަށް ތަންތަން ވާހަކަފުޅު ދައްކަވާ އަޑު."
އަމާޒަކީ ސަރުކާރަށް މަޖިލިސް ލިބުނަ ނުދިނުން!
ޔާމީނަށް ޕީޕީއެމްގެ ކޮންޓްރޯލް ގެއްލުމުން އާ ޕާޓީއެއް އުފެއްދެވުމުގެ މަސައްކަތް ފައްޓަވާ އެންމެ ބޮޑު ސަބަބަކީ ކުރިއަށް އޮތް ރައްޔިތުންގެ މަޖިލީހުގެ އިންތިހާބެވެ. ޔާމީން ބޭނުންފުޅުވާ ކަންކަން މި ސަރުކާރުގެ ތެރެއިން ކުރެވޭނެ މަގުތައް ބަންދުކޮށްފައި ވާތީ ދެން އޮތީ ޔާމީންގެ ބަސް ވިކޭ ބަޔަކު މަޖިލީހަށް އިންތިހާބުކޮށް ސަރުކާރަށް ގޮންޖެހުމަކަށްވާ ވަރު ކޮށްލުމެވެ.
ޖަމީލް ވެސް ވިދާޅުވީ ވެރިކަން ބަދަލުވުމަށް ފަހު ދެން އެންމެ މުހިންމުކަމެއްގެ ގޮތުގައި އޮތީ ރައްޔިތުންގެ މަޖިލީހުގެ އިންތިހާބު ކަަމަށެވެ.
އެންމެ މުހިންމު ކަމެއްގެ ގޮތުގައި ކުރިމަތީ އޮތީ ރައްޔިތުންގެ މަޖިލީހުގެ އިންތިހާބު. މިއީ ސިޔާސީ ގޮތުން ބުރަ ކަމެއް ... ރައްޔިތުން ބޭނުންވޭ ކުރިއަށް އޮތް މަޖިލިސް އިންތިހާބު، ރައީސް ޔާމީން ނިސްބަތްވެ ވަޑައިގަންނަވާ ޕާޓީއަށް ކާމިޔާބުވާން،" ޖަމީލް ވިދާޅުވި އެވެ.
ގައުމުގެ ކަންކަން ރަނގަޅުކުރަން ޔާމީންގެ ސިޔާސީ ވިސްނުންފުޅާ އެކު މަސައްކަތްކުރުން މުހިންމު ކަމަށް ސިފަކުރައްވައި ޖަމީލް ވިދާޅުވީ ޕީޕީއެމްގެ ތެރެއިން ޔާމީނަށް އެކަން ކުރެއްވެން ނެތް ކަމަށެވެ. ޔާމީން ޕީޕީއެމުން ވަކިވެ އެހެން ޕާޓީއެއް އުފައްދަނީ "މި ހުރިހާ ކަންތައްތަކެއް މިހެން ހުރުމާ އެކީގައި، އެ މަނިކުފާނުގެ ސިޔާސީ މަސައްކަތް ކުރިއަށް ގެންދިއުމަށް އަދި ވަކިން ހާއްސަކޮށް، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގެ މަސައްކަތް ވެސް ކުރިއަށް ގެންދިއުމަށް" ކަމަށް ޖަމީލް ވިދާޅުވި އެވެ.
"ޕީޕީއެމް މިހާރު އެ އޮތީ ވަކި ބަޔަކު ހައިޖެކްކޮށްފައި. ހިސާރުކޮށްފައި. ޕާޓީގެ އޮފީހަކަށް ނާދޭ. ޕާޓީ ހިންގާކަށް މަސައްކަތެއް ނުކުރޭ. އަދި ރައީސް ޔާމީން ޕާޓީ ހިންގަވަން ކުރައްވާ މަސައްކަތަށް ޖާގަ ދޭކަށް ބޭނުމެއް ނުވޭ"
ދެން އަނެއްކާވެސް އާ އެޕިސޯޑެއް ފެށޭނީ ޔާމީން 11 އަހަރަށް ޖަލަށް ލުމަށް ކޮށްފައިވާ ހުކުމްގެ އިސްތިއުނާފުގައި ހައި ކޯޓުން ނިމޭ ގޮތެއްގެ މައްޗަށެވެ. ޔާމީން މިނިވަން ވެއްޖެ ނަމަ ސީދާ ޔާމީން ހަނގުރާމައިގެ މައިދާނަށް ނުކުންނަވާނެ އެވެ. ޖަލު ހުކުމް ދަމަހައްޓައިފި ނަމަ އެއީ ސަރުކާރުގެ ނުފޫޒު ކަމަށް ބުނެ ފާޑުކިޔުމުގައި ދެމި ތިބޭނެ އެވެ. އާ ވެރިކަމަށް ހަފްތާއެއް ތެރޭ ރަސްމީކޮށް ހަނގުރާމަ ފެށީ އެވެ.