ކުރީގެ ސިއްހީ ހިދުމަތްތެރިން އަލުން ހިދުމަތަށް ނެރެން ދިރާސާއެއް ހަދަނީ

ސިއްހީ ދާއިރާއަށް ކުރިން ހިދުމަތްކޮށް، އެކި ސަބަބުތަކާ ހުރެ ވަޒީފާއިން ދުރުގައި ތިބި ތިބި ސިއްހީ ހިދުމަތްތެރިން އަލުން މަސައްކަތަށް ނެރެން ބާރު އެޅުމަށް ދިރާސާއެއް ހަދަން ނިންމާފައިވާ ކަމަށް ހެލްތް މިނިސްޓްރީން ބުނެފި އެވެ.

މިނިސްޓްރީން ކުރި އިއުލާނެއްގައި ބުނީ އެ ދިރާސާ ހަދަނީ ހިދުމަތުން ދުރުވެފައިވާ މީހުން އަލުން ހިދުމަތްކުރުމުގެ މަގު ތަނަވަސްކޮށްދިނުމަށް ކަމަށެވެ. ކުރީގެ ސަރުކާރުތަކުގައި ގާނޫނަށް ގެނައި ބަދަލުތަކާ ހެދި ވެސް ސިއްހީ ހިދުމަތްތެރިންގެ ތެރެއިން ބައެއް މީހުން ދާއިރާ ދޫކޮށްލަން ޖެހުނެވެ.

އެ ދިރާސާގައި ބައިވެރިވާން ޝައުގުވެރިވާ ފަރާތްތަކުން މި މަހުގެ 19 ވަނަ ދުވަހު ކުރިން ފޯމެއް ފުރިހަމަ ކުރަން ހެލްތު މިނިސްޓްރީން އެދިފައި ވެ އެވެ. އިތުރު މައުލޫމާތު ހޯދަން 3014407 ނުވަތަ 3014419 ނަމްބަރަށް ގުޅަން ވަނީ އެދިފަ އެވެ.

ކުރިން ސިއްހީ ދާއިރާއަށް މަސައްކަތް ކުރި މީހުން އަލުން ހިދުމަތަށް ނެރުމަށް ދިރާސާއެއް ހަދާއިރު، މިދިޔަ ސަރުކާރުގައި ވެސް ވަނީ މީގެ އަހަރުތަކެއް ކުރިން ރަށްރަށުގެ ސިއްހީ ކަންކަމުގައި ޕްރައިމަރީ ހެލްތް ކެއާ ނުވަތަ ހެލްތު ވޯކަރުން އިސް ސަފުގައި މަސައްކަތްކުރި ގޮތަށް އެކަން ބަދަލުކުރަން ނިންމައި އެ މަސައްކަތް ފަށައިފަ އެވެ.

އެންމެ ފުރަތަމަ އެ މަސައްކަތް ފަށާފައި ވަނީ ފ. އަތޮޅުގަ އެވެ.