ނަޝީދު ސިޔާސީ ކަންކަމުން މި ވަގުތަށް ދުރަށް ޖެހިވަޑައިގެންފި

ކުރިއަށް އޮތް އަހަރުތަކަކަށް ސިޔާސީ ކަންކަމުން ދުރަށް ޖެހިވަޑައިގަންނަވަން ނިންމަވާފައިވާ ކަން ކުރީގެ ރައީސް މުހައްމަދު ނަޝީދު އިއުލާނުކުރައްވައިފި އެވެ.

އެ މަނިކުފާނުގެ އޮފީސް މެރުވެރިކޮށް ނެރުއްވި ބަޔާނެއްގައި ނަޝީދު ވިދާޅުވީ އެ މަނިކުފާނުގެ ސިޔާސީ ހަޔާތުގައި އެންމެ ބޮޑު މަސައްކަތެއް ކުރެއްވީ ގިނަ ޕާޓީ އެކުލެވޭ ވެރިކަމުގެ ނިޒާމެއް ފައްކާ ކުރުމަށެވެ.

"މިއަދު އަޅުގަނޑު މި ލިޔާ ބަޔާނުގެ ބޭނުމަކީ، އަހަރުތަކަކަށް އަޅުގަނޑު ސިޔާސީ މަސައްކަތުން ދުރުވާ ކަމަށް ދެންނެވުމެވެ،" ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަނުކުރައްވާނެ ކަން ވެސް އިއުލާނުކުރައްވައި ނަޝީދު ވިދާޅުވި އެވެ.

ނަޝީދު ވިދާޅުވީ އެ މަނިކުފާނުގެ މަސައްކަތުގެ ތެރޭގައި ރާއްޖެއަކީ އިސްލާމީ އުސޫލުތަކުގައި ހިފަހައްޓައި، އިންސާނީ ހައްގުތަކަށް އިހުތިރާމުކުރާ އަދި ރައްޔިތުންނަށް ދުލާ ގަލަމުގެ މިނިވަންކަން ކަށަވަރުކުރެވިފައިވާ ތަނަކަށް ހެދުމަށް މަސައްކަތް ކުރެއްވި ކަމަށެވެ.

"އަޅުގަނޑު ގަބޫލުކުރާ ގޮތުގައި މިހާރު މިކަންކަން ވަނީ ކުރިއަށް ވުރެ ބޮޑަށް އަށަގަނެފައި."

އެ ބަޔާނުގައި ނަޝީދު ވިދާޅުވީ އެމަނިކުފާނުގެ ސިޔާސީ މަސައްކަތުގައި ނުހަނު އަނިޔާ އާއި ހިތާމަ އާއި އެކަނިވެރިކަން ކުރިމަތިވިޔަސް އެކަމުގައި އުފަލާފައި ހިތްހަމަޖެހުން ވެސް ލިބިވަޑައިގެންފައިވާ ކަމަށެވެ.

"ޖަލުގެ އަނިޔާ އާއި އެތައް ފަހަރަކު ބަންދު ތަހަންމަލުކުރަންޖެހުނު. އަޅުގަނޑުގެ އާއިލާއާ ދުރުގައި އުޅެންޖެހި މުޅި ޒާތީ ހަޔާތް ބަރުބާދުވެފައި. ބޮމުގެ ހަމަލާއިން މަރުގެ ތުންފަތް މައްޗަށް ހުށަހެޅުނެވެ،" ނަޝީދުގެ ބަޔާނުގައިވެ އެވެ.

ނަޝީދު ވިދާޅުވީ އެ މަނިކުފާނުގެ ރައީސް ކަމާއި ރައްޔިތުންގެ މަޖިލީހުގެ ރައީސްގެ މަގާމު އަދާކުރެއްވުމުގައި ރައްޔިތުންނަށް ވީވަރުން ހިދުމަތްކޮށްދެއްވާފައިވާ ކަމަށެވެ. އަަދި ރައީސް ކަމުގެ މަގާމުގައި އެމަނިކުފާނު އެންމެ ބޮޑަށް މަސައްކަތް ކުރެއްވީ ރާއްޖޭގެ ރައްޔިތުންނަށް އިޖުތިމާއީ ރައްކާތެރިކަން ހޯދައިދިނުމުގެ ނިޒާމެއް ގާއިމުކުރުމާއި ރާއްޖޭގައި ޓެކްސްގެ ނިޒާމެއް ގާއިމުކުރުމަށް ކަމަށް ވިދާޅުވި އެވެ.

އެ ދެ ކަންތައް ވެސް އެންމެ ފުރިހަމައަށް ކޮށްދެވިފައިވާ ކަމަށް ގަބޫލުކުރައްވައި ކަމަށް ވިދާޅުވެ އެ ބަޔާނުގައި ނަޝީދު ވަނީ ދައުލަތުގެ ހަރަދަށް ޒިންމާވުމާއި ވެރިންގެ ހިޔާނާތްތެރިކަމުން ރާއްޖެ މިންޖުކުރުމަށް ކުރި އުއްމީދު އަދި ހަގީގަތަކަށް ބަދަލުނުވާ ކަމުގެ ބޮޑު ހިތާމަ އެބަ އޮތް ކަން ވެސް ހާމަކުރައްވާފަ އެވެ.

"އަޅުގަނޑުގެ އުއްމީދަކީ ދިވެހި ސަރުކާރާއި ވެރިން ޖަވާބުދާރީކުރުވުމުގެ މަސައްކަތް އަންނާން އޮތް ޖީލުތަކުގެ މީސްތަކުން ކުރުމެވެ،" އެ މަނިކުފާނު ވިދާޅުވި އެވެ.

ނަޝީދު ވިދާޅުވި ގޮތުގައި، ރާއްޖެއަކީ ނުހަނު ނާޒުކު ތިމާވެއްޓެއް އެކުލެވޭ ގައުމަކަށްވެފައި، ރާއްޖޭގެ ތިމާވެށި ރައްކާތެރިކުރުމަށް މަޖިލީހުން އެކުލަވާލެވުނު ގާނޫނުތައް ފާސްވުމުން އުފާވާ ކަމަށާއި އެކަމަކު ތަރައްގީގެ ނަމުގައި ފަރުތަކާއި ތިމާވެއްޓަށް ގެއްލުން ލިބުމަކީ ހިތާމަކުރައްވާ ކަމެކެވެ.

ބަޔާނުގައި ނަޝީދު ވިދާޅުވީ 2009 ވަނަ އަހަރު ރާއްޖެ އާއި އެހެން 11 ގައުމަކާ އެކު އުފެއްދި ކްލައިމެޓް ވަލްނަރަބަލް ފޯރަމަށް މިހާރު 68 ގައުމަކުން އިތުރުވެފައިވާ ކަމަށާއި އެ ޖަމާއަތް މިހާރު އިންޓަ ގަވަމެންޓަލް ޖަމާއަތަކަށް ބަދަލުވެފައިވާ ކަމަށެވެ.

އަދި އެންމެ ފަހުން ބޭއްވި އދ. ގެ ތިމާވެށީގެ ކޮންފަރެންސްގައި އެ ޖަމާއަތުގެ ސެކްރެޓަރީ ޖެނަރަލްގެ މަގާމާ ނަޝީދު ހަވާލުވުމަށް އެ ކޮންފަރެންސްގެ ރިޔާސަތު ބެލެހެއްޓި ގާނާގެ ރައީސް އެދިވަޑައިގެންފައިވާތީ އެ ފުރުސަތު ގަބޫލުކުރައްވަން ނިންމަވާފައިވާ ކަމަށް ވެސް އެ ބަޔާނުގައި ވިދާޅުވި އެވެ.

"އަޅުގަނޑު ގަބޫލުކުރާ ގޮތުގައި މި ޖަމާއަތުގެ ވަޒީފާގައި ހުރެ އަޅުގަނޑަށް ރާއްޖެއަށް ހިދުމަތްކޮށްދެވޭ މިންވަރު އިންތިހާއަށް ތަނަވަސްވާނެ އެވެ،" އަންނަ ޖެނުއަރީ މަހު، އެ މަގާމާ ހަވާލުވާން ނިންމާފައިވާކަން ފާހަގަކުރައްވައި ނަޝީދު ވިދާޅުވި އެވެ.

އެ ބަޔާނުގައި ނަޝީދު ވަނީ ސިޔާސީ މަސައްކަތުގައި ހޭދަ ކުރެއްވި މުއްދަތުގައި އެހީތެރިކަން ފޯރުކޮށްދިން ހުރިހާ ފަރާތްތަކަށް ޝުކުރު އަދާކުރައްވައިފަ އެވެ.