ދަނބިދޫ ބޯޓެއް ވެސް މުދަލާ އެކު ފަރަށް އަރައިފި

ލ. ދަނބިދޫ ފަރަށް އެރި ބޯޓު، ފުން ކުރުމާއި އެ ބޯޓުގައި ހުރި މުދާތައް ސަލާމަތް ކުރުމަށް އެ ރަށޫގެ އެހެން ދޯންޏެއް އެހީތެރިވަނީ.-- ފޮޓޯ: ކައުންސިލް

ފާތިމަތު އަޖްފާން، މިހާރު

13 ޑިސެމްބަރ 2023 - 12:16

4 comments

ލ. ދަނބިދޫ އާއި މާލެއާ ދެމެދު ދަތުރުކުރާ ބޯޓެއް ފަރަށް އަރައިފި އެވެ.

ދަނބިދޫ ކައުންސިލުން ބުނީ ލ.ބެންމާފުށި ފަރަށް ބޯޓު އެރީ ރޭ ފަތިހު ކަމަށެވެ. ބޯޓުގައި ހުރި މުދާތައް ސަލާމަތްކުރުމުގެ މަސައްކަތް ދަނބިދޫ ރައްޔިތުންގެ އެހީތެރިކަމާ އެކު ކުރަމުން އަންނަ ކަމަށް ވެސް ކައުންސިލުން ބުންޏެވެ.

އެ ރަށުން ވާހަކަ ދެއްކި މީހަކު ބުނީ އެ ބޯޓަކީ އާންމުކޮށް ވިޔަފާރި މުދާ އުފުލާ ބޯޓެއް ކަމަށެވެ. އޭނާ ބުނީ ބޯޓުގައި މަސައްކަތްކުރަނީ ތިން މީހުން ކަމަށާއި މި ހާދިސާގައި މީހަކަށް އަނިޔާއެއް ނުވާ ކަމަށެވެ.

ބޯޓުގައި ހުރީ ކިހާ މުދަލެއް ކަމެއް އަދި ލިބުނު ގެއްލުމުގެ ތަފްސީލެއް އަދި ނުލިބެ އެވެ.

ފަރަށް އެރި ދަނބިދޫ ބޯޓަށް އެހީވާން އެ ރަށުން ދިޔަ ދޯނިތައް ބޯޓު ކައިރީގައި. -- ފޮޓޯ: ދަނބިދޫ ކައުންސިލް

މާލެ އާއި ކުޅުދުއްފުއްޓާ ދެމެދު ދަތުރުކުރާ ބަހާދަރު ބޯޓު ވެސް ރޭ ފަރަށް އަރައިގެން އެ ފުންކުރުމުގެ މަސައްކަތް އަންނަނީ ކުރަމުންނެވެ. ނ. ދެކެނަންފަރަށް އެ ބޯޓު އެރިއިރު އޭގައި 52 ފަސިންޖަރުން ތިއްބެވެ. އެ އެންމެން މިހާރު ވަނީ ސަލާމަތްކޮށްފަ އެވެ.