ރައީސް ޑރ. މުހައްމަދު މުއިއްޒުގެ ކެބިނެޓުގެ ބައެއް ވަޒީރުންނަށް ރުހުން ނުދިނުމަށް ދަ ޑިމޮކްރެޓްސް އިން ނިންމައިފި އެވެ.
މަޖިލީހުގެ ދައުރުން ބޭރުން މިއަދު ބާއްވާ ޖަލްސާގައި މިނިސްޓަރުންނަށް ރުހުން ދިނުމުގެ މައްސަލަ މިއަދަށް ވަނީ އެޖެންޑާ ކޮށްފަ އެވެ.
މަޖިލީހުގެ ކުރީގެ ރައީސް މުހައްމަދު ނަޝީދު އިސްވެ އުފެއްދެވި ޑިމޮކްރެޓްސް އިން މިއަދު ނެރުނު ބަޔާނެއްގައި ބުނީ އެ ޕާޓީން އިންތިހާ އަށް ކަންބޮޑުވާ ސިޔާސަތުތަކެއް ރައީސް މުއިއްޒުގެ ސަރުކާރުން ގެންގުޅޭ ކަމަށެވެ. ބައެއް ވަޒީރުންނަށް ރުހުން ނުދޭން ނިންމީ އެހެންވެ ކަމަށް ބަޔާނުގައިވެ އެވެ.
އެކަމަކު ރުހުން ނުދޭން ނިންމީ ކޮން ވަޒީރުންތަކަކަށް ކަމެއް އެ ޕާޓީން އަދި އާއްމެއް ނުކުރެ އެވެ.
"..އިދިކޮޅު ޕާލަމެންޓްރީ ގްރޫޕެއްގެ ގޮތުން މި ޕާލަމެންޓްރީ ގްރޫޕުން އަމަލުކުރާނީ ފުރިހަމަ ޒިންމާދާރުކަމާއި ތެދުވެރިކަމާ އެކުގައި. އެގޮތުން ވަޒީރުންނަށް ރުހުން ދިނުމުގައި ވެސް މި ޕާލަމެންޓްރީ ގްރޫޕުން އަމަލުކުރާނީ އެގޮތުގެމަތިން،" މަޖިލީހުގައި 13 މެމްބަރުން ތަމްސީލްކުރައްވާ ޕާޓީގެ ބާޔާނުގައި ބުނެފައިވެ އެވެ.
ބައެއް މިނިސްޓަރުންނަށް ރުހުން ނުދޭން ޑިމޮކްރެޓްސް އިން ނިންމި އިރު މަޖިލީހުގެ މެޖޯރިޓީ އޮތް އެމްޑީޕީގެ ގިނަ މެންބަރުން ވެސް ވަނީ ބައެއް މިނިސްޓަރުންނަށް ރުހުން ނުދޭނެ ކަމަށް ބުނެފަ އެވެ.
އެނގިފައިވާ ގޮތުގައި އެ ޕާޓީން މިއަދު 10:00 ގައި ޕީޖީ ބައްދަލުވުމެއް ބޭއްވުމަށް ފަހު މިނިސްޓަރުންނަށް ރުހުން ދިނުމުގެ މައްސަލާގައި ގޮތެއް ނިންމާނެ އެވެ.
އެމްޑީޕީ އާއި ޑިމޮކްރެޓްސް އިން ވަނީ މަޖިލީހުގައި ގުޅިގެން މަސައްކަތް ކުރުމަށް ވެސް ނިންމައިފަ އެވެ. އެހެންކަމުން ޑިމޮކްރެޓްސް އިން ބައެއް ވަޒީރުންނަށް ރުހުން ނުދޭން ނިންމި ނިންމުމަށް އެމްޑީޕީގެ ތާއީދު ލިބޭނެ ކަމަށް ބެލެވެ އެވެ.