ނުކުޅެދުންތެރިކަން ހުންނަ ކުދިންނަށް އިސްކަންދީ، ރާއްޖެ އާއި ބޭރު ގައުމުތަކުގައި މަތީ ތައުލީމު ހާސިލްކުރަން ސްޓޫޑެންޓް ލޯނުގެ ގޮތުގައި 500 ޖާގަ މިއަދު ހުޅުވާލައިފި އެވެ.
ހަޔާ އެޑިޔުކޭޝަން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ޑރ. މަރިޔަމް މާރިޔާ ވިދާޅުވީ ރާއްޖެއަށް ބޭނުންވާ ދާއިރާތަކުން މީހުން ބިނާ ކުރުމަށް ފަސް އަހަރަށް ބަހާލައިގެން ސަރުކާރުން ރާވާފައިވާ ކަމަށެވެ.
މިއަދު ހުޅުވާލި 500 ލޯނަކީ އޭގެ ތެރޭގައި ހިމެނޭ ސްކީމެއް ކަމަށް މިނިސްޓަރު ވިދާޅުވި އެވެ. ޑިޕްލޮމާއިން ފެށިގެން ޕީއެޗްޑީ ފެންވަރަށް ކިޔެވުމުގެ ފުރުސަތު މި ސްކީމުގައި ލިބެ އެވެ.
އެންމެ މުހިއްމު ކަމެއްގެ ގޮތުގައި މިނިސްޓަރު ފާހަގަކުރެއްވީ، މަތީ ތައުލީމް ހާސިލްކުރަން ބޭނުންވާ ހާއްސަ އެހީއަށް ބޭނުންވާ ދަރިވަރުންނަށް އިސްކަންދީފައި ވުމެވެ.
ހާއްސަ އެހީއަށް ބޭނުންވާ ކުދިންނަށް މީގެ ކުރިން ވެސް ލޯނު ދޫކުރެ އެވެ. ނަމަވެސް އޭގެ ތެރޭގައި ލޯނުގެ އިތުރަށް ހިނގާ ހަރަދެއް ނުހިމެނެ އެވެ.
"މި ލޯން ސްކީމުގައި ނުކުޅެދުންތެރިކަން ހުންނަ ކުދިންނަށް ހާއްސަ ކުރެވިފައިވާ ފުރުސަތު ތަކެއް ހުޅުވާލާނެ. މި ސްކީމަކީ ވަރަށް އިންކްލޫސިވްކޮށް ހުޅުވާލެވިގެންދާ ފުރުސަތެއް،" އޭނާ ވިދާޅުވި އެވެ.
މިނިސްޓަރު ވިދާޅުވި ގޮތުގައި ހާއްސަ އެހީއަށް ބޭނުންވާ މީހުން މަތީ ތައުލީމު ހާސިލް ކުރުމަށް މީގެކުރިން އޮތް އެންމެ ބޮޑު ގޮންޖެހުމަކީ އެކަމަށް ދާ ހަރަދުތަކަކީ އެ ހުންނަ ނުކުޅެދުންތެރި ކަމަށް ހާއްސަކޮށް ދެވޭ ހަރަދުތަކަކަށް ނުވުމެވެ.
"ސަރުކާރުން ނިންމާފައި ވަނީ ހާއްސަ އެހީއަށް ބޭނުންވާ ކުދިންގެ ތެރެއިން ކޮންމެ ކުއްޖެއްގެ ހުންނަ ނުކުޅެދުންތެރި ކަމަށް ރިއާޔަތްކޮށް، ޕރޮގްރާމް [ކިޔެވުން] ފުރިހަމަ ކުރުމަށް އިތުރު އެހީތެރިކަމެއް ބޭނުންވާ ހާލަތުގައި އެކަމަށް މަގުފަހިވާނެ އިތުރު ހަރަދުތައް ދިނުމަށް،" މިނިސްޓަރު ވިދާޅުވި އެވެ.
އެފަދަ ކުދިންނަށް ބޭނުންވާ އިތުރު ހަރަދުތައް ދިނުމަށް ސަރުކާރުން ނިންމި މައިގަނޑު ސަބަބަކީ އެފަދަ ކުދިން ކިޔެވުން ފުރިހަމަ ކުރުމަށް ޝާމިލް ނުކުރެވޭނެތީ ކަމަށް ވެސް މިނިސްޓަރު ވިދާޅުވި އެވެ.
ހަޔާ އެޑިޔުކޭޝަންގެ ސްޓޭޓް މިނިސްޓަރު އަހުމަދު ޝަފީއު ވިދާޅުވި ގޮތުގައި ހާއްސަ އެހީއަށް ބޭނުންވާ ކުދިންނަށް ކުރިން ދޫކުރި ލޯނުތަކުން ފާހަގަވި ކަމަކީ ލޯނުގެ ފުރުސަތު ހުޅުވާލި ނަމަވެސް އެ ކުދިންނަށް އިތުރު ހަރަދުތައް ހިނގާ ކަމެވެ.
"މިސާލަކަށް ބައެއް ކުދިންނަށް އެހީތެރިއެއް އެބަ ބޭނުންވޭ. ނޫނީ އެ ކުދިންނަށް ބޭނުންވާ ހާއްސަ އިންތިޒާމުތަކެއް އެބަ ހަޖައްސަން ޖެހޭ. ކުރިން ކަނޑައަޅާފާއި އޮންނަނީ ހަމަ އެހެން ކުދިންނަށް ލޯނު ދޫކުރާ އުސޫލުން ދޭން،" އޭނާ ވިދާޅުވި އެވެ.
މަތީ ތައުލީމުގެ ފުރުސަތު ކިޔަވަން ލިބުނު ނަމަވެސް ހާއްސަ އެހީއަށް ބޭނުންވާ ކުދިންނަށް އެ ލޯނުގެ ބޭނުން ހިފުމަށް ގޮންޖެހުންތައް ކުރިމަތިވާކަން ފާހަގަ ކުރައްވައި ޝަފީއު ވިދާޅުވީ މިފަހަރު ލޯނު ދޫކުރަން ނިންމާފައި ވަނީ ކޮންމެ ކުއްޖެއްގެ ހުރި ނުކުޅެދުންތެރިކަން ބެލުމަށް ފަހު ކަމަށެވެ.
"ކުރިއާލާ އެ ކުއްޖެއްގެ ހުރި ނުކުޅެދުންތެރި ކަމުގެ ބާވަތް ނޭނގޭ ކަމަށް ވަންޏާ، ދެވޭނެ އެހީތެރިކަމެއް އަޅުގަނޑުމެންނަކަށް ނޭނގޭނެ. މެރިޓަށް ބޭސްކޮށްގެން މި ލޯނު ވެސް މި ދޫކުރަނީ. އެކަމަކު އެ ކުދިންނަށް ހާއްސަ ފުރުސަތު ތަކެއް ކަނޑައަޅާފަ މި ވަނީ،" އޭނާ ވިދާޅުވި އެވެ.
ނަމަވެސް އެ 500 ލޯނުގެ ތެރެއިން ހާއްސަ އެހީއަށް ބޭނުންވާ ކުދިންނަށް ދޫކުރާނީ ކިތައް ލޯނުތޯ ކަނޑައެޅުމުގެ މަސައްކަތް ޖެންޑާ މިނިސްޓްރީއާ ގުޅިގެން އެ މަސައްކަތް ކުރަމުން ގެންދާ ކަމަށް އޭނާ ވިދާޅުވި އެވެ.
މިއަދު ހުޅުވާލި އެ ލޯނުގެ ފުރުސަތުތަކާ އެކު ލޯނަށް އެދުމުގެ އުސޫލު ވެސް ވަނީ އާންމު ކޮށްފަ އެވެ.
މީގެ ކުރީ ސަރުކާރު ތަކުން ވެސް ކިޔެވުމަށް ލޯނު ދޫކުރަމުން ދިޔަ ގައުމުތަކުގައި ކިޔަވަން ހުޅުވާލި ފުރުސަތުތަކަށް އަންނަ މަހުގެ 21ގެ ނިޔަލަށް އެޕްލިކޭޝަން ހުށަހެޅޭނެ ކަމަށް ހަޔާ އެޑިޔުކޭޝަން މިނިސްޓްރީން ބުންޏެވެ.
ލޯނަށް އެޕްލިކޭޝަން ހުށަހެޅުމުން މިނިސްޓްރީން ބެލުމަށް ފަހު ރަނގަޅު ކުރަންޖެހޭ ނަމަ، އެކަން އަންގައި ރަނގަޅު ކުރުމަށް ފުރުސަތު ދޭނެ އެވެ. ދެވަނަ ފުރުސަތުގެ އެޕްލިކޭޝަން ހުށަހެޅުމުގެ ސުންގަޑިއަކީ އޭޕްރީލް 25 އެވެ.