ޝަރަފްވެރި އެކަޑެމީ އެވޯޑްސް ނުވަތަ އޮސްކާ އެވޯޑް ހަފުލާގައި މިފަހަރު ވެސް ތަފާތު ކަންތައްތަކެއް ފެނިގެން ދިޔަ އެވެ. އެންމެ މޮޅު ފިލްމުގެ މަގާމު، އޮޅިގެން އެހެން ފިލްމަކަށް ދިނުމަށް ފަހު "މޫންލައިޓް" އަށް ދިނުމާއި އެމާ ސްޓޯންއަށް އެންމެ މޮޅު ބަތަލާގެ އެވޯޑް ލިބުމުގެ އިތުރުން ރެޑް ކާޕެޓުން ފެނުނު ހިތްގައިމު އަދި ހުތުރު ހެދުންތައް ވެސް ހާއްސަ އެވެ.
މިއަދު ބޭއްވި 89 ވަނަ އޮސްކާ ހަފުލާގެ ރަތް ދޫލަ މަތިން ހޮލީވުޑްގެ އެންމެ މަޝްހޫރު ތަރިން، ތަފާތު އެކި ޒާތުގެ ހެދުންތައް ލައިގެން ހިނގާލި އެވެ. މިފަދަ ހަފުލާއަކަށް ދާ މަޝްހޫރި މީހަކު ލައިގެން ހުންނަ ހެދުމަށް ގިނަ ބައެއްގެ ސަމާލުކަން ލިބެ އެވެ.
މިފަހަރު އެންމެ ރީއްޗަށް އަދި އެންމެ ހުތުރުކޮށް ހެދުން އަޅައިގެން އެވޯޑް ހަފުލާއަށް ދިޔަ ތަރިންނަކީ ކޮބައިހެއްޔެވެ؟
އެންމެ ހިތްގައިމުކޮށް ހެދުން ލައިގެން ތިބި ތަރިން
އެންމެ މޮޅު ބަތަލާގެ މަގާމު ލިބުނު އެމާ ސްޓޯން ލައިގެން ހުރި ހެދުމަކީ ވެސް ސްޓައިލް އެވޯޑެއް ލިބެން އެކަށީގެންވާ ހެދުމެކެވެ. ރަން ކުލައިގެ އެމްބްރޮއިޑަރީ އަދި ފްރިންޖު ބޭނުންކޮށްގެން ފަރުމާކޮށްފައިވާ މި ހެދުމަކީ ޑިޒައިނާ ބްރޭންޑު ޖިވޯންޝީގެ ޑިޒައިނެކެވެ. އޭނާ މިހެދުމާ އެކު އިސްތަށިގަނޑު ސްޓައިލްކޮށް، މޭކަޕްކޮށްފައި ވަނީ ވަރަށް ސާދާ ގޮތަކަށެވެ.
ބޮލީވުޑްގައި މަގުބޫލުކަން ހޯދުމަށް ފަހު މިހާރު ހޮލީވުޑްގައި ވެސް މަޝްހޫރުވަމުން އަންނަ ބަތަލާ ޕްރިޔަންކާ ޗޯޕްޅާ އޮސްކާ މިހަފްލާއަށް ލައިގެން ހުރީ ރިހި ކުލައިގެ ގަޔަށް ފިޓު ގައުނެކެވެ. އެއީ ޑިޒައިނާ ރެލްފް އެންޑް ރުއްސޯގެ އުފެއްދުމެކެވެ. އިސްތަށިގަނޑު ފަންކޮށް ފަހަތަށް ދޫކޮށްލައިފައި ހުއްޓެވެ. އެ ހެދުމާ ގުޅުވާލާފައި ވަނީ ރިހި ގަހަނާ އެވެ.
ތަރާޖީ އަދި ބްރީ ލާސެންގެ ކަޅު ކުލައިގެ ވެލްވެޓް ގައުން ވަރަށް ސާދާ ވެފައި ހިތްގައިމެވެ. ގޮތް ބޮޑު ހެދުމެއްގެ ބަދަލުގައި ސާދާ ހެދުމެއް ލުމުން ވަރަށް ފުރިހަމަވާނެކަން މި ދެ ތަރިން ދައްކުވައިދެ އެވެ. ކްރީމް ކުލައިގެ ގައުންތައް މިހަފުލާގައި ގިނަ އެވެ. އެގޮތުން، ނިކޯލް ކިޑްމަންގެ އަރްމާނީ ގައުން އަދި މޮޑެލް ކްރިސީ ޓީގަންގެ ޒުހެއިރް މުރާދް ގައުން ވަރަށް ޗާލެވެ.
ފިރިހެން ތަރީންގެ ތެރެއިން އެންމެ ނަލަކޮށް ސޫޓު ލައިގެން ހުރީ މޫންލައިޓްގެ ބަތަލު މަހަރްޝާލާ އަލީ އެވެ.
އޭނާގެ ކަޅު ސޫޓު ފަރުމާކޮށްފައި ވަނީ އިޓަލީގެ މަޝްހޫރު ޑިޒައިނަރެކެވެ. ކަޅު ސޫޓާ އެކު، ކަޅު ބޯޓައިއެއް އަދި ކަޅު ގަމީހެއް ގުޅުވާލައިފައި އެވެ.
އެންމެ ހުތުރު ހެދުން ލައިގެން ތިބީ ކޮން ތަރިތަންނެއް؟
އެތައް މިލިއަން ބައެއްގެ ސަމާލުކަން ހުއްޓޭ މިފަދަ ބޮޑު ހަފުލާއަކަށް ދާއިރު ލައިގެން ހުންނަ ހެދުމަކީ ފުރިހަމަ ހެދުމަކަށް ވާން ޖެހެ އެވެ. ޚިޔާރުކުރާ ހެދުން އެ ތަރިއެއްގެ ހަށިގަނޑާއި އެމުނާސަބަތާ ނުގުޅޭ ގޮތަށް ލައިގެން ތިބޭތަން އާއްމުކޮށް ފެނެ އެވެ. އެގޮތުން މިއަހަރު ގިނަ ބައެއްގެ ފާޑުކިޔުން ރައްދުވި އެކަކީ އެކްޓްރެސް ލެޒްލީ މާން އެވެ.
ގަދަ ރީނދޫ ކުލައިގެ، ސިންޑެރެއްލާ ސްޓައިލްގެ ގައުނެއް ލައިގެން ހުރި ލެޒްލީ ހީވަނީ ބިއުޓީ އެންޑް ދަ ބީސްޓުގެ ބެލްއަށް ވާން މަސައްކަތްކޮށްފައި ހުރި ހެންނެވެ. ނަމަވެސް، މިހެދުމުގައި ބޭނުންކޮށްފައިވާ ރޫޖެހިފައިވާ ފޮތިގަނޑު އަދި ފަރުމާކޮށްފައި ސްޓައިލުގެ ސަބަބުން އެންމެ ހުތުރު ހެދުންތަކުގެ ތެރޭގައި މި ހެދުން ވަނީ ހިމެނިފަ އެވެ.
ފިފްޓީ ޝޭޑްސް އޮފް ގްރޭގެ ބަތަލާ ޑަކޯޓާ ޖޮންސަންގެ ރަން ކުލައިގެ ގުޗީ ހެދުން އޭނާއަކާ ނުގުޅެ އެވެ. އިހުގެ ސްޓައިލަކަށް ފަރުމާކޮށްފައިވާ މި ދިގު ހެދުމާ އެކު ހުތުރު ސްޓައިލަކަށް ޖަވާހިރު ޖެހި ފަށެއް ގުޅުވާފައިވެ އެވެ.
އެކްޓްރެސް ޖެނިފާ ގުޑްވީން ރަތް ދޫލައާ ގުޅުވާލަން ކަމަށް ހިތައި ލައިގެން ހުރި ރަތް ލޭސް ހެދުމަކީ ގޮތް ބޮޑު އަދި ހުތުރު ހެދުމެކެވެ. ލަވިންގެ ބަތަލާ ރުތު ނެގާ އަކީ ވަރަށް ހުނަރުވެރި ބަތަލާއެކެވެ. ރުތު ލައިގެން ހުރީ ވެލެންޓީނޯ ބްރޭންޑުގެ ރަތް ކުލައިގެ ދިގު ހެދުމެކެވެ. އެކަމަކު އޭނާ ޖައްސާފައި ހުރި މޭކަޕް އަދި ލައިގެން ހުރި ހެދުމަކީ މިފަދަ ބޮޑު މުނާސަބަތަކަށް އެކަށީގެންވާ ސްޓައިލެއް ނޫނެވެ. މިއަށްވުރެ މަޑު ކުލައެއްގެ ހެދުމެއް އަދި ސާދާ މޭކަޕެއް ހިޔާރު ކުރިނަމަ ރަނގަޅުވީހެވެ.
ބަތަލާއިންގެ އިތުރުން ބަތަލުން ވެސް، މި ކެޓަގަރީގައި ހިމެނިގެން ދިޔަ އެވެ. އެގޮތުން، ރީތި ހޮލީވުޑް ތަރީންގެ ތެރޭގައި ހިމެނޭ ރާޔަން ގޮސްލިން އަކީ ކޮންމެ ޒާތެއްގެ ހެދުމެއް ލިޔަސް ރީތި މީހެކޭ ބުނެވިދާނެ އެވެ. ނަމަވެސް، މިފަހަރުގެ ހަފުލާއަށް ރާޔަން ލައިގެން ހުރި ކަޅު ޓަކްސީޑޯ އާއި ހުދު ގަމީސް ސްޓައިލް މުނާސަބެއް ނޫނެވެ. ގިނަ ފާޑުކިޔުންތެރިން ބުނާގޮތުގައި، ރާޔަން ލައިގެން ހުރި "ރަފްލްޑް" ގަމީސް ހީވަނީ ޕްރޮމް އިވެންޓަކަށް ހާއްސަ ސްޓައިލެއް ހެންނެވެ.
