ބޮލީވުޑްގެ ކުޅަދާނަ ޑައިރެކްޓަރު/ޕްރޮޑިއުސަރު ކަރަން ޖޯހަރްގެ މަންމަ ހީރޫ ޖޯހަރުގެ ހާލު ދެރަވެގެން ހޮސްޕިޓަލުގައި އެޑްމިޓުކޮށްފި އެވެ.
އުމުރުން 81 އަހަރުގެ ހީރޫއަކީ ވެސް ފިލްމު ޕްރޮޑިއުސަރެކެވެ.
ރިޕޯޓްތައް ބުނި ގޮތުގައި، އިންޑިއާގެ މުމްބާއީގައި ހުންނަ އަމްބާނީ ހޮސްޕިޓަލުގައި ހީރޫ އެޑްމިޓްކުރީ މިދިޔަ ހުކުރު ދުވަހު އެވެ. އެކަމަކު، އޭނާ އެޑްމިޓްކުރީ ކީއްވެގެން ކަމެއް އަދި ނޭނގެ އެވެ. ނަމަވެސް، ހީރޫ ވަރަށް ބަލިވެ އުޅޭތާ މިހާރު ގިނަ ދުވަސްތަކެއް ވެއްޖެ ކަމަށް ރިޕޯޓްތައް ބުންޏެވެ.
ހީރޫ އެޑްމިޓްކުރުމުން ކަރަންގެ ވަރަށް ގާތް އެކުވެރިއެއް ކަމަށްވާ ފެޝަން ޑިޒައިނަރު މަނީޝް މަލްހޯތުރާ ވެސް އެ ހޮސްޕިޓަލަށް ދިޔަ ކަމަށް ރިޕޯޓްތައް ބުންޏެވެ.
މަންމަގެ ބަލިހާލަތާ ގުޅޭ ގޮތުން ކަރަން އަދި މިހާތަނަށް މީޑިއާއަށް އެއްވެސް އެއްޗެއް ނުބުނެ އެވެ.
ހީރޫ އަންނަނީ ކަރަންގެ ޕްރޮޑަކްޝަން ހައުސް ދަރްމާގެ ދަށުން ނެރޭ ހުރިހާ ފިލްމެއްހެން ޕްރޮޑިއުސްކުރަމުންނެވެ. ދަރްމާ ޕްރޮޑަކްޝަންގައި ހީރޫގެ 10 ޕަސެންޓް ހިއްސާ ވެސް އޮވެ އެވެ. ނަމަވެސް، މިދިޔަ މަހު ކަރަަން ވަނީ އެ ކުންފުނީގެ 50 ޕަސެންޓް ހިއްސާ އިންޑިއާގެ ވިޔަފާވެރިޔާ އަދާރް ޕޫނަވައްލާއަށް ވިއްކާލައިފަ އެވެ. އެއީ، ކޮވިޝީލްޑް ވެކްސްގެ ހެދި ކުންފުނީގެ ވެރިޔާ އެވެ.
ކަރަންގެ ބައްޕަ ޔަޝް ޖޯހަރް އަކީ ވެސް ފިލްމު ޕްރޮޑިއުސަރެކެވެ. ކެންސަރު ބަލީގައި އޭނާ ވަނީ މީގެ 20 އަހަރު ކުރިން މަރުވެފަ އެވެ.