ބްރޯޑްކާސްޓިން ކޮމިޝަން (ބްރޯޑްކޮމް)ގެ ނައިބު ރައީސް މުހައްމަދު ފަޒީންއާ ގުޅޭ މައްސަލައެއް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ބަލަން ފަށައިފި އެވެ.
ކޮމިޓީއަށް ހުށަހެޅުނު މައްސަލައަކާ ގުޅިގެން އެ ކޮމިޓީގެ ބައްދަލުވުމެއް މިދިޔަ ބުރާސްފަތި ދުވަހާއި އިއްޔެ ވަނީ ބާއްވައިފަ އެވެ.
ނަމަވެސް، މި މައްސަލާގައި "ދެ މީހެއްގެ ޒާތީ ގިނަ މައުލޫމާތުތަކެއް ހިމެނޭތީ" ކަމަށް ބުނެ ދެ ބައްދަލުވުން ވެސް ވަނީ ސިއްރުކޮށްފަ އެވެ.
އެނގިފައިވާ ގޮތުގައި ކޮމިޓީން ބަލަމުން އަންނަނީ ފަޒީން، ކޮމިޝަންގެ އަންހެން މުވައްޒަފަކަށް ޖިންސީ ފުރައްސާރަ ކުރި ކަމަށް ބުނާ މައްސަލައެކެވެ. އެކަން ކޮމިޝަންގެ މެންބަރަކު ވަނީ ޔަގީން ކޮށްދެއްވައިފަ އެވެ.
ރާއްޖެ ޓީވީގައި ނޫސްވެރިއަކަށް މަސައްކަތް ކުރި ފަޒީން، ބްރޯޑްކޮމަށް އައްޔަން ކުރީ 2021 ގަ އެވެ. އޭނާ ނައިބު ރައީސަކަށް ހޮވާފައިވަނީ ޖެނުއަރީ، 2023 ގަ އެވެ.
ބްރޯޑްކޮމްގައި މި ވަގުތު ތިއްބަވަނީ ފަޒީން އާއި ކޮމިޝަންގެ ރައީސް ކަމަށް މިއަދު އިންތިހާބުކުރި ސަފާ ޝަފީގާއި އާމިނަތު އަމީނާ އާއި ޝިފްލާ އިބްރާހީމާއި އާމިނަތު ނުޒުހާގެ އިތުރުން އަލަށް އައްޔަން ކުރި ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ (މުހައްމާ) އަދި ބްރޯޑްކޮމްގެ ކުރީގެ މެންބަރު އާމިނަތު ސަރާހަތު އިއްޒަތު ސިދުގީ އެވެ.