ސްޓެލްކޯގެ ހަރަދުގައި ހައްޖާއި އުމްރާ އަށް ދާނެ މުވައްޒަފުން ހޮވައިފި

ސްޓެލްކޯގެ ހަރަދުގައި މި އަހަރު ހައްޖާއި އުމްރާގެ އަޅުކަން އަދާކުރަން ދިއުމުގެ ފުރުސަތު ލިބޭ މުވައްޒަފުން ހޮވައިފި އެވެ.

އެ ކުންފުނިން މިއަދު ބުނީ މި އަހަރުގެ ހައްޖުގެ އަޅުކަން އަދާކުރަން ދިއުމުގެ ފުރުސަތު އަންހެން އަދި ފިރިހެން މުވައްޒަފުންނަށް ވަކިވަކިން ހުޅުވާލިއިރު ހައްޖުގެ އަޅުކަމަށް 102 މުވައްޒަފަކު ކުރިމަތިލި ކަމަށެވެ. އޭގެ ތެރެއިން ޝަރުތު ހަމަވީ 84 މުވައްޒަފެކެވެ.

އުމްރާގެ އަޅުކަން އަދާކުރުމަށް ހުޅުވާލި ފުރުސަތުގައި ކުރިމަތިލި 218 މީހުންގެ ތެރެއިން ޝަރުތު ހަމަވީ 215 މީހެކެވެ.

ސްޓެލްކޯ އިން ބުނި ގޮތުގައި 2023 ވަނަ އަހަރާ ހަމައަށް ހައްޖާއި އުމްރާގެ ފުރުސަތު ދިނީ ކޮންމެ ބަޔަކުން ވެސް އަންހެން މުވައްޒަފަކާއި ފިރިހެން މުވައްޒަފަކަށެވެ.

އެކަމަކު އެކަމާ ގުޅޭ ޕޮލިސީއަށް މިދިޔަ އަހަރު ބަދަލު ގެނެސް، ހައްޖުގެ އަޅުކަމަށާއި އުމްރާގެ އަޅުކަމަށް ދެ ފިރިހެން އަދި އެއް އަންހެން މުވައްޒަފަކު ހޮވަން ނިންމާފައިވާ ކަމަށް އެ ކުންފުނިން ބުންޏެެވެ.

ސްޓެލްކޯގެ ހަރަދުގައި މި އަހަރު ހައްޖަށް ދިއުމަށް ހޮވުނު މީހުން:

• އަހުމަދު ވަހީދު – ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓް

• ހަސަން ޒަރީރު – ކ. ކާށިދޫ އިންޖީނުގެ

• އާމިނަތު ޖަލީލާ – ޕްރޮކިއުމަންޓް ޑިޕާޓްމަންޓް

އުމްރާގެ އަޅުކަން އަދާކުރަން ގުރުއަތުން ހޮވުނު މީހުން:

• ބުންޔާމީން މުހައްމަދު ނަސީރު – ވިލިނގިލި އަވަށު އިންޖީނުގެ

• އަހުމަދު މުސްތަފާ – ވިލިނގިލި އަވަށު އިންޖީނުގެ

• ޝިފްރާ އިލްހާމް – ހިއުމަން ރިސޯސަސް އެންޑް ޓްރެއިނިން ޑިޕާޓްމަންޓް

ސްޓެލްކޯ އިން ހައްޖުގެ އަޅުކަމުގެ ފުރުސަތު ދެނީ އެ ކުންފުންޏަށް 15 އަހަރަަށް ވުރެ ގިނަ ދުވަހު ހިދުމަތް ކުރުމުގައި ދެމިތިބި މީހުންގެ ތެރެއިން ކުރިމަތިލާ މީހުންނަށެވެ. އުމްރާގެ އަޅުކަމަށް ފުރުސަތު ދެނީ ފަސް އަހަަރަށް ވުރެ ގިނަ ދުވަހު ހިދުމަތްކުރަމުންދާ މީހުންނަށެވެ.