ޕްރިމިއާ ޗެމްބާސްއަށް ނާޒިމް މިލިއަން ރުފިޔާ ދޭންޖެހޭކަން ސާބިތެއް ނުވި

ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރުގެ ޑިފެންސް މިނިސްޓަރު މުހައްމަދު ނާޒިމް ހައްޔަރުކޮށް ޖަލަށް ލުމުން ޕްރިމިއާ ޗެމްބާސް އިން ފޯރުކޮށްދިން ގާނޫނީ ހިދުމަތަށް ލިބެންޖެހޭ ކަމަށް އެ ލޯ ފާމުން ބުނާ 1.3 މިލިއަން ރުފިޔާ އަކީ ދޭންޖެހޭ ފައިސާއެއް ކަމަށް ސާބިތުނުވާ ކަމަށް ފަސް އަހަރު ފަހުން ސިވިލް ކޯޓުން އިއްޔެ ހުކުމްކޮށްފި އެވެ.

މާފަންނު އުތުރު ދާއިރާގެ މިހާރުގެ މަޖިލިސް މެންބަރު ނާޒިމް ގ. އެނިފްގޭގައި އުޅުއްވި ކޮޓަރިން ހަނގުރާމަވެރި ހަތިޔާރު ފެނުނު ކަމަށް ބުނެ ހައްޔަރުކުރީ ފެބްރުއަރީ 10، 2015 ގަ އެވެ.

އެ މައްސަލައިގައި މާޗް 27، 2015 ގައި ނާޒިމް 11 އަހަރަށް ޖަލަށް ލާން ކުރި ހުކުމް އިސްތިއުނާފުކުރަން ހައި ކޯޓަށް ހުށަހެޅުމަށް ކުރި މަސައްކަތް ކުރީ ވަކީލް ޝާހީން ހަމީދާއި ވަކީލް މައުމޫން ހަމީދު އަދި ހަސަން މާޒް ޝަރީފް ހިއްސާވެ ވަޑައިގަންނަވާ ޕްރިމިއާ ޗެމްބާސް އިންނެވެ. ނަމަވެސް ހައި ކޯޓާ ހިސާބުން ނާޒިމް ވަނީ އެ ލޯ ފާމު ދޫކޮށްލައްވައިފަ އެވެ.

ހައި ކޯޓުން 2016 ވަނަ އަހަރު ނާޒިމްގެ ހުކުމް ދެމެހެއްޓުމަށް ސުޕްރީމް ކޯޓުގައި އިސްތިއުނާފުކުރުމުން އޭރު ބަލައިވެސް ނުގަތެވެ. އެކަމަކު ޔާމީންގެ ވެރިކަން ބަދަލުވެ ޑިސެމްބަރު 13، 2018 ސުޕްރީމް ކޯޓުން ވަނީ މައްސަލަ ރިވިއުކޮށް ޖަލު ހުކުމް ބާތިލްކޮށްފަ އެވެ.

ޕްރިމިއާ ޗެމްބާސް އިން ނާޒިމަށް ދީފައިވާ ގާނޫނީ ހިދުމަތްތަކަށް 977،353ރ. އަދި ޖޫރިމަނާއާ އެކު 1.3 މިލިއަން ރުފިޔާ ހޯދަން މާޗު 2020 ގައި ހުށަހެޅި މައްސަލައިގައި އެންމެ ފުރަތަމަ މަސައްކަތްކުރީ އޭރު ސިވިލް ކޯޓުގައި އޮތް ޑިސްޕިއުޓް ރިޒޮލިއުޝަން މަރުހަލާގެ ތެރެއިންނެވެ. އެކަމަކު ވާހަކަ ދައްކައިގެން މައްސަލަ ހައްލު ނުވެ މައްސަލަ ޝަރީއަތަށް ދިޔަ އެވެ. އޭގެ ފަހުން ޝަރީއަތްތައް ސެޕްޓެމްބަރު 6، 2021 ގައި ނިންމައި ދިރާސާކުރުމުގެ މަރުހަލާގައި އޮއްވައި ސުޕްރީމް ކޯޓުން ސިވިލް ކޯޓުގެ ޑިވިޝަންތަކެއް އުވާލުމުން މައްސަލަ އެހެން ސެކްޝަނަކަށް ބަދަލުކުރަން ޖެހުނެވެ. އަދި އެ މައްސަލަ އޭގެ ފަހުން ބެއްލެވި ގާޒީ ރިޓަޔާކުރެއްވުމުން އަނެއްކާ އެހެން ސެކްޝަނަކަށް މެއި 22، 2023 ގައި ބަދަލުވީ އެވެ.

ނާޒިމްގެ ފަރާތުން ސިވިލް ކޯޓުގައި ބުނެފައިވަނީ ކްރިމިނަލް ކޯޓުން ނާޒިމާ ދެކޮޅަށް ކުރި ހުކުމުގެ މައްސަލަ އިސްތިއުނާފަށް ހުށަހެޅުމުގެ މަސައްކަތްކޮށްދިނުމަށް ޕްރިމިއާ ޗެމްބާސްގެ ކިބައިން ނާޒިމް އެދިވަޑައިގެންފައި ނުވާ ކަމަށެވެ. އެހެންވެ މި ދައުވާ ކުރުމުގެ ހައިސިއްޔަތު ޕްރިމިއާ ޗެމްބާސް އަށް ނޯންނާނެ ކަމަށާއި މިއީ މައުޟޫއީ ގޮތުން ބަލަންޖެހޭ މައްސަލައެއް ނޫން ކަމަށް ކަނޑައަޅައިދޭން އެދިފައިވެ އެވެ.

ނާޒިމްގެ ގާނޫނީ މަސައްކަތް ޕްރިމިއާ ޗެމްބާސް އިން ކޮށްފައިވަނީ ނާޒިމް އެދިވަޑައިގެން ނޫން ކަމަށާއި އެކަމާ ގުޅޭ ގޮތުން އަގަކާ މެދު އެއްބަސްވުމެއް ވެސް ނޯންނާނެ ކަމަށް ނާޒިމްގެ ފަރާތުން ޝަރީއަތުގައި ބުނެފައިވެ އެވެ.

ޝަރީއަތުން މިކަމަށް ބެލި އިރު، ފައިސާ ދައްކަން އަންގައި ޕްރިމިއާ ޗެމްބާސް އިން ނާޒިމަށް ހަތަރު އިންވޮއިސްއެއް ފޮނުވާފައި އޮތްކަން ފާހަގަކޮށްފައިވެ އެވެ. އެއީ ނާޒިމަށް ކުރި ހުކުމް އިސްތިއުނާފަށް ހުށަހެޅުމަށް ވީ ތައްޔާރީތަކާއި މަސައްކަތަށް 977،353.13ރ. ދައްކަން އަންގައި ފޮނުވި އިންވޮއިސްއަކާއި އެ ފައިސާ ނުދެއްކުމުން ޖޫރިމަނާއާ އެކު ފައިސާ ދެއްކުމަށް އަންގައި ފޮނުވި ތިން އިންވޮއިސްއެކެވެ.

ޕްރިމިއާ ޗެމްބާސް އިން ވަނީ ގާނޫނީ ފީ ބަޔާންކޮށް ނާޒިމަށް ފޮނުވި އީމެއިލްތަކެއް ޝަރީއަތަށް ހުށަޙަޅައި މިއީ ނާޒިމާއި އޭނާގެ އާއިލާއަށް އެނގުމާއި ފެނުމުގެ ތެރެއިން ކޮށްފައިވާ މުއާލާމާތެއް ކަމަށް ބުނެފަ އެވެ. ޕްރިމިއާ ޗެމްބާސްގެ އީމެއިލްގައި ބަޔާންކުރާ އަގަށް އެއްބަސްވާ ނަމަ އީމެއިލް މެދުވެރިކޮށް އެކަން ކޮންފާމްކުރުމަށް ޕްރިމިއާ ޗެމްބާސްގެ މެއިލްގައިވެ އެވެ. އެކަމަކު ޝަރީއަތުން ބުނެފައިވަނީ ޕްރިމިއާ ޗެމްބާސްގެ މެއިލް އަކީ ތިން ވަނަ ފަރާތަކުން، އެ ފަރާތުގެ އީމެއިލް އެޑްރެސް އިން، ދައުވާކުރާ ފަރާތަށް ފޮނުވި މެއިލްއެއްކަން އެނގޭ ކަމަށާއި އެ ފަރާތަކީ ނާޒިމްގެ ފަރާތުން ބަސް ބުނުގެ ގާނޫނީ ބާރު އޮތް ފަރާތެއް އެނގެން ނެތް ކަމަށެވެ.

ޕްރިމިއާ ޗެމްބާސްގެ އިންވޮއިސްއާ ގުޅިގެން ސިޓީއެއް ފޮނުއްވިކަން އެނގެން އޮތް އިރު، އިންވޮއިސްކޮށްފައިވާ އަގަކީ ޕްރިމިއާ ޗެމްބާސް އިން ހުށަހެޅި އަދި ނާޒިމްގެ ރުހުން ލިބިފައި ނެތް އަގެއް ކަމަށް ސިޓީގައި ބަޔާންކޮށް އެ އަގު ދެވެން ނެތް ކަމަށް ނާޒިމް އަންގަވާފައިވެ އެވެ.

މި ކަންކަމަށް ބަލާއިރު ހިދުމަތުގެ އަގާ ގުޅޭ ގޮތުން ދެފަރާތުން އެއްބަސްވާ ކޮންޓްރެކްޓެއް ވުޖޫދުގައި ނެތްކަން ހުކުމުގައި ވަނީ ފާހަގަކޮށްފަ އެވެ.

އެހެންވެ ގާޒީ ފައްޔާޒް ޝާތިރު ހުކުމް ކުރެއްވީ ޕްރިމިއާ ޗެމްބާސް އިން ހޯދަން ނާޒިމްގެ މައްޗަށް ދައުވާކުރާ ފައިސާއާ މެދު ނާޒިމާ އެކު ވަކި ގޮތަކަށް އެއްބަސްވެފައި ނެތުމުން އެއީ ދައްކަންޖެހޭ ފައިސާއެއްކަން ސާބިތުވާން ނެތް ކަމަށެވެ.