ކޯޓުން އަމުރު ނުކުރާތީ ޖުވެނައިލް ހާފްވޭ ހައުސްގައި އަދިވެސް ކުއްޖަކު ނެތް

ކުށުގެ ވެށީގައި އުޅޭ ކުދިންނާއި އަދި ނުރައްކަލަށް ހުށަހެޅިދާނެ ކުދިންނަށް ބޭނުންވާ ފަރުވާ ދިނުމަށް ހއ. ހޯރަފުށީގައި މިދިޔަ ޖެނުއަރީ މަހު ހުޅުވި ޖުވެނަައިލް ހާފްވޭ ހައުސްއަށް ކުދިން ގެންދަން ކޯޓުން އަމުރު ނުކުރާތީ އެތަނުގައި އެއްވެސް ކުއްޖަކު ނެތް ކަމަށް ޖުވެނައިލް ޖަސްޓިސް ޑިޕާޓްމެންޓުން ބުނެފި އެވެ.

ކުޑަކުދިންގެ އަދުލުގެ ގާނޫނުގައިވާ ގޮތުން ކުށުގެ ވެށީގައި އުޅޭ ކުދިންނާއި ނުރައްކަލަށް ހުށަހެޅުމުގެ ފުރުސަތު އޮތް ކުދިން އެކަމަށް މަރުކަޒެއްގައި ބައިތިއްބައިގެން ފަރުވާދޭން ޖެެހެ އެވެ. އަދި އެކަމަށް ދެ މަރުކަޒެއް ހެދި ނަމަވެސް 2019 ވަނަ އަހަރު އަމަލުކުރަން ފެށި ގާނޫނުގެ ދަށުން އެތަން ބޭނުމެއް ނުކުރެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ދ. ކުޑަހުވަދޫގައި ރެސިޑެންޝަލް ޓްރީޓްމަންޓް ސެންޓަރެއް އަދި ހއ. ހޯރަފުށީގައި ހާފްވޭ ހައުސްއެއް އިމާރާތްކުރި އެވެ. އަދި މިދިޔަ ޖެނުއަރީ މަހު ރައީސް ޑރ. މުހައްމަދު މުއިއްޒު ވަނީ ހޯރަފުށީ ސެންޓަރު ހުޅުއްވައިދެއްވައިފަ އެވެ.

ޖުވެނަލް ޖަސްޓިސްގެ ޑިޕާޓްމެންޓް ހިންގާ ހޯމް މިނިސްޓްރީގެ ޑެޕިއުޓީ މިނިސްޓަރު ހަސަން ވަހީދު "މިހާރު" އަށް ވިދާޅުވި ގޮތުގައި އެތަން ހިންގަން ބޭނުންވާ މުވައްޒަފުންނާއި ކުދިންނަށް ފަރުވާ ދޭން ބޭނުންވާ ހުރިހާ ވަސީލަތެއް ވެސް އެ ތަނުގައި ފުރިހަމަވި ނަމަވެސް އެތަނަށް އެއްވެސް ކުއްޖަކު ނުގެންދަނީ ގާނޫނުގެ ދަށުން ކޯޓުން އެކަމަށް އަމުރެއް ނުކުރާތީ އެވެ.

"ތަން ހުރީ ހަމަ ރެޑީވެފައި، އެއްވެސް ކުއްޖަކު އެތަނަށް ގެނެސް ފަރުވާ ދޭން އަދި ކޯޓަކުން އަމުރެއް ނުކުރޭ،" އޭނާ ވިދާޅުވި އެވެ.

ޖުވެނަައިލް ހާފްވޭ ހައުސް އަދި ޖުވެނައިލް ރެސިޑެންޝަލް ޓްރީޓްމަންޓް ސެންޓަރުގެ ތެރެއިން ކޮންމެ ތަނެއްގައި އެއްފަހަރާ ހަ ކުދިންނަށް ފަރުވާ ދެވޭނެ ކަމަށް ހަސަން ވިދާޅުވި އެވެ.

މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހްސާން ވިދާޅުވެފައި ވަނީ ރެސިޑެންޝަލް ފަރުވާއަށްފަހު އެ ކުދިން ބަދަލުކުރަން ޖެހޭނީ ހާފްވޭ ހައުސްއަށް ކަމަށެވެ. ފުރަތަމަ މަރުހަލާ ފުރިހަމަ ނުކޮށް، އެ ނިޒާމުގައި ދެވަނަ ސްޓެޕަކަށް ނުދެވޭ ކަމަށް އޭނާ ވަނީ ވިދާޅުވެފަ އެވެ.

އޭރު މިނިސްޓަރު ވިދާޅުވީ އެ މަރުކަޒު ހުޅުވުމާއެކު ރިސްކުގައި ތިބި އަދި އެންމެ އިސްކަންދޭން ޖެހޭ ކުދިންނަށް ރިހެބިލިޓޭޝަން ފަށާނެ ކަމަށެވެ. އެ ލިސްޓުގައި 200 އެއްހާ ކުދިން އެބަތިބި ކަމަށް މިނިސްޓަރު ވިދާޅުވެފައިވެ އެވެ.

ނުރައްކަލުގައި ތިބި ކުދިން ދައުލަތުގެ ބެލުމުގެ ދަށަށް ނަގައި ދިގު މުއްދަތަކަށް ރެސިޑެންޝަލް ފަރުވާ ދިނުމަކީ ވެސް އެ ގާނޫނުން ކުރަންޖެހޭ ކަމަށެވެ. ސަރުކާރުން ވަނީ "ލޯންގްޓާމް ރެސިޑެންޝަން ކެއާ ފެސިލިޓީ" ގާއިމްކުރަން ވަކި ރަށެއް ހަމަޖައްސައި، 18 އަހަރު ވަންދެން އެ ކުދިން ބަލަހައްޓަން ނިންމައިފަ އެވެ.