ބަޖެޓުގައި ތަފްސީލު ނުޖަހަނީ ރައްޔިތުން ބޭނުންވާ މަޝްރޫއުތަކަށް ޖާގަ ދޭން: ޒަމީރު

ދައުލަތުގެ ބަޖެޓުގައި، ކުރިއަށް އޮތް އަހަރަށް ހިންގަން ރާވާފައިވާ ތަރައްގީގެ ވަކިވަކި މަޝްރޫއުތަކުގެ ތަފްސީލު ނުހިމަނަނީ ރައްޔިތުން ބޭނުންވާ މަޝްރޫއުތައް ހިންގުމަށް ޖާގަދޭން ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހަށް ހުށަހެޅި އަންނަ އަހަރުގެ ބަޖެޓުގެ ހިސާބުތައް ދައްކާ ގޮތުން ޕްރޮޖެކްޓްތަކާއި އުމްރާނީ ތަރައްގީގެ މަޝްރޫއުތައް ހިންގަން 9.3 ބިލިއަން ރުފިޔާ ވަނީ ކަނޑައަޅައިފަ އެވެ. އެއީ ޖުމްލަ ބަޖެޓުގެ 14 ޕަސެންޓެވެ. އަންނަ އަހަރަށް ލަފާކޮށްފައިވަނީ 64.3 ބިލިއަން ރުފިޔާގެ ބަޖެޓެކެވެ.

ކެޕިޓަލް ހަރަދުގެ ތެރެއިން ޕީއެސްއައިޕީ މަޝްރޫއުތަކުގެ ވަކިވަކި ތަފްސީލުތަކެއް މި އަހަރުގެ ބަޖެޓުގައި ވެސް ނެތެވެ. ހަމައެކަނި ހާމަކޮށްފައިވަނީ މަޝްރޫއުތަކަށް ކުރާ ހޭދަތަކަށް ޖުމްލަކޮށް ހިނގާނެ ހަރަދުތަކެވެ.

އެކަމުގެ ކަންބޮޑުވުން އޮޑިޓާ ޖެނެރަލް ވެސް ފާޅުކުރައްވާފައި ވަނިކޮށް، މަޖިލީހުގެ ބަޖެޓު ދިރާސާ ކޮމިޓީގެ މިއަދުގެ ބައްދަލުވުމުގައި އިދިކޮޅު އެމްޑީޕީގެ މެމްބަރުންގެ ފާޑުކިޔުންތަކާއި ސުވާލުތައް މިނިސްޓަރަށް އަމާޒުވި އެވެ.

އެކަމަށް ޖަވާބު ދެއްވަމުން ޒަމީރު ވިދާޅުވީ، މަޝްރޫއުތަކާ ނުބައްދަލު އަދަދުތަކެއް ޖަހައި، ބަޖެޓުގައި ތަފްސީލު ހިމަނާފައިވިޔަސް، އެކަމުން އެދެވޭ ނަތީޖާއެއް ހާސިލުނުވާ ކަމަށެވެ. އެގޮތަށް މެދުވެރިވަނީ، މިނިސްޓަރު ވިދާޅުވި ގޮތުގައި، ރަށްރަށަށް ކޮންމެހެން ބޭނުންވާ މަޝްރޫއުތަކަކީ ކޮބައިކަން މާލޭގައި ތިބެގެން ދެނެގަތުމުގެ ފުރުސަތު ނޯންނާނެތީ އެވެ.

އޭގެ ބަދަލުގައި، ރައީސް ޑރ. މުހައްމަދު މުއިއްޒު ސީދާ ރަށްރަށަށް ވަޑައިގެން، އެ ރަށެއްގައި ދިރިއުޅޭ ރައްޔިތުންނާ ބައްދަލުކުރައްވައި، އެ ރަށަކަށް ބޭނުންވާ މަޝްރޫއުތައް އޮޅުންފިލުއްވައި، ރައްޔިތުން ބޭނުންވާ ގޮތަށް އެ މަޝްރޫއުތައް ކުރިއަށް ގެންދިއުމުގެ ސަގާފަތެއް ގާއިމުކުރައްވާފައިވާ ކަމަށް ޒަމީރު ވިދާޅުވި އެވެ.

"ބަޖެޓުގައި ޖަހައި މަޝްރޫއުތައް ތަންފީޒުކުރާ ކަމަށްވަންޏާ އެކަންތައް ކުރެވޭނެ އެންމެ ރަނގަޅު މެކޭނިޒަމްކަމެއް ގާއިމުކުރެވިފައި މި ވަނީ،" ޒަމީރު ވިދާޅުވި އެވެ.

މިނިސްޓަރު ވިދާޅުވި ގޮތުގައި، މިހާރު އަމަލުކުރަމުން އަންނަ އުސޫލުގެ ތެރެއިން، ރަށަކަށް ބޭނުންވާ ދާއިރާއަކުން އެންމެ ބޭނުންވާ މަޝްރޫއު ހިންގުމުގެ ޖާގަ ވަނީ ލިބިފަ އެވެ.

ސަރުކާރުގެ އަމާޒަކީ، ފައިސާގެ ދަތިކަމެއް ދިމާނުވެ، ސަރުކާރުން ދޭންޖެހޭ އެހީތެރިކަމެއް ފޯރުކޮށްދީ، މަޝްރޫއުތައް ވީއެންމެ އަވަހަކަށް ނިންމުމަށް ކަމަށް އޭނާ ވިދާޅުވި އެވެ.

މިގޮތުން، މި އަހަރަށް ކަނޑައެޅި ގިނަ މަޝްރޫއުތައް ވެސް ބާރު ދުވެލީގައި ކުރިއަށްދާ ކަމަށާއި، އޭގެ ތެރެއިން އެއް ބައި މަޝްރޫއުތައް ނިންމައި، އިފްތިތާހު ވެސް ކުރެވިފައިވާކަން ޒަމީރު ފާހަގަކުރެއްވި އެވެ.

މި އަހަރު ކުރިއަށް ގެންދަން ކަނޑައެޅި ބާކީ މަޝްރޫއުތަކުގެ ތެރެއިން ގިނަ މަޝްރޫއުތައް، މިނިސްޓަރު ވިދާޅުވި ގޮތުގައި، އަންނަ އަހަރު ނިމޭނެ އެވެ.