އިސްލާމްދީނުގެ ހުދޫދުގެ ބޭރުން ހިޔާލުފާޅުކުރަން ބޭނުންވާ މީހުން ދާންވީ އެހެން ގައުމަކަށް: ރައީސް

އިސްލާމް ދީނުގެ ހުދޫދުގެ ތެރޭގައި ހިޔާލު ފާޅުކުރުމުގެ މިނިވަންކަން ރާއްޖޭގައި ފުރިހަމަ އަށް އޮންނާނެ ކަމަށާއި އެ ހުދޫދުން ބޭރުން ހިޔާލުފާޅުކުރަން ބޭނުންވާ މީހުން ދާންވީ އެހެން ގައުމަކަށް ކަމަށް ވިދާޅުވެ، އެ ފަރާތްތަކަށް ވަރުގަދަ އިންޒާރެއް ރައީސް ޑރ. މުހައްމަދު މުއިއްޒު ރޭ ދެއްވައިފި އެވެ.

ސަރުކާރު ހިންގާ ޕާޓީ ޕީއެންސީން ބޭއްވި ބޮޑު ޖަލްސާގައި ރައީސް ވިދާޅުވީ، "ފަރަންޖީ ކޮން ތަނަކުން" ކިތަންމެ ގިނަ ބަޔާނެއް ނެރުނަސް އެ މަނިކުފާނަށް ފަރުވާލެއް ނެތް ކަމަށާއި ރާއްޖޭގައި އޮންނާނީ ދިވެހިން ބޭނުންވާ ގޮތް ކަމަށެވެ.

"އެއީ އިސްލާމް ދީނުގެ ހުދޫދުގެ ތެރޭގައި ހިޔާލުފާޅުކުރުމުގެ މިނިވަންކަން. އެއީ މި ގައުމުގައި ހަމަޖެހުން ގެނައުމަށްޓަކައި ކޮންމެހެން ކުރަންޖެހޭ ކަމެއް،" ރައީސް ވިދާޅުވި އެވެ.

އެ މަނިކުފާނު ވިދާޅުވީ، ކޮންމެ މީހެއްގެ ވެސް އަބުރެއް އޮންނާނެ ކަމަށާއި އިސްލާމް ދީނުގައި ވެސް ބަޔާންކޮށްފައިވާ އެންމެ ބޮޑު އެއް ހައްގަކީ އަބުރު ރައްކާތެރިކުރުން ކަމަށެވެ. އަދި އެންމެންގެ މެދުގައި އަބުރު ރައްކާތެރިކަން އޮތީ ހަމަހަމަކޮށް ކަމަށް ރައީސް ވިދާޅުވި އެވެ.

ޕީއެންސީން ރޭ ބޭއްވި ބޮޑު ޖަލްސާ އަށް ރައީސް މުއިއްޒު ވަޑައިގެން ސަޕޯޓަރުންނާ ސަލާން ކުރައްވަނީ.---ފޮޓޯ: ފަޔާޒު މޫސާ| މިހާރު

"އަޅުގަނޑުމެން ކޮންމެ މީހެއްގެ އާއިލާއެއް އެބައޮތް، އަޅުގަނޑުމެން ކޮންމެ މީހެއްގެ ދަރިންނާއި އަނބިންނާއި ރައްޓެހިންނާއި ކޮލީގުންނާ އެބަތިބި. ކޮންމެ މީހެއްގެ ވެސް އަބުރާއި އިއްޒަތެއް އޮންނާނެ. ކޮންމެ މީހެއްގެ ވެސް ހައްގުތަކެއް އެބައޮތް. ކަރާމާތެއް އެބައޮތް، އިންސާނީ ކަރާމާތް. އެ ވެއްޔާ މޮޑެލުމުގެ ފުރުސަތެއް މި ސަރުކާރަކުން ނުދޭނެ،" ރައީސް މުއިއްޒު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި ރާއްޖޭގައި ހަމަޖެހުން ގާއިމްކުރުމަށް އެންމެ މުހިންމު އެއް ހައްގަކީ ހިޔާލުފާޅުކުރުމުގެ މިނިވަންކަން އޮތުމެވެ. އަދި އެ ހައްގު ރާއްޖޭގައި އޮތީ "ތަންމިނަށް" ފުރިހަމަ އަށް ހުޅުވިފައި ކަމަށް ރައީސް ވިދާޅުވި އެވެ. އެކަމަކު، ތަކުރާރުކޮށް އެ މަނިކުފާނު ވިދާޅުވީ އެއީ އިސްލާމް ދީނުގެ ހުދޫދުގެ ތެރެއިން ކަމަށެވެ.

ހަމަ ކޮންމެ ރެއަކު ވެސް ރޭގަނޑު ވެސް ދުވާލު ވެސް ހަމަ 24 ގަޑިއިރު ވެސް ހަމަ އެއްވެގެން ތިބެންވީއޭ،"--- ރައީސް

ރައީސް ވިދާޅުވީ، އިސްލާމް ދީނާއި އިސްލާމީ ޝަރީއަތާ ހިލާފަށް ރާއްޖޭގައި އެއްވެސް ކަމެއް ކުރަން ދިވެހިން ބޭނުން ނުވާ ކަމަށެވެ.

ފޮޓޯ ގެލަރީ / ޕީއެންސީގެ ބޮޑު ޖަލްސާ

ހިޔާލުފާޅުކުރުމުގެ މިނިވަންކަމުގެ އިތުރުން އެ މަނިކުފާނު ވިދާޅުވި ގޮތުގައި އެއްވެ އުޅުމުގެ ހައްގު ވެސް ރާއްޖޭގައި އެބައޮތެވެ. މީގެ ކުރިން މާލޭގައި އެއްވެވެނީ ކާނިވާ ސަރަހައްދަށް އެކަނި ކަމަށް ވިޔަސް އެކަމަކު އެއްވެސް ހުއްދައަކާ ނުލައި އެއްވެވޭ ގޮތަށް މި ސަރުކާރުން 4-5 ތަނެއް ދައްކާފައިވާ ކަމަށް ރައީސް ވިދާޅުވި އެވެ. އެކަމަކު، އެއްވެ އުޅޭ ތަނެއް ވެސް ނުފެންނަށް ކަމަށް ރައީސް މުއިއްޒު ވިދާޅުވި އެވެ.

"ކޮންމެ ރެއަކު ވެސް އެއްވާންވީއޭ. ކާކުތޯ ހުއްޓުވަނީ އެއްވާން؟ އެ މިނިވަންކަން ނެތް ކަމަށް ދައްކަން މި އުޅޭ ސަބަބު ވެސް އަޅުގަނޑަކަށް ނުވިސްނޭ ހަމަ އެއްގޮތަކަށް ވެސް. ހަމަ ކޮންމެ ރެއަކު ވެސް ރޭގަނޑު ވެސް ދުވާލު ވެސް ހަމަ 24 ގަޑިއިރު ވެސް ހަމަ އެއްވެގެން ތިބެންވީއޭ،" ރައީސް ވިދާޅުވި އެވެ.

"ހަމަ ހިޔާލު ވެސް ފާޅުކުރަންވީ ބޭނުންވަރަކަށް އިސްލާމީ ހުދޫދުގެ ތެރެއިން، މީހަކު އަޅާވެސް ނުލާނެ. ކަންބޮޑެއް ވެސް ނުވާނެ، ޖަލަކަށް ވެސް ނުލާނެ. އަޅުގަނޑު ދެންނެވިން މިތާނކު ނުތިބޭނެއޭ ސިޔާސީ ހައްޔަރީން."