އެފްރިކަން ކަޕް އޮފް ނޭޝަންސް އަށް ފަހު މިސްރުގެ މުހައްމަދު ސަލާހު އެނބުރި ލިވަޕޫލަށް އައިސް ކުޅުނު ފުރަތަމަ މެޗުން އެ ޓީމު ރަށުން ބޭރުގައި 3-0 އިން ފްރާންސްގެ މާސޭ ބަލި ކޮށްފި އެވެ.
ޗެމްޕިއަންސް ލީގު މެޗުގައި ލިވަޕޫލަށް ގޯލު ޖަހައިދިނީ ޑޮމިނިކް ސޮބޮޒްލައި އާއި ކޯޑީ ގަކްޕޯ އެވެ. އަނެއް ލަނޑު ވަނީ މާސޭ ކުޅުންތެރިއެއް އަތުން ބައިކޮޅަށެވެ.
މި މެޗަކީ މިދިޔަ ނޮވެމްބަރުގައި ޗެމްޕިއަންސް ލީގުގައި ރެއާލް މެޑްރިޑް ބަލި ކުރި މެޗަށް ފަހު ސަލާހު ލިވަޕޫލްގައި ސްޓާޓްކުރި ފުރަތަމަ މެޗެވެ.
"އަހަރެން އޭނާ ނުކުޅުވާ ނަމަ އެއީ ޓީމާ އެކު ތަފާތު ކަމެއް ތަޖުރިބާ ކުރަނީ. އަހަރެމެންނަށް [ގޯލު ޖަހަން] ވަރަށް ބައިވަރު ފުރުސަތުތައް ބޭކާރު ކުރެވޭ. ލިވަޕޫލްގެ ތާރީހުގައި ގޯލު ޖެހޭނެ ކުޅުންތެރިއަކަށް ވާނެ މޯ ސަލާހް،" ސަލާހާ ގުޅޭގޮތުން ލިވަޕޫލްގެ ކޯޗު އާނޭ ސްލޮޓް ބުންޏެވެ.
"މަހެއް ވަންދެން ދުރުގައި ހުރެފައި އެހެން ޓީމަކަށް ކުޅެފައި އެނބުރި އައިސް އެންމެ ޕްރެކްޓިސް އަކާ އެކު ވެސް 90 މިނިޓު ހަމަކުރުމުން ސަލާހުގެ ޕްރޮފެޝަނަލް ކަން ހާމަވޭ. އޭނާ ގޯލެއް ޖެހުމާ ވެސް ވަރަށް ކައިރި ވި، އާއްމުކޮށް އޭނާ ނިންމާލާ ކަހަލަ ފުރުސަތެއް. އެކަމަކު އެއިން އަހަރެމެންނަށް ވީ ގެއްލުމެއް ވެސް ނެތް."
އާނޭ ސްލޮޓް ވަނީ 2022 ވަނަ އަހަރު ފެއިނޫޑްގެ ކޯޗު ކަމުގައި ކޮންފަރެންސް ލީގު ސެމީ ފައިނަލްގައި މާސޭގެ ދަނޑުގައި ކުޅުނު ލެގު އެއްވަރު ކޮށް ފައިނަލްގެ ޖާގަ ހޯދައިފަ އެވެ.
ޗެމްޕިއަންސް ލީގުގައި ރޭ ބެޔާން މިއުނިކް ވަނީ ހެރީ ކޭންގެ ދެ ގޯލުން 2-0 އިން ޔޫނިއަން ސެއިންޓް ގިލޮއިސް ބަލި ކޮށްފަ އެވެ. ޗެލްސީން މޮއީސެސް ކައިސޭޑޯގެ ގޯލުން ޕާފޯސް ބަލި ކުރި އިރު ބާސެލޯނާ ވަނީ 4-2 އިން ސްލާވިއާ ޕްރާހާ ބަލި ކޮށްފަ އެވެ. އަދި ނިއުކާސަލް ވަނީ 3-0 އިން ޕީއެސްވީ ބަލި ކޮށްފަ އެވެ.