ސޯޝަލް މީޑިއާގެ ބޮޑެތި ކުންފުނިތަކުން ކުޑަކުދިން އެ އެޕްތަކަށް ދެވިހިފާނެ ގޮތަށް ގަސްތުގައި ފަރުމާކޮށްފައިވޭތޯ ބެލުމަށް، ލޮސް އެންޖެލިސްގައި ތާރީހީ ޝަރީއަތެއް މި ހަފުތާގައި ފަށަން ތައްޔާރުވެއްޖެ އެވެ.
މި ޝަރީއަތުން ނިންމާ ނިންމުމުގެ މައްޗަށް ބިނާކޮށް، މިފަދަ މައްސަލަތަކުގައި ގާނޫނީ ގޮތުން އަމަލުކުރާނެ އާ އުސޫލުތަކެއް ކަނޑައެޅިގެންދާނެ ކަމަށް ބެލެވެ އެވެ. ކެލިފޯނިއާގެ ސްޓޭޓް ކޯޓުގައި މާދަމާ ފަށާ ޝަރީއަތް ނިމޭ ގޮތަކުން އެމެރިކާގެ އެކި ކަންކޮޅުތަކުގައި ފެންމަތިވަމުންދާ މިފަދަ އެތައް ސަތޭކަ މައްސަލައަކަށް އޭގެ އަސަރު ފޯރާނެ އެވެ.
މި ދައުވާ ރައްދުވަނީ ޔޫޓިއުބް، ޓިކްޓޮކް އަދި އިންސްޓަގްރާމް ފަދަ ވަސީލަތްތައް ހިންގާ ޓެކްނޮލޮޖީގެ ބޮޑެތި ކުންފުނިތައް ކަމަށްވާ އަލްފަބެޓް، ބައިޓްޑާންސް އަދި މެޓާ އަށެވެ. މެޓާގެ ކޯ-ފައުންޑަރު އަދި ޗީފް އެގްޒެކެޓިވް މާކް ޒަކަބާގް ވެސް މި ޝަރީއަތުގައި ހެކިބަސް ދިނުމަށް ހާޒިރުކުރާނެ އެވެ.
ދައުވާގައި ބުނެފައިވަނީ، ސޯޝަލް މީޑިއާ ކުންފުނިތަކުގެ އެޕްތައް ބޭނުންކުރާ ފަރާތްތައް އެ އެޕްތަކަށް ދެވިހިފާ ގޮތަށް ހަދާފައި ހުރުމުގެ ސަބަބުން، ނަފްސާނީ ބަލިތަކަށް ހުށަހެޅި، ކެއިންބުއިމަށް ބަދަލު އައިސް، ނަފްސާނީ ބަލިތަކަށް ފަރުވާދޭ ހޮސްޕިޓަލްތަކުގައި އެޑްމިޓްކުރަން ޖެހުމުގެ އިތުރުން، އަމިއްލައަށް މަރުވުމުގެ ހާދިސާތައް ވެސް ހިނގާފައިވާ ކަމަށެވެ.
މި މައްސަލަ މައިގަނޑު ގޮތެއްގައި ބިނާކޮށްފައިވަނީ، ސޯޝަލް މީޑިއާ އަށް ދެވިހިފުމުގެ ސަބަބުން ނަފްސާނީ ގޮތުން ބޮޑެތި ގެއްލުންތަކެއް ލިބުނު ކަމަށް ބުނާ، ކޭޖީއެމްގެ ނަމުން ނަން ދީފައިވާ 19 އަހަރުގެ އަންހެނެއްގެ މައްޗަށެވެ.
"މިއީ ކުޑަކުދިންނަށް ގެއްލުން ދިނުމުގެ މައްސަލައެއްގައި ސޯޝަލް މީޑިއާ ކުންފުންޏަކުން ޖޫރީއެއްގެ ކުރިމަތީގައި ޝަރީއަތާ ކުރިމަތިލާންޖެހުނު ފުރަތަމަ ފަހަރު،" މި މައްސަލަ ކޯޓަށް ގެންދިޔަ ސޯޝަލް މީޑިއާ ވިކްޓިމްސް ލޯ ސެންޓަރުގެ ބާނީ މެތިއު ބާގްމަން އޭއެފްޕީ އަށް ވިދާޅުވެފައިވެ އެވެ.
"ދުނިޔޭގެ އެންމެ ބޮޑެތި، ބާރުގަދަ އަދި އެންމެ މުއްސަނދި ކުންފުނިތަކާ އެއްވަރުގެ މަގާމެއްގައި، ކޭޖީއެމް އާއި އޭނާގެ އާއިލާއަށް މިއަދު ޝަރީއަތުގެ މަޖިލީހުގައި ތިބެވުމަކީ، އޭގެ އަމިއްލަ ޒާތުގައި ލިބުނު ވަރަށް ބޮޑު ކާމިޔާބީއެއް."
މެޓާ، ޓިކްޓޮކް އަދި ޔޫޓިއުބާ އެކު، ޒުވާނުން ސޯޝަލް މީޑިއާއަށް ދެވިހިފާ ގޮތް ހަދާ ކަމުގެ ތުހުމަތުގައި ކުރިއަށްދާ މަދަނީ ދައުވާއިން ބަރީއަވުމަށްޓަކައި އެއްބަސްވުމަކަށް އައިސްފައިވާކަން ސްނެޕްޗެޓުން މިދިޔަ ހަފުތާގައި ވަނީ ކަށަވަރުކޮށްދީފައިވެ އެވެ. ނަމަވެސް، އެ އެއްބަސްވުމުގެ ތަފްސީލުތައް ހާމައެއް ނުކުރެ އެވެ.
އިންޓަނެޓްގެ ބޮޑެތި ކުންފުނިތަކުން ބުނަމުންދަނީ އެމެރިކާގެ 'ކޮމިއުނިކޭޝަންސް ޑިސެންސީ އެކްޓް' ގެ ދަށުން އެ ކުންފުނިތަކަށް ހިމާޔަތް ލިބިގެންވާ ކަމަށެވެ. އެ މާއްދާގެ ދަށުން، ސޯޝަލް މީޑިއާ ބޭނުންކުރާ މީހުން ޝާއިއުކުރާ އެއްޗެއްގެ ޒިންމާ އެ ކުންފުނިތަކުން އުފުލާކަށް ނުޖެހެ އެވެ.
މި މައްސަލައިގައި ބޮޑަށް ބަލަނީ، މީހުންގެ ސަމާލުކަން މެދުނުކެނޑި ހިފެހެއްޓުމަށާއި، ނަފްސާނީ ދުޅަހެޔޮކަމަށް ނޭދެވޭ އަސަރުކުރާ ފަދަ މައުލޫމާތުތައް ފެންނާނެހެން އެ ކުންފުނިތަކުގެ ވިޔަފާރި އުސޫލުތައް ބައްޓަންކޮށްފައިވާތީ، އެކަމުގެ ޒިންމާ އެ ކުންފުނިތަކުން އުފުލަންޖެހޭނެ ކަމަށެވެ.
ބާގްމަން ބުނެފައިވަނީ، ސޯޝަލް މީޑިއާ ކުންފުނިތަކުގެ މައްޗަށް ދައުވާކުރަނީ ކުޑަކުދިން އެކަމަށް ދެވިހިފާނެ ފަދަ ގޮތަކަށް ޕްލެޓްފޯމްތައް ފަރުމާކޮށްފައިވާތީ އާއި، އެ ކުދިން ބަލަން ބޭނުންވާ އެއްޗެއްގެ ބަދަލުގައި، އެ އެއްޗަކާ ދުރަށް ނުދެވޭ ފަދަ އަލްގޮރިދަމްތަކަށް ކޮންޓެންޓްތައް ދައްކާތީ ކަމަށެވެ.