މޯލްޑިވް ގޭހުގެ ޑެޕިއުޓީ މެނޭޖިން ޑިރެކްޓަރު މުހައްމަދު އަބްދުލް ކަރީމް (ރުކުމާ) އިއްޔެ އިސްތިއުފާ ދެއްވައިފި އެވެ.
އޭނާ "މިހާރު"އަށް ވިދާޅުވީ ގޭސް ކުންފުނިން ވަކިވެވަޑައިގެންނެވީ ސަރުކާރުގެ އެހެން ކުންފުންޏެއްގެ އިސް މަގާމަކާ ހަވާލުވެވަޑައިގަތުމަށް ކަމަށެވެ. ނަމަވެސް، އެއީ ކޮން ކުންފުންޏެއް އަދި ސާފެއް ނުވެ އެވެ.
ޕްރައިވަޓައިޒޭޝަން ބޯޑުން ވަނީ ރުކުމާގެ އިސްތިއުފާ މިހާރު ގަބޫލު ކުރައްވައިފަ އެވެ.
މި ސަރުކާރާ އައުމާއެކު، ރުކުމާ އެންމެ ފުރަތަމަ ހަމަޖެއްސީ ވެމްކޯގެ ޑެޕިއުޓީ މެނޭޖިން ޑިރެކްޓަރަކަށެވެ. އޭގެފަހުން އޭނާ ވަނީ ފެނަކައިގެ ޑެޕިއުޓީ މެނޭޖިން ޑިރެކްޓަރަކަށް އައްޔަން ކުރެއްވުމަށްފަހު މޯލްޑިވް ގޭހަށް ބަދަލުކުރި އެވެ.
އެނގިފައިވާ ގޮތުގައި، މިދިޔަ ޖުލައި މަހު އައްޔަންކުރި މަގާމުން އޭނާ އިސްތިއުފާ ދެއްވީ މޯލްޑިވް ގޭސްގައި އުފެދިފައިވާ މައްސަލަތަކާ ހެދި އެވެ. އެކަން ގޯސްވެގެން ދިޔައީ، މެނޭޖިން ޑިރެކްޓަރު އަބްދުﷲ މުހައްމަދުގެ ބާރުތައް ހަނިކޮށް، ދެ ޑެޕިއުޓީ މެނޭޖިން ޑިރެކްޓަރުންނަށް ބޮޑެތި ޒިންމާތަކެއް ހަވާލުކުރަން އެ ކުންފުނީގެ ބޯޑުން ނިންމި ފަހުންނެވެ.
ރުކުމާއާ ހަވާލުކުރީ ސޭލްސް އާއި ފިނޭންސް އާއި ހިއުމަން ރިސޯސަސް އަދި ޕްރޮކިއުމަންޓެވެ. ދެން ހުންނަވާ ޑެޕިއުޓީ މެނޭޖިން ޑިރެކްޓަރު އިބްރާހިމް ފިކުރީއާ ހަވާލުކުރީ ޕްރޮޖެކްޓާއި ޕްރޮޑަކްޝަން އަދި އިންޖީނިއަރިން ޑިޕާޓްމަންޓެވެ.
އެމްޑީއަށް ދޭން ނިންމީ އެޑްމިން އާއި އޮޕަރޭޝަންސް އަދި ހެލްތު އެންޑު ސޭފްޓީ ޑިޕާޓްމަންޓެވެ.
"މެނޭޖިން ޑިރެކްޓަރުގެ ހުއްދައާ ނުލައި ކަންކަން ނިންމޭ ގޮތަށް ބޯޑުން ދެ ޑެޕިއުޓީންނަށް ބާރުތައް ހަވާލުކުރީ." އެކަމުގެ މައުލޫމާތު އެނގިވަޑައިގަންނަވާ ބޭފުޅަކު ވިދާޅުވި އެވެ.
އެ ކުންފުނީގެ އޮފިޝަލަކު ވިދާޅުވީ ބާރުތައް ހަނިކުރުމުން އެމްޑީ އޮފީހަށް ނުނިކުންނަވައި ވެސް ގިނަ ދުވަސްވަންދެން ހުންނެވި ކަމަށެވެ. އަދި ޗުއްޓީއަކަށް ވަޑައިގަތުމަށްފަހު މަސައްކަތަށް އެނބުރި ވަޑައިގަތީ މިދިޔަ ހަފުތާގެ ތެރޭގަ އެވެ.
މޯލްޑިވް ގޭހަކީ އެސްޓީއޯގެ ސަބްސިޑަރީ ކުންފުންޏަކަށް ވިޔަސް، އަބްދުﷲ އާއި އެސްޓީއޯއާ މެދު ވެސް އޮތީ ހިތްހަމަނުޖެހުންތަކެއް އުފެދިފަ އެވެ. އޭގެ ތެރެއިން އެންމެ ބޮޑު މައްސަލައަކީ ބޯޑުން ނިންމާ ނިންމުންތައް ތަންފީޒު ނުކުރުން ކަމަށް އެ ކުންފުނީގެ އޮފިޝަލަކު ވިދާޅުވި އެވެ.