ދިރާގުން ކުރިއަށް ގެންދާ 'އެންރޯލް އެންޑް ވިން 2 ސްޕީޑްބޯޓް' ޕްރޮމޯޝަނުގެ ފުރަތަމަ ސްޕީޑް ލޯންޗް ލިބުނު ނަސީބުވެރިޔާ އަބްދުﷲ ސައީދަށް މިއަދު ލޯންޗު ހަވާލުކޮށްފި އެވެ.
ސ. ފޭދޫއަށް ނިސްބަތްވާ ސައީދަށް އެ ލޯންޗް ހަވާލުކުރީ ތިލަފުށި ބޯޓްޔާޑުގައި މިއަދު ބޭއްވި ހާއްސަ ހަރަކާތެއްގަ އެވެ. އޭނާ އަށް މި ޕްރޮމޯޝަނުން ލިބުނީ އަލްޝާލީ މެރިން ކެނެރީ 28 މޮޑެލްގެ ސްޕޯޓްސް ސްޕީޑް ލޯންޗެކެވެ. އެއީ ޔަމަހާ 250 ހޯސްޕަވަރުގެ އިންޖީނެއް އަޅާފައިވާ ބޯޓެކެވެ.
ސައީދު ވަނީ ދިރާގުން މިފަދަ އަގުހުރި އިނާމެއް ދީފައިވާތީ އެކުންފުންޏަށް ޝުކުރު އަދާކޮށްފަ އެވެ. އޭނާ އަކީ 2001 ވަނަ އަހަރުން ފެށިގެން ދިރާގުގެ ކަސްޓަމަރެކެވެ.
ސައީދު ވަނީ ލޯންޗު ވިއްކާލުމަށް ވިސްނަމުންދާ ކަމަށް މީގެކުރިން ބުނެފަ އެވެ.
ދިރާގުގެ "އެންރޯލް އެންޑް ވިން 2 ސްޕީޑްބޯޓު"ގެ ފުރަތަމަ ނަސީބުވެރިޔާ ހޮވާފައި ވާއިރު ދެ ވަނަ ލޯންޗު ހޯދުމުގެ ފުރުސަތު އަދިވެސް ވަނީ ހުޅުވާލައިފަ އެވެ. އެގޮތުން އަންނަ މާޗް މަހުގެ ނިޔަލަށް އެ ލޯންޗު ހޯދަން އެންރޯލް ކުރެވޭނެ އެވެ.
އެ ޕްރޮމޯޝަނުގައި ބައިވެރިވެވޭނީ މޮބައިލް ޕޯސްޓްޕެއިޑްގެ 450 އިން މަތީގެ ޕެކޭޖުތައް ގެންގުޅޭ ކަސްޓަމަރުންނާއި ފިކްސްޑް ބްރޯޑްބޭންޑް 40 އެމްއިން މަތީގެ ޕެކޭޖުތަކުގެ ކަސްޓަމަރުންނާއި މޮބައިލް ބްރޯޑްބޭންޑް އަދި 5ޖީ ޓާބޯގެ 540 އިން މަތީގެ ޕްލޭންތައް ގެންގުޅޭ ކަސްޓަމަރުންނަށެވެ.
ދިރާގުން ބުނީ އެ ޕްރޮމޯޝަނަށް ހޫނު ތަރުހީބެއް ލިބެމުންދާ ކަމަށެވެ.