ތެލާއި މިނެރަލް ހޯދުމުގެ މަސައްކަތް ރާއްޖޭގައި ސްޕެޝަލް އިކޮނޮމިކް ޒޯންތަކުގައި ކުރެވޭނެ މަސައްކަތްތަކުގެ ލިސްޓަށް އިތުރުކޮށްފި އެވެެ.
ސްޕެޝަލް އިކޮނޮމިކް ޒޯން(އެސްއީޒެޑް) ގާނޫނުގައިވާ ގޮތުން އެފަދަ ޒޯނެއްގައި ހިންގޭނެ އިގުތިސާދީ ހަރަކާތްތައް ކަނޑައެޅުމުގެ ބާރު އޮންނަނީ ރައީސަށެވެ. އެހެންވެ، އެސްއީޒެޑްގައި ހިންގޭނެ މަސައްކަތްތަކާއި އެންމެ ކުޑަ އިންވެސްޓްމެންޓްގެ މިންވަރު ރައީސް ޑރ.މުހައްމަދު މުއިއްޒު އެންމެ ފަހުން ކަނޑައެޅުއްވީ މިދިޔަ އަހަރުގެ ޖެނުއަރީ މަހު އެވެ.
ރައީސް އޭރު ނެރުއްވި ގަރާރުގައި އެސްއީޒެޑްގައި ކުރެވޭ އެ ބާވަތުގެ މަސައްކަތަކަށް ހިމަނުއްވާފައި އޮތީ ހަމަ އެކަނި ގޭހުގެ މަސައްކަތްތަކެވެ. ނަމަވެސް ރައީސް މިއަދު ނެރުއްވި ގަރާރުގައި ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ވެސް ވަނީ އިތުރު ކުރައްވައިފަ އެވެ.
އެސްއީޒެޑްގައި ކުރެވޭނެ މަސައްކަތްތަކުގެ ގޮތުގައި އެ ލިސްޓްގައި ދެން ހުރި ކަންތައްތަކަށް މިއަދުގެ ގަރާރުގައި އެއްވެސް ބަދަލެއް ގެންނަވާފައެއް ނުވެ އެވެ.
އެސްއީޒެޑްގައި ހިންގޭނެ މަސައްކަތްތައް
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ އެކި ބާވަތުގެ މަސައްކަތްތައް
- ޓްރާންސްޝިޕްމަންޓް ޕޯޓާއި އިންޓަރނޭޝަނަލް ލޮޖިސްޓިކްސް އާއި ޕޯޓާއި އެއާޕޯޓާއި ބަލްކް ބްރޭކިން އާއި ބަންކަރިން ޑޮކިން ހިދުމަތް
- ޔުނިވަސިޓީ އާއި ޓާޝަރީ ހޮސްޕިޓަލްތަކާއި ސްޕެޝަލިޓީ ހޮސްޕިޓަލާއި ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމަންޓް ފެސިލިޓީތައް.
- ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކްތަކާއި އައި.ސީ.ޓީއާ ގުޅޭ ފެސިލިޓީތައް.
- އިންޓަނޭޝަނަލް ފައިނޭންޝަލް ހިދުމަތްތަކާއި އިންޓަނޭޝަނަލް ޓްރޭޑް ސެންޓަރުތައް
- ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް.
- ތެލާއި ގޭހާއި މިނަރަލް އެކްސްޕްލޮރޭޝަންގެ މަސައްކަތްތައް.
އެސްއީޒެޑްގައި ހިންގޭނެ މަސައްކަތްތައް ކަނޑައެޅުއްވުމުގެ އިތުރުން އެފަދަ މަސައްކަތްތަކަށް އެންމެ ކުޑަކޮށް އިންވެސްޓްކުރެެވޭނެ މިންވަރު ވެސް ކަނޑައަޅުއްވަނީ ރައީސެވެ. މިިދިޔަ އަހަރު ނެރުއްވި ގަރާރާއި މިއަދު ނެރުއްވި ގަރާރުގައި ވެސް ސަސްޓެއިނަބުލް ޓައުންޝިޕް ތަރައްގީ ކުރުން ފިޔަވައި އެހެން މަަސައްކަތްތަކަށް އެންމެ ކުޑަކޮށް އިންވެސްޓްކުރެވޭނެ މިންވަރުގެ ގޮތުގައި އޮތީ 100 މިލިއަން ޑޮލަރެވެ.
ސަސްޓެއިނަބުލް ޓައުންޝިޕަށް އިންވެސްޓްކުރެވޭނެ އެންމެ ކުޑަ މިންވަރަކީ 500 މިލިއަން ޑޮލަރެވެ.
ރާއްޖޭން ތެޔޮ ފެނޭތޯ ބެލުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ދިރާސާއެއް ކުރި ނަމަވެސް އެ މަސައްކަތް ކާމިޔާބުވެފައެއް ނުވެ އެވެ. އެހެން ނަމަވެސް ރާއްޖޭން މިނެރަލް އެއް ފެނޭތޯ މީގެ ކުރިން މަސައްކަތެއް ކުރިކަމެއް އެނގޭކަށް ނެތެވެ.