މާލޭގެ އަމީނީމަގުގައި މަރާމާތު ކުރަމުން އަންނަ ބައިގެ ފުރަތަމަ ސެގްމެންޓާއި ދެވަނަ ސެގްމެންޓު އަންނަ އާދިއްތަ ދުވަހު އާންމުންނަށް ހުޅުވާލަން ނިންމާފައިވާ ކަމަށް އިންފްރާސްޓްރަކްޗާ މިނިސްޓްރީން މިއަދު ބުނެފި އެވެ.
ސެގްމެންޓް 2 ގައި ހިމެނޭ، ހުންގާނު ފިހާރައާ ހަމަށް ތާރުއަޅައި ނިންމާލީ މިދިޔަ ހޯމަ ދުވަހު އެވެ. އެއީ ދިވެހިރާއްޖޭގެ އަޑަށް ވަންނަ ގޭޓާ ދިމާލުން ކަންމައްޗަށް ހުންނަ ފިހާރައާވީ ސަރަހައްދެވެ. ސެގްމެންޓް 1 ގެ ދަށުން ވަނީ އެ ހިސާބުން ފެށިގެން ދަރުމަވަންތަ ހޮސްޕިޓަލާވީ ދިމާލުގައި ތާރުއަޅައި ނިންމާލައިފަ އެވެ.
އިންފްރާސްޓްރަކްޗާ މިނިސްޓްރީން ބުނީ އަންނަ މަހުގެ 4 ވާ އާދިއްތަ ދުވަހު އެ ސަރަހައްދާ ހަމައަށް މަގު ހުޅުވާލަން ނިންމާފައިވާ ކަމަށެވެ.
އެ މަގުގެ މަރާމާތަށް ފަހު އާންމުންނަށް ހުޅުވާލުމުން ބޮޑެތި ލުއިތަކެއް ލިބޭނެ އެވެ. މިހާރު މަގު ބަންދުކޮށްފައިވާތީ އެ ރޫޓަށް ބަސް ދަތުރުތައް ވެސް ވަނީ ހުއްޓާލައިފަ އެވެ.
ތާރު އަޅައިގެން ހަދާފައިވާ އަމީނީމަގުގެ ބައެއް ސަރަހައްދުތަކުގައި ތާރުގަނޑު އުފުލި، އެ މަގުގައި ބޮޑެތި އަޑިގުޑަންތައް ހެދިފައި އޮތުމުން އެ ތާރުގަނޑު އެއްކޮށް ނަގައި، އެތަން އަލުން ހެދުމުގެ މަސައްކަތް އެމްޓީސީސީއާ ހަވާލުކުރީ މިދިޔަ ޖޫން މަހު އެވެ.
އެ މަޝްރޫއުގެ ދަށުން، ދިވެހިރާއްޖޭގެ އަޑުގެ އިމާރާތުން ފެށިގެން ދަރުމަވަންތަ ހޮސްޕިޓަލާ ހިސާބަށް މަގުގެ މަރާމާތަށް އެ ސަރަހައްދު ބަންދުކުރީ ޖޫން މަހުގެ ފަހުކޮޅު އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އާރްޑީސީއާ ހަވާލުކޮށްގެން އަމީނީމަގު ޒަމާނީ ފެންވަރަށް ހެދުމުގެ މަސައްކަތް ފެށީ ޖުލައި 2022 ގަ އެވެ. އަދި ފިޔަވަހިތަކަކަށް ބަހާލައިގެން ކުރިއަށް ގެންދިޔަ އެ މަޝްރޫއުގައި އެ ވެރިކަން ނިމުނުއިރު ފުރިހަމަނުވެ އޮތް ސަރަހައްދުގެ އެންމެ ފަހު ބައި ހަދައި ހުޅުވީ 2024 ވަނަ އަހަރު އެވެ.
އެ މަގުގެ އެކި ހިސާބުތަކުގައި ތާރުގަނޑު ވަރަށް ބޮޑަށް ހަލާކުވެގެން މިދިޔަ އަހަރު ވެސް ބައެއް ހިސާބުތައް މަރާމާތުކުރަން ޖެހުނެވެ. މަގު ޒަމާނީ ފެންވަރަށް އަލުން ހެދުމުގެ މަސައްކަތް ފެށީ އެކި ހިސާބުތަކުން ތާރުގަނޑު މައްޗަށް އުފުލިފައި އޮތުމުން، ދުއްވާ މީހުންނަށް އޭގެ ނުރައްކާ ކުރިމަތިވެފައިވާތާ ދުވަސްތަކެއް ވެފައިވަނިކޮށެވެ.