މާލޭގެ އަމީނީމަގުގައި މަރާމާތު ކުރަމުންދާ ބައިގެ ދެވަނަ ސެގްމެންޓުގައި ތާރު އަޅާ ނިންމާލާފައިވާ ކަމަށް އެ މަސައްކަތްކުރަމުން އަންނަ އެމްޓީސީސީން މިރޭ ބުނެފި އެވެ.
ތާރު އަޅައިގެން ހަދާފައިވާ އަމީނީމަގުގެ ބައެއް ސަރަހައްދުތަކުގައި ތާރުގަނޑު އުފުލި، އެ މަގުގައި ބޮޑެތި އަޑިގުޑަންތައް ހެދިފައި އޮތުމުން އެ ތާރުގަނޑު އެއްކޮށް ނަގައި، އެތަން އަލުން ހެދުމުގެ މަސައްކަތް އެމްޓީސީސީއާ ހަވާލުކުރީ މިދިޔަ ޖޫން މަހު އެވެ.
ދިވެހިރާއްޖޭގެ އަޑުގެ އިމާރާތުން ފެށިގެން ދަރުމަވަންތަ ހޮސްޕިޓަލާ ހިސާބަށް މަގުގެ މަރާމާތަށް އެ ސަރަހައްދު ބަންދުކުރީ ޖޫން މަހުގެ ފަހުކޮޅެވެ.
އެ މަސައްކަތުގެ ދަށުން ސެގްމެންޓު އެކެއްގައި ތާރު އެޅުމުގެ މަސައްކަތް ފެށީ މިމަހުގެ 19 ވަނަ ދުވަހު އެވެ. އެ މަސައްކަތް ނިންމުމަށް ފަހު ސެގްމެންޓް ދޭއްގައި ތާރު އަޅަން ފަށާފައިވާއިރު އެމްޓީސީސީން ބުނީ އެތަނުގައި ވެސް ތާރު އަޅާ މިހާރު ނިމިފައިވާ ކަމަށެވެ.
އެމްޓީސީސީން ބުނީ އެތަނުގެ މަރާމާތުގެ މަސައްކަތް ނިމުމާ އެކު ރައްޔިތުންނަށް ދަތުރުފަތުރުކުރުމުގައި ބޮޑު ލުޔެއް ލިބިގެންދާނެ ކަމަށެެވެ.
އެ މަގުގެ މަރާމާތުގެ މަސައްކަތްކުރަމުންދާތީ އެ ސަރަހައްދަށް ބަސް ދަތުރުކުރުން ވެސް ވަނީ ހުއްޓާލައިފަ އެެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އާރްޑީސީއާ ހަވާލުކޮށްގެން އަމީނީމަގު ޒަމާނީ ފެންވަރަށް ހެދުމުގެ މަސައްކަތް ފެށީ ޖުލައި 2022 ގަ އެވެ. އަދި ފިޔަވަހިތަކަކަށް ބަހާލައިގެން ކުރިއަށް ގެންދިޔަ އެ މަޝްރޫއުގައި އެ ވެރިކަން ނިމުނުއިރު ފުރިހަމަނުވެ އޮތް ސަރަހައްދުގެ އެންމެ ފަހު ބައި ހަދައި ހުޅުވީ 2024 ވަނަ އަހަރު އެވެ.
އެ މަގުގެ އެކި ހިސާބުތަކުގައި ތާރުގަނޑު ވަރަށް ބޮޑަށް ހަލާކުވެގެން މިދިޔަ އަހަރު ވެސް ބައެއް ހިސާބުތައް މަރާމާތުކުރަން ޖެހުނެވެ. މަގު ޒަމާނީ ފެންވަރަށް އަލުން ހެދުމުގެ މަސައްކަތް ފެށީ އެކި ހިސާބުތަކުން ތާރުގަނޑު މައްޗަށް އުފުލިފައި އޮތުމުން، ދުއްވާ މީހުންނަށް އޭގެ ނުރައްކާ ކުރިމަތިވެފައިވާތާ ދުވަސްތަކެއް ވެފައިވަނިކޮށެވެ.
ތާރު އަޅައިގެން އަމީނީމަގު ހެދުމަށް ދައުލަތުގެ ބަޖެޓުން 84 މިލިއަން ރުފިޔާ ހަރަދުކުރި އެވެ.