މޯލްޑިވްސް ހައްޖު ކޯޕަރޭޝަންގެ މާލީ ހާލަތު ރަނގަޅުކޮށް، ކުންފުންޏަށް މާލީ ފައިދާ ހޯދަން ހިންގާ މަޝްރޫއުގެ ތެރޭގައި ހިމެނޭ ނިއަމް ރެސިޑެންސް އެޕާޓްމަންޓްތައް ވިއްކުމަށް މިހާތަނަށް ކޮށްފައިވާ ހުރިހާ މުއާމަލާތްތަކެއް ބާތިލްކުރަން ނިންމައިފި އެވެ.
އެ ކޯޕަރޭޝަނުން ބުނި ގޮތުގައި، އެ މުއާމަލާތްތައް ބާތިލްކުރަން ނިންމީ ކުންފުންޏަށް އެންމެ ފައިދާވާ ގޮތަށް އަލުން އެ މަސައްކަތް ކުރިއަށް ގެންދިއުމަށެވެ.
ހުޅުމާލޭގައި އިމާރާތްކުރަމުން އަންނަ ނިއަމް ރެސިޑެންސުން އެޕާޓްމަންޓް ދޫކުރާނެ ގޮތުގެ އުސޫލް ކަނޑައަޅައި ކުންފުނީގެ މުވައްޒަފުންނާ އެކު އޮތީ ފްލެޓް ގަތުމުގެ މުއާމާލާތްތަކެއް ހިންގައިފަ އެވެ. އެ ކުންފުނީގެ ކުރީގެ މެނޭޖިން ޑިރެކްޓަރު މުހައްމަދު ޝަކީލާއި އިސްވެރިންތަކެއް މީގެ ތެރޭގައި ހިމެނޭތީ ފާޑުކިއުން ވަނީ އަމާޒުވެފަ އެވެ.
ޝަކީލް ހުންނެވި އިރު ފެއްޓެވި އެ މަޝްރޫއު ހިނގަމުން ދަނިކޮށް އޭނާ ވަނީ އިލެކްޝަންސް ކޮމިޝަނަށް ބަދަލުވެވަޑައިގެންފަ އެވެ.
އާއްމުންނަށް ވެސް ހުޅުވާލާ ގޮތަށް ކުރިއަށް ގެންދަން ނިންމާފައިވާ ހައްޖު ކޯޕަރޭޝަނުގެ ފްލެޓް މަޝްރޫއާ ގުޅޭ ގޮތުން އެ ކުންފުނިން ރޭ ނެރުނު ބަޔާނުގައި ބުނީ ޔުނިޓްތައް ދޫކުރުމުގެ މަސައްކަތް އަލުން ކުރިއަށް ގެންދަން ނިންމާފައިވާ ކަމަށެވެ. އެގޮތުން ޔުނިޓްތަކުގެ އަގު ކަނޑައެޅުމާއި ޔުނިޓުތައް ވިއްކަން އާއްމުކޮށް ހުޅުވާލަން މަސައްކަތްތައް ކުރަމުން އަންނަ ކަމަށް އެ ކުންފުނިން ބުންޏެވެ.
އެހެންވެ، އެ ހައުސިން މަޝްރޫއުއާ ގުޅޭގޮތުން މީގެ ކުރިން ހިނގި ހުރިހާ މުއާމަލާތެއް ބާތިލްކުރަން ނިންމީ ކަމަށް ބަޔާނުގައިވެ އެވެ.
"މި މަސައްކަތްތަކުގެ ތެރެއިން މުވައްޒަފުންނަށް އެޕާޓްމަންޓުތައް ވިއްކުމަށް މިހާތަނަށް ކޮށްފައިވާ ހުރިހާ މުއާމަލާތްތައް ބާތިލްކުރަން ނިންމާފައިވާ ކަމުގައި ދަންނަވަމެވެ،" ބަޔާނުގައިވެ އެވެ.
އާއްމުންނަށް ވެސް ގަނެވޭ ގޮތަށް އެ މަޝްރޫއު ގެންދަން ހައްޖު ކޯޕަރޭޝަނުން ވަނީ އިމާރާތުގެ ޑިޒައިންގެ މަސައްކަތް ސެޕްޓެމްބަރު، 2024 ގައި ފަހިދިރިއުޅުން ކޯޕަރޭޝަން (އެފްޑީސީ) އާ ހަވާލުކޮށްފަ އެވެ.
ނަމަވެސް، އާއްމުކޮށް އިއުލާންކުރުމުގެ ކުރިން ހައްޖު ކޯޕަރޭޝަނުން ވަނީ އެ ތަނުގެ ދާއިމީ މުވައްޒަފުންނަށް ފްލެޓު ގަންނަން ހުޅުވާލައިފަ އެވެ. އެނގިފައިވާ ގޮތުގައި އިލެކްޝަންސް ކޮމިޝަން (އީސީ) ގެ ރައީސަކަށް މި ވަގުތު ހުންނެވި ޝަކީލާއި ޗީފް އޮޕަރޭޓިން އޮފިސަރު (ސީއޯއޯ) ނަޖީލް އަހުމަދު އަދި ޑީއެމްޑީން ފްލެޓު ބައްލަވައިގެންނެވީ އޭގެ ތެރެއިންނެވެ.
އެކަމަކު، ފްލެޓު ލިބޭނެ ކަމުގެ އެގްރިމެންޓުގައި ސޮއިކުރެއްވި ފަހުން ޝަކީލާއި ނަޖީލް ވަނީ އެ ކުންފުނިން ވަކިވެވަޑައިގެންފަ އެވެ.
ނިއަމް ރެސިޑެންސްގެ އެޕާޓްމަންޓް ވިއްކުމުގެ މުއާމަލާތްތައް ބާތިލްކުރިއިރު، މުވައްޒަފުން އަންނަނީ އެޕާޓްމަންޓަށް ބުކިން ފީ އަދި މަހުން މަހަށް ބަހާލައިގެން ފައިސާ ވެސް ދައްކަމުންނެވެ.