ރާއްޖޭގައި ދެ ވަނަ ހިއްސާގެ ބާޒާރެއް ހިންގަން "ނޭޝަނަލް އެކްސްޗޭންޖް ލިމިޓެޑް"ގެ ނަމުގައި ސަރުކާރުގެ 100 ޕަސެންޓް ހިއްސާވާ ކުންފުންޏެއް ރައީސް ޑރ. މުހައްމަދު މުއިއްޒު މިއަދު އުފައްދަވައިފި އެވެ.
ރައީސް އޮފީހުން ބުނީ އެ ކުންފުންޏަކީ ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާއިރު، ސަރުކާރުގެ އެހީތެރިކަމާ އެކު ދެވަނަ ހިއްސާގެ ބާޒާރެއް ކުރިޔަށް ގެންދިޔުމަށް އުފެއްދި ކުންފުންޏެއް ކަމަށެވެ.
އެ ކުންފުނީ އުފެއްދުމުގެ މަގުސަދު:
- ދިވެހި ސަރުކާރުގެ ފަރާތުން ރާއްޖޭގެ ކެޕިޓަލް މާކެޓް ކުރިއެރުވުން
- މާކެޓުގެ އިތުބާރާއި ދެފުށް ފެންނަ މިންވަރު އިތުރުކުރުން
- ޒަމާނީ ސެކިއުރިޓީ އެކްސްޗޭންޖުތަކާއި ޓްރޭޑިން ފެސިލިޓީތައް ގާއިމުކޮށް ހިންގުން
- ދައުލަތުގެ ސެކިއުރިޓީޒް އާއި އިސްލާމީ ޝަރީއާގެ ހަމަތަކަށް ފެތޭ ސުކޫކާއި އެހެނިހެން މާލީ ވަސީލަތްތައް ނެރުމާއި ލިސްޓުކުރުން
- މުއާމަލާތުކުރުމުގެ މަގުފަހިކޮށްދިނުމާއި ސެންޓްރަލް ސެކިއުރިޓީޒް ޑިޕޮސިޓަރީ އާއި ކްލިއަރިން އަދި ސެޓްލްމަންޓުގެ ޒަމާނީ ޕޯސްޓް ޓްރޭޑް ހިދުމަތްތައް ފޯރުކޮށްދިނުން
އޭގެ އިތުރުން ރާއްޖެ އާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރާނެ ކަމަށް ވެސް ރައީސް އޮފީހުން ބުންޏެވެ.
މިހާރު ހިންގަމުން އަންނަ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އަކީ ރާއްޖޭގައި ކެޕިޓަލް މާކެޓް ތަރައްގީކޮށް ރެގިއުލޭޓްކުރުމަށް މާލީ ސެކިއުރިޓީސްއާ ބެހޭ ގާނޫނުގެ ދަށުން އުފައްދާފައި އޮންނަ އިދާރާއެކެވެ.