ހުޅުމާލޭން މާލެއަށް ކުރި ޓެކްސީ ދަތުރެއްގައި، ތުއްތު ކުއްޖަކަށް ޓެކްސީ ތެރެއަށް ހޮޑުލެވުމުން ޓެކްސީ ސާފުކުރުމުގެ އަގު ކަމަށް ބުނެ 1،000ރ. ނަގައިފި އެވެ.
އުމުރުން އެއް އަހަރުގެ ކުއްޖާ ގޮަވައިގެން ދިޔަ މަންމަ، ހައްވާ މުހައްމަދު މި ހާދިސާ ސޯޝަލް މީޑިއާގައި ފޮޓޯތަކާ އެކު ހިއްސާކޮށްފައި ވާއިރު އެކަމާ ބެހޭ ގޮތުން "މިހާރު" އަށް ވެސް ވާހަކަ ދެއްކި އެވެ. އޭނާ ބުނި ގޮތުގައި ކ. މާފުއްޓަށް ދާން ހުޅުމާލެއިން މާލޭގެ ޖެޓީ ނަމްބަރު 6 އަށް ނަލަ ޓެކްސީ މެދުވެރިކޮށް އެ ދަތުރު ނެގީ އިއްޔެ ހަވީރު 4:40 ހާއިރު އެވެ.
އެ މީހުން ދިރިއުޅޭ މާފުއްޓަށް ހަވީރު 5:15 ގެ ފެރީގައި ފުރަން ޓެކްސީގައި ޖެޓީއަށް ދަނިކޮށް ކުއްޖާއަށް ހޮޑުލެވުނީ ސިނަމާލެ ބްރިޖުން މާލެއަށް އަރަނިކޮށެވެ.
"ހަމަ ކުޑަކުޑަ ތަންކޮޅެއް އިންނާނީ ބްރިޖުން މާލެއަށް ނުފޭބި. އޭރު ފަހެއް ޖެހީ ގާތްގަނޑަކަށް. ކުއްޖާ އިނީ އަޅުގަނޑުގެ އުނގުގައި ފޯނުން ކާޓޫން ބަލަން. އެހެން އިންދާ ހަމަ ކުއްލިއަކަށް އަނގައިން ހޮޑު އައީ،" އެއް އަހަރުގެ ކުއްޖާގެ އިތުރުން ހަ އަހަރުގެ ދަރިފުޅާއި 13 އަހަރުގެ ދަރިފުޅު ގޮވައިގެން ދަނިކޮށް ހިނގި ހާދިސާ ކިޔައިދެމުން އޭނާ ބުންޏެވެ.
ހައްވަ ބުނި ގޮތުގައި، ދަރިފުޅަށް ހޮޑުލެވުމުން އެ ވާހަކަ ޓެކްސީ ޑްރައިވަރުގެ ގާތުގައި ބުނުމާ އެކު، 1،500ރ. ދޭން ޖެހޭނެ ކަމަށް ވަގުތުން ބުންޏެވެ.
"އެއްވެސް އެހީތެރިކަމެއް ނުދޭ. އޭނާ ބަލައިވެސް ނުލައި ބުނެފި 1،500ރ. އަށް ވުރެ ބޮޑުވާނެއޭ، ތި ސާފުކުރަން ވަރަށް ބޮޑު އެއްޗެއް ދާނެއޭ. ދެން އެ ގަޑީގައި އަޅުގަނޑު އިނީ ހާސްވެފައި، އެ ތަނުގައި ޓިޝޫ ވެސް ހުރި ޓިޝޫ ވެސް ނުދީ، އޭނާ ހަމަ ޑިމާންޑް ކުރީ 1،500ރ. އަށް،" އޭނާ ބުންޏެވެ.
ހައްވަ ބުނި ގޮތުގައި، ޓެކްސީ ދޮންނަން 1،500ރ. އަރާނެ ކަމަށް ބުނި ނަމަވެސް ކުއްޖާއަށް ލެވުނު ހޮޑު ހުރީ އެ ކުއްޖާގެ ގައިގަ އާއި ހައްވަގެ ގައިގަ އެވެ.
"ޓެކްސީގައި ފައި ލައި ހިސާބުގައި ވެސް އެއްވެސް ވަރަކަށް ހޮޑެއް ނެތް. އަޅުގަނޑު އިނީ ކުއްޖާ އުނގަށް ލައިގެން ވީމަ އެ ކުއްޖާ އާއި އަޅުގަނޑުގެ ޖިންސުގައި ހޮނޑުލެވިފައި ހުރީ. އަނެއްކާ ހޮޑުގައި ވެސް އެއްވެސް ކާއެއްޗެއް ނެތް. ސީޓުގައި ވެސް ވަރަށް ކުޑަކޮށް ހޭކިފައި ހުރީ،" ޓެކްސީ ޑްރައިވަރު އަމަލުކުރި ގޮތުން ހިތްހަމަނުޖެހިފައި ހުރެ އޭނާ ކިޔައިދިނެވެ.
"ހޮޑުގައި ވެސް ހުރީ 4 ޖެހުމުގެ ކުރިން ބުއި ބުއްފުޅީގެ މިލްކު ގޮތަށް. އެއްވެސް ކާއެއްޗެއް ނެތް،"
ހައްވަ ބުނީ ހޮޑުލަވާ ނަމަ ބޭނުންކުރާނެ ކޮތަޅު ޓެކްސީގައި ހުންނާނެ ކަމަށް ޑްރައިވަރު ބުނި ކަމަށެވެ. އެކަމަކު އޭނާ ބުނީ ކުއްޖާއަކީ ވާހަކަ ދެއްކޭ ވަރަށް ވުރެ ކުޑަ ކުއްޖެއް ކަމަށާއި ހޮޑުލެވިޔަސް ބުނަން ނޭނގޭނެ ކަމަށެވެ.
"އެހެން ބުނާއިރަށް އަޅުގަނޑު ބުނެފިން ބޭބެއޭ މިއީ އެއް އަހަރުގެ ކުއްޖެއްގެ ވާހަކައޭ މި ދައްކަނީ. އޭނާއަކަށް ނޭނގޭނެއޭ ހޮޑުލެވިޔަސް ބުނާކަށް ވެސް. އެހެން ނޫނަސް ދުވަހަކު ވެސް ހޮޑުލީ ކުއްޖެއް ނޫނޭ ކާރަކަށް ވެސް ލޯންޗަކަށް ވެސް މި ވަރަށް ދަތުރުކުރާއިރު ވެސް."
ޓެކްސީގެ ތެރެއަށް ކުއްޖާއަށް ހޮޑުލެވުމުން އޭގެ އަގެއްގެ ގޮތުގައި 1،500ރ. ނަގަން މާ ބޮޑުކަމަށް ބުނެ މަންމަ ޝަކުވާ ކުރަން ފެށުމުން ފަހުން ޑްރައިވަރު ވަނީ 1،000ރ. އަށް ކުޑަކޮށްދީފަ އެވެ.
ހައްވަ ބުނި ގޮތުގައި ކުއްޖާއަށް ހޮޑުލެވުމުން ފައިސާއަށް ޑިމާންޑްކުރަމުން ޓެކްސީ ދުއްވީ ވެސް މަޑުންނެވެ. ފުރާގަޑި ޖެހޭ ވާހަކަ ބުނުމުން ވެސް، ފައިސާ ނުދީފާނެތީ ޑްރައިވަރު މަޑުން ދިޔަ ކަމަށް އޭނާ ތުހުމަތުކުރި އެވެ.
ޓެކްސީގައި ފައި ލައި ހިސާބުގައި ވެސް އެއްވެސް ވަރަކަށް ހޮޑެއް ނެތް. އަޅުގަނޑު އިނީ ކުއްޖާ އުނގަށް ލައިގެން ވީމަ އެ ކުއްޖާ އާއި އަޅުގަނޑުގެ ޖިންސުގައި ހޮނޑުލެވިފައި ހުރީ. އަނެއްކާ ހޮޑުގައި ވެސް އެއްވެސް ކާއެއްޗެއް ނެތް. ސީޓުގައި ވެސް ވަރަށް ކުޑަކޮށް ހޭކިފައި ހުރީ
ހައްވަ އޭނާގެ ފިރިމީހާއަށް ގުޅައި އެ ވާހަކަ ބުނުމުން އޭނާގެ ފިރިމީހާ ވަނީ ޓެކްސީ ޑްރައިވަރާ ވާހަކަ ދައްކާފައި ކަމަށާއި ގަރާޖަކަށް ގޮސް ދޮވުމަށް ހިނގާ ހަރަދު ފޮނުވުމަށް އެދި ފައިސާ ދޭނެ ކަމުގެ ޔަގީންކަން ތަކުރާރުކޮށްދޭން ޖެހުނު ކަމަށް ވެސް ހައްވަ ބުންޏެވެ.
"އަޅުގަނޑު ބުނެފިން މި ގަޑީގައި ފެރީގައި ނުދެއްވިއްޖެއްޔާ ދެން ފެރީ އިންނާނީ ރޭގަނޑު 10 ގައޭ. އެހާއިރު ކުޑަކުދިންތަކެއް ގޮވައިގެން ދަތުރުކުރަން އުނދަގޫވާނެއޭ،"
"އަޅުގަނޑުގެ ފިރިމީހާގެ ވެސް ނަމްބަރު ދިނިން. މާފުށީގައި އަޅުގަނޑުމެން ނޭނގޭ މީހަކު ނޫޅޭނެއޭ. މިހާތަނަށް ވެސް ބަޔަކަށް ދޭންޖެހޭ ފައިސާއެއް ނުދީ ނޯންނާނެއޭ ބުނެ ވަރަށް ގިނައިން އެކަމާ ވާހަކަ ދައްކައިގެން އެކަންވީ."
ހައްވަ ބުނީ އެ ވާހަކަ ސޯޝަލް މީޑިއާގައި ހިއްސާކުރަން ޖެހުނީ އަންހެނަކު އެކަނިމާއެކަނި ކުޑަކުދިންތަކެއް ގޮވައިގެން ހުއްޓާ އެފަދަ ކަމެއް ހިނގުމުން ވެސް ޑްރައިވަރުގެ ކިބައިން ވަރަށް ރަހުމުކުޑަ ގޮތަކަށް އަމަލުކުރުމުން ކަމަށެވެ. އޭނާ ވަނީ ޓެކްސީ އާއި ޑްރައިވަރުގެ ފޮޓޯ ވެސް ސޯޝަލް މީޑިއާގައި އާންމުކޮށްފަ އެވެ.
އިއްޔެ އިރުއޮއްސުނު އިރު، ހައްވަ ވަނީ ޑްރައިވަރުގެ އެކައުންޓަށް 1،000ރ. ފޮނުވައިފަ އެވެ. އޭނާ ގަރާޖަށް ދިޔަ ފޮޓޯ ފޮނުވިޔަސް އޭގެ ބިލު ވެސް ނުފޮނުވާ ކަމަށާއި އެކަމަކު އެ ފައިސާއަށް އޭނާ އެދުމުން ޓްރާންސްފާ ކޮށްފައިވާ ކަމަށް އޭނާ ބުންޏެވެ.
"ގަރާޖަކަށް ގޮސްފައި ހުރި. އެކަމަކު އޭނާ އެތަނުގައި ކުރި ކަމެއް ބިލެއް އެއްޗެއް ނެތް ފޮނުވާފައެއް. ބުނީ 1،000ރ. ފޮނުވާލާށޭ."
ހައްވަ ބުނީ ނަލަ ޓެކްސީ ސެންޓަރަށް ގުޅައި މި ވާހަކަތައް ކިޔައިދީފައި ވާނެ ކަމަށާއި އެކަމަކު ފަހުން ޚަބަރެއް ނުވާ ކަމަށެވެ.