މި އަހަރު އެންމެ ގިނަ ބަޔަކު އިންތިޒާރު ކުރަމުން އަންނަ އެއް ފިލްމަކީ ނޮވެމްބަރު މަހު ރިލީޒްކުރަން ތާވަލްކޮށްފައިވާ ސްޕަހީރޯ ފިލްމް "ޖަސްޓިސް ލީގް" އެވެ.
އޭ ލިސްޓްގެ ކާސްޓެއް ފެނިގެންދާ މި ފިލްމުގެ ޝޫޓިން ނިންމައި މިހާރު އޮތީ ޕޯސްޓް ޕްރޮޑަކްޝަން މަރުހަލާގަ އެވެ. އެކަމަކު ފިލްމުގެ ޑައިރެކްޓަރު ޒެކް ސްނައިޑާގެ ދަރިފުޅު އަމިއްލައަށް މަރުވުމުން ސްނައިޑާ މިހާރު ވަނީ ފިލްމުގެ މަސައްކަތާ ދުރަށްޖެހިލައިފަ އެވެ.
އެހެންވެ، ތާވަލްކޮށްފައި އޮތް ތާރީހުގައި ފިލްމު ސްކްރީނަށް އަންނާނެކަމާ މެދު މިހާރު ވަނީ ސުވާލު އުފެދިފަ އެވެ. ވާނާ ބްރަދާޒުން ޑިސްޓްރިބިއުޓް ކުރާ ޑީސީ ފިލްމްސްގެ "ޖަސްޓިސް ލީގް" ރިލީޒްކުރަން ނިންމާފައި ވަނީ ނޮވެމްބަރު މަހުގެ 17 ގަ އެވެ.
މިދިޔަ މާޗް މަހުގެ ތެރޭގައި ސްނައިޑާގެ އަންހެން ދަރިފުޅު އޯޓަމް ސްނައިޑާ، 20، އަމިއްލަ އަށް މަރުވުމާ ގުޅިގެން އާއިލާއަށް ވަނީ ބޮޑު ހިތާމައެއް ކުރިމަތިވެފަ އެވެ. އެ ހާދިސާއަށް ތިން މަހެއްހާ ދުވަސް ވީއިރު ވެސް ސްނައިޑާ އާއި އާއިލާއަށް އެ ހިތްދަތިކަމުން އަރައިގަނެވޭ ގޮތެއް ނުވެ އެވެ.
"މި ދަނޑިވަޅުގައި އާއިލާ ދޫކޮށްލާފައި މަސައްކަތަށް ނުކުންނާނެ ހިތްވަރެއް ނެތް. އާއިލާ އަށް އަހަރެންގެ އެބަ ބޭނުންވޭ. ބޭނުން ވަނީ އަންހެނުންނާއި ދަރިންނާ އެކު ހުރިހާ ވަގުތެއް ވެސް ހޭދަ ކުރަން،" މަރުވި ދަރިފުޅާ އެކު އަށް ކުދިން ތިބި ސްނައިޑާ، 51، ބުންޏެވެ. "ފިލްމުގެ މަސައްކަތް ކުރަންވެއްޖެ ނަމަ އާއިލާއަކަށް ވަގުތެއް ނުދެވޭނެ. އެހެންވެ މި ދަނޑިވަޅުގައި އެހެން ވާކަށް ބޭނުމެއް ނޫން."
އޭނާގެ މި ނިންމުމާ ބެހޭ ގޮތުން ވާނާ ބްރަދާޒްގެ ރައީސް ޓޮބީ އެމެރިޗް ބުނީ ސްނައިޑާގެ އާއިލާ އަށް ކުރިމަތިވެފައިވާ ހާލަތު ވަޒަން ކުރެވޭ ކަމަށާއި އެ މީހުން ތިބީ އެ އާއިލާއާ އެކުގައި ކަމަށެވެ.
އެހެންވެ ސްނައިޑާއާ ނުލައި ވެސް ފިލްމް ނިންމައި، ތާވަލުކޮށްފައިވާ ތާރީހުގައި ފިލްމް ރިލީޒް ކުރަން ވާނާ ބްރަދާޒް އިން ވަނީ އަމާޒު ހިފައިފަ އެވެ.
އެގޮތުން "ޖަސްޓިސް ލީގް" ނުނިމި ހުރި މަސައްކަތް މިހާރު ވަނީ "އެވެންޖާޒް" އާއި "ބަފީ ދަ ވެމްޕަޔާ ސްލެޔާ" ފަދަ ފިލްމްތައް ހަދާފައިވާ ޖޮސް ވެޑަންއާ ހަވާލުކޮށްފަ އެވެ.
ވާނާ ބްރަދާޒަށް މީގެ ކުރިން ވެސް މިފަދަ ތަޖުރިބާއަކާ ކުރިމަތިލާން ޖެހުނެވެ. އެއީ 2008 ވަނަ އަހަރު "ދަ ޑާކް ނައިޓް" ގެ ޝޫޓިން ނިންމާލިތަނާ އެ ފިލްމުގެ އެންމެ މުހިއްމު އެއް ތަރި ކަމަށްވާ ހީތު ލެޖާ ކުއްލިއަކަށް މަރުވުމެވެ.
އެކަމަކު އެ ފަހަރު ވެސް ވަރަށް ހިތްވަރުކޮށްގެން ވާނާ ބްރަދާޒުން ވަނީ ފިލްމްގެ މަސައްކަތް އެއްކޮށް ނިންމައި ތާވަލް ކުރި ތާރީހުގައި ފިލްމް ރިލީޒްކޮށްފަ އެވެ.
"ޖަސްޓިސް ލީގް" ގެ ކާސްޓުންގެ ތެރޭގައި ބެން އެފްލެކް، ހެންރީ ކެވިލް، ގަލް ގެޑޮޓް، ޖެސީ އެއިޒެންބާގް އަދި އެޒްރާ މިލާ ފަދަ ތަރިން ހިމެނެ އެވެ.