އަދާލަތު ޕާޓީގެ ރައީސް އިމްރާން އަބްދުﷲ އަށް ޖަލުން ދެމުން އަންނަ އިނާޔަތްތައް ކަނޑައިލީ އެއްބަސްވުމާ ހިލާފްވެ، މީޑިއާ އަށް އިންޓަވިއު ދެއްވުމުން ކަމަށް ހޯމް މިނިސްޓަރު އަޒްލީން އަހުމަދު ވިދާޅުވެއްޖެ އެވެ.
ސަން ޓީވީން ރޭ ފޮނުވި ޕްރޮގްރާމެއްގައި އަޒްލީން ވިދާޅުވީ އިމްރާން ރޯދަ މަހަށް ގޭބަންދަށް ބަދަލު ކުރުމުގެ ކުރިން އެއްބަސްވުމެއްގައި ސޮއި ކޮށްފައިވާނެ ކަމަށެވެ. އެއްބަސްވުމުގައި ކުރެވޭނެ ކަންކަމާއި ނުކުރެވޭނެ ކަންކަން އިމްރާނަށް އެނގިވަޑައިގަންނަވާނެ ކަމަށް އޭނާ ވިދާޅުވި އެވެ.
"އެކަމަކު އެ ދުވަހު ގެއަށް ވައްދަވައިގެން ޓީވީ އަށް އިންޓަވިއު ދެއްވީ. (އިމްރާން) ވިދާޅުވީ މިހެންނޭ އެބޭފުޅާގެ ސިޔާސީ މަގުސަދުތަކެއް ހާސިލު ކުރެއްވީ،" ރާއްޖެ ޓީވީ އަށް އިމްރާން ދެއްވި އިންޓަވިއު އަށް އިޝާރާތް ކުރައްވައި އަޒްލީން ވިދާޅުވި އެވެ.
ޓެރަރިޒަމްގެ ކުށުގައި 12 އަހަރުގެ ޖަލު ހުކުމެއް ތަންފީޒު ކުރަމުން ގެންދަވާ އިމްރާން ރާއްޖެ ޓީވީ އަށް ދެއްވި އިންޓަވިއުގައި ވިދާޅުވީ އަނިޔާ އިން ސަލާމަތްވާނީ ރައްޔިތުންގެ ހިތްވަރާއި ކެތްތެރިކަމުން ކަމަށެވެ. އެހެންވެ، ފަހަތަށް ނުޖެހި ތިބުމަށް އިމްރާން ގޮވައިލެއްވި އެވެ.
އަޒްލީން ވިދާޅުވި ގޮތުގައި އިމްރާން މީޑިއާ އަށް އިންޓަވިއު ދެއްވުމަކީ ކުރެވިގެން ވާނެ ކަމެއް ނޫނެވެ. އަދި އިމްރާން އެކަން ކުރެއްވީ ގަވާއިދާ ހިލާފަށް ކަމަށް ވެސް އޭނާ ވިދާޅުވި އެވެ. އަދި ރާއްޖޭގެ ސިޔާސީ މަސްރަހާ ބެހޭ ގޮތުން ވާހަކަ ދެއްކެވުމުން ހިތާމަ ކުރައްވާ ކަމަށް އޭނާ ވިދާޅުވި އެވެ.
ކަރެކްޝަނަލް ސާވިސްގެ މީޑީއާ އޮފިޝަލަކު ވިދާޅުވީ އިމްރާނަށް ދެމުން އަންނަ އިނާޔަތްތައް ވަކި މުއްދަތެއް ނެތް ގޮތަށް ކަނޑާލާފައިވާ ކަމަށެވެ. ހަފުތާއެކު އެއް ފަހަރު ދެމުން އައި ފޯނު ކޯލްގެ ހިދުމަތް މަހަކު ދެ ފަހަރު ދޭ ގޮތަށް ހަމަޖައްސާފައިވާ ކަމަށާއި އާއިލީ ބައްދަލުވުންތަކުގައި ވެސް އިމްރާނަށް ބައިވެރިވަޑައިގަތުމުގެ ފުރުސަތު މަދުވާނެ ކަމަށް އޭނާ ވިދާޅުވި އެވެ.
އިމްރާން ބަހައްޓާފައި ހުންނަނީ މީހުން މެރުން ފަދަ ބޮޑެތި ކުށްތަކުގައި ހުކުމް އިއްވާފައި ތިބި ކުށްވެރިންނަށް ހާއްސަކޮށްފައިވާ ޔުނިޓްގައި ކަމަށް އަދާލަތު ޕާޓީން ވަނީ ބުނެފަ އެވެ. އެކަމަކު ކަރެކްޝަންސްގެ މީޑިއާ އޮފިޝަލް ވިދާޅުވީ އިމްރާން ވަކި ގޮޅިއަކަށް ލާފައި ނުވާނެ ކަމަށެވެ.
ނަމަވެސް އަދާލަތު ޕާޓީން ބުނި ގޮތުގައި އިމްރާން މިހާރު ހުންނެވި ތަނަކީ އިންސާނުން ބައިތިއްބަން އެކަށީގެންވާ ތަނެއް ނޫނެވެ. އިމްރާންގެ ސިއްހީ ހާލަތު ހުރި ގޮތުން، އެ ގޮޅީގައި އޭނާ ބަހައްޓައިފި ނަމަ ހާލު އިތުރަށް ގޯސްވެދާނެ ކަމަށް ވެސް އަދާލަތު ޕާޓީން ބުންޏެވެ.
އިމްރާން ޖަލަށް ލާފައިވަނީ މެއި، 2015 ގައި އަދާލަތު ޕާޓީ އިސްވެ އިދިކޮޅު ފަރާތްތަކުން ކުރި މުޒާހަރާގައި ހަމަނުޖެހުމަށް ހިތްވަރު ލިބޭ ގޮތަށް ވާހަކަ ދެއްކެވިކަން ސާބިތު ވެގެންނެވެ. އެ މައްސަލައިގައި އޭނާ ޖަލަށް ލާން ކުރި ހުކުމް ހައި ކޯޓުން ދަމަހައްޓާފައިވާ އިރު އެ ހުކުމް ސުޕްރީމް ކޯޓުގައި އިސްތިއުނާފް ކުރާނެ ކަމަށް އިމްރާންގެ ވަކީލުން ވަނީ ބުނެފަ އެވެ.