ލިޓަސް ސާވިސް ސެންޓަރުގެ ތެރޭގައި މިދިޔަ ހޯމަ ދުވަހުގެ ރޭ މަރާލި ރ. މީދޫ، އަހުމަދު އަނަސް، 25، ގެ ގަޔަށް ވަޅި ޖެހި މީހުން ފުލުހުން އަތުލައިގެންފި އެވެ.
ފުލުހުންގެ މީޑިއާ އޮފިޝަލު ވިދާޅުވީ މިރޭ ހިންގި އޮޕަރޭޝަނެއްގައި މ. އަސަރީހިޔާގެ އިން ޖުމްލަ 12 މީހުން ހައްޔަރުކޮށްފައިވާ ކަމަށެވެ. އޭގެ ތެރޭގައި އަނަސް އަށް ހަމަލާދިނުމުގައި އަމަލީ ގޮތުން ބައިވެރިވި މީހުން ވެސް ހިމެނޭ ކަމަށް ބުންޏެވެ.
މި ފަހުން މާލޭގައި ހިންގި މާރާމާރީތަކާ ގުޅުންހުރި 34 މީހުން ހޯދުމަށް ވެސް ފުލުހުން ވަނީ އިއުލާނުކޮށްފަ އެވެ. އޭގެ ތެރެއިން ހަ މީހަކު ކުރިން ހައްޔަރުކޮށްފައިވާއިރު، މިރޭ ވެސް އޭގެ ތެރެއިން ބައެއް މީހުން ހައްޔަރުކޮށްފައިވާ ކަމަށް ފުލުހުން ބުންޏެވެ. އަދި މިރޭ ހައްޔަރުކުރި މީހުންގެ ތެރޭގައި ކުޑަކުދިން ވެސް ހިމެނޭކަން ފާހަގަކުރި އެވެ. ނަމަވެސް އިތުރު ތަފުސީލެއް ހާމައެއް ނުކުރެ އެވެ. މާލޭގައި މި ފަހުން ހިންގި މާރާމާރީތަކުގައި ދެ ޒުވާނަކު ވަނީ މަރުވެފަ އެވެ. އެއީ ހއ. ތަކަންދޫ، އިބުރާހިމީ ހިޔާ، ނަދީމް އަބުދުއްރަހީމް، 24، އާއި އަނަސް އެވެ. ނަމަވެސް ނަދީމްގެ މަރާ ގުޅިގެން އަދި މީހަކު ހައްޔަރުކުރި ކަމެއް ސާފެއް ނުވެ އެވެ.