އިންޑިއާގެ ޓާޓާ ކުންފުނިން އިމާރާތްކޮށްފައިވާ ގާކޮއްޓާއި އަރަބިއްޔާގެ ފްލެޓްތަކަށް ދައްކަން ޖެހޭ ދެ މިލިއަން ރުފިޔާގެ ލޯނު މިއަދަށް ހަމަނުޖެހޭ ފަރާތްތަކަށް ފްލެޓް ގެއްލިދާނެ ކަމުގެ ބިރުހީވެއްޖެ އެވެ.
ޓާޓާ ފްލެޓްތަކަށް ގުރުއަތުން ހޮވުނު 268 މީހުންގެ ތެރެއިން ފައިސާ ދައްކަން ދިން މުއްދަތު މިދިޔަ ޖެނުއަރީ 26 ވަނަ ދުވަހަށް ހަމަވިއިރު 47 މީހަކަށް ފައިސާ ދައްކައިދޭން އިސްލާމިކް ބޭންކު (އެމްއައިބީ) އިން ވަނީ ނިންމައިފަ އެވެ. އެ ފްލެޓަށް ހޮވުނު މީހުންގެ ތެރެއިން އެ ބޭންކުން ފައިނޭންސް ހޯދުމަށް 100 މީހަކު ހުށަހެޅި އެވެ. އޭގެ ތެރެއިން ޝަރުތު ހަމަވެ ލޯނު ހަމަޖެހުނީ 47 މީހަކަށެވެ.
އަރަބިއްޔާ ހުރި ބިމުގައި ހަދާފައިވާ "މާލޭ ގްރޭންޑް" އަދި ގާކޮށީގައި ހަދާފައިވާ "މާލޭ ސްކެއާ"ގެ ފްލެޓްތައް ލިބުނު މީހުން، ލޯނު ލިބުނުކަން މިއަދުގެ ނިޔަލަށް އެޗްޑީސީ އަށް އަންގަން ޖެހެ އެވެ.
ލޯނު ހަމަނުޖެހޭ މީހުންނަށް އިތުރު އެއް މަސް ދުވަހުގެ މުއްދަތެއް ދިނީ މިދިޔަ އޮގަސްޓް މަހުގެ ތެރޭގަ އެވެ. އެ މުއްދަތު މިއަދަށް ހަމަވިއިރު ލޯނު ހަމަޖެހުނު އަދަދެއް އަދި ސާފެއް ނުވެ އެވެ.
ލޯނު ހަމަނުޖެހޭ މީހުންނަށް ގާކޮއްޓާއި އަރަބިއްޔާގެ ފްލެޓްތައް ބަލަހައްޓަމުން އަންނަ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފޮނުވާފައިވާ ސިޓީގައި އެދިފައި ވަނީ ފްލެޓަށް ދައްކަން ޖެހޭ ދެ މިލިއަން ރުފިޔާގެ ލޯނު ހަމަޖައްސައި އެކަން އެ ކޯރަޕޭޝަނަށް އެންގުމަށެވެ.
"އަދި ދަންނަވަމެވެ. ދެންނެވުނު މުއްދަތުގެ ތެރޭގައި ލޯނު ހަމަޖެހިފައިނުވާ ނަމަ، ފްލެޓް ގަތުމަށް ތިޔަ ފަރާތަށް ލިބިފައިވާ ފުރުސަތު ގެއްލޭނެ އެވެ. އަދި ތިޔަ ފަރާތަށް ހުޅުމާލެ އިން އަގުހެޔޮ ބޯހިޔާވަހިކަމުގެ މަޝްރޫއުއަކުން އަދި ކަނޑައެޅޭ ޕްރައޮރިޓީ ލިސްޓެއްގެ ދަށުން ފްލެޓް ލިބޭނެ މަގު ސަރުކާރުން ތަނަވަސްކޮށްދެއްވާނެ ކަމުގައި ދެންނެވީމެވެ،" އެޗްޑީސީން ފޮނުވި ސިޓީގައިވެ އެވެ.
އެޗްޑީސީގެ މެނޭޖިން ޑިރެކްޓަރު މުހައްމަދު ސައިމަން މިއަދު ވިދާޅުވީ އަރަބިއްޔާ އާއި ގާކޮށި ފްލެޓްތަކަށް އެންމެ ފަސޭހަ އިން ފްލެޓަށް ވަދެވޭނެ އިންތިޒާމްތައް މި ސަރުކާރުން ހަމަޖައްސައިދޭން މަސައްކަތް ކުރި ކަމަށެވެ. ލޯނު ދައްކަން އުނދަގޫ ފަރާތްތަކަށް ހާއްސަކޮށްގެން ލޯން ސްކީމެއް ވެސް ހުޅުވާލި ކަން އޭނާ ފާހަގަކުރެއްވި އެވެ.
ސައިމަން ވިދާޅުވި ގޮތުގައި މިހާތަނަށް ވެސް ލޯނު ހަމަނުޖެހުނު މީހުންނަށް ދެވެން އޮތް ލުޔެއް ސަރުކާރުން ވަނީ ދީފަ އެވެ.
"މިކަމުގައި ކުރިއަށް އޮތް ތަނުގައި ވެސް ސަރުކާރަށް ކޮށްދެވެން އޮތް ކަމެއް ކޮށްދޭނެ،" ސައިމަން ވިދާޅުވި އެވެ.
ކުރިން އަރަބިއްޔާ ހުރި ބިމުގައި 90 ފްލެޓް އަދި ގާކޮށީގައި 190 ފްލެޓް ތަރައްގީކޮށްފައިވެ އެވެ. އޭގެ އަގުގެ ގޮތުގައި ސަރުކާރުން ވަނީ، އިންޑިއާގެ ޓާޓާ ކުންފުނީގެ ހިއްސާ އޮންނަ އެޕެކްސް ރިއަލިޓީ އަށް 277 މިލިއަން ރުފިޔާ އެއްފަހަރާ ދައްކައިފަ އެވެ.
