ރާއްޖޭގައި އުފެދުނު އެންމެ މޮޅު އަންހެން ޓޭބަލް ޓެނިސް ކުޅުންތެރިޔާ މުއީނާ މުހައްމަދު އަތުން މޮޅުވެ ގައުމީ ޓޭބަލް ޓެނިސް މުބާރާތުގެ އަންހެން ސިންގަލްސް ޗެމްޕިއަންކަން ޖެހިޖެހިގެން ދެ ވަނަ ފަހަރަށް އައިޝަތު ރަފާ ނާޒިމް ހޯދިއިރު ފިރިހެން ސިންގަލްސް ޗެމްޕިއަންކަން މޫސާ މުންސިފް އަހުމަދު ހޯދައިފި އެވެ.
މުބާރާތުގެ ޗެމްޕިއަންކަން ޖެހިޖެހިގެން 13 އަހަރު މުއީނާ ހޯދާފައިވަނިކޮށް 2016 ވަނަ އަހަރު އޭނާ ބަލިކޮށް ތަށި ހޯދި އުމުރުން 14 އަހަރުގެ ރަފާ ރޭގެ ފައިނަލް މެޗު ކާމިޔާބުކުރީ ސީދާ ހަތަރު ސެޓުން މޮޅުވެގެންނެވެ.
އެކަމަކު މި ފަހަރުގެ މުބާރާތާ މުއީނާ ކުރިމަތިލީ ކަކުލަށް ލިބުނު އަނިޔާއަކަށް ފަރުވާ ހޯދުމަށް އަހަރެއްހާ ދުވަހު ކުޅުމާ ދުރުގައި ހުރުމަށް ފަހު އެވެ. އަދި ބުރަކަށްޓަށް ލިބުނު އަނިޔާއަކާ ގުޅިގެން މިދިޔަ ބުރާސްފަތި ދުވަހުން ފެށިގެން އޭނާ ހޮސްޕިޓަލުގައި އެޑްމިޓްވެސް ކުރި އެވެ.
މުބާރާތުގެ ކުރިން މުއީނާ ބުނީ އަދިވެސް އޭނާ ސަތޭކަ ޕަސެންޓް ފިޓް ނޫން ކަމަށާއި އެހެންވެ މި ފަހަރު ނުކުންނަނީ ސީދާ ޗެމްޕިއަންކަން ހޯދުމަށް އަމާޒުކޮށްގެން ނޫން ކަމަށެވެ.
"އަޅުގަނޑުގެ އުއްމީދަކީ ފައިނަލުގައި ކުޅުން. ބޮޑު އަނިޔާއަކަށް ފަހު އެހާ ދިގު މުއްދަތެއްގައި ކުޅުމާ ދުރުގައި ހުރެފައި ނުކުންނައިރު ސީދާ ތަށްޓަށް ޓާގެޓެއް ނުކުރެވޭ. ސަބަބަކީ އަދިވެސް ފުލް ފޯމަށް ނޭޅޭތީ. މިއީ އަސްލު އެނބުރި އައުމުގެ ގޮތުން ކުޅޭ މުބާރާތެއް،" ގައުމީ ޗެމްޕިއަންކަން ޖުމްލަ 15 ފަހަރު ހޯދާފައިވާ މުއީނާ ބުންޏެވެ.
މުބާރާތުގެ ޗެމްޕިއަންކަން ހޯދި ރަފާ އަކީ ވަރަށް އުއްމީދީ ކުޅުންތެރިޔެކެވެ. އޭނާ ވަނީ މުބާރާތުގެ އަންހެލް ޑަބަލްސް އަދި މިކްސް ޑަބަލްސް ޗެމްޕިއަންކަން ވެސް ހޯދައިފަ އެވެ.
އަންހެން ޑަބަލްސް ޗެމްޕިއަންކަން ރަފާ އާއި ލައިސާ ފަތުހުﷲ އިސްމާއިލްގެ ޕެއާ ހޯދީ ތަޖުރިބާކާރު ދެ ކުޅުންތެރިން ކަމަށްވާ ފާތިމަތު ޖުމާނާ ނިމާލާއި މަރިޔަމް ޝަފީގް އަތުން މޮޅުވެގެންނެވެ. މިކްސް ޑަބަލްސް ޗެމްޕިއަންކަން ރަފާ އާއި މުހައްމަދު ޒީސްތު ނަސީމް ހޯދީ މުންސިފާއި އައިޝަތު ފަދުވާ ރަޝީދުގެ ޕެއާ ބަލިކޮށްގެންނެވެ.
މުބާރާތުގެ 16 އަހަރުން ދަށުގެ ފައިނަލުގައި މިރޭ ރަފާ ނުކުންނާނީ ރާއްޖޭގައި މި ވަގުތު އެންމެ އުއްމީދީ ކުޅުންތެރިޔާ ފާތިމަތު ދީމާ އަލީއާ ދެކޮޅަށެވެ. އޭނާ އަކީ އަކީ ލަންކާ އާއި މެލޭޝިއާގެ މުބާރާތްތަކުގައި ވާދަކޮށް ކާމިޔާބު ހޯދާފައިވާ ވަރަށް އުއްމީދީ ކުޅުންތެރިޔެކެވެ.
ވަރަށް ޖޫނިއާ އުމުރެއްގައި 2015 ވަނަ އަހަރު އިންޑިއަން އޯޝަން އައިލެންޑް ގޭމްސްގައި ގައުމީ ޓީމް ތަމްސީލްކުރި ރަފާ ވަނީ 2016 ވަނަ އަހަރު ސައުތު އޭޝިއަން ޖޫނިއާ ޓޭބަލް ޓެނިސް ޗެމްޕިއަންޝިޕުގެ 15 އަހަރުން ދަށުގެ ޑަބަލްސް ކެޓަގަރީން ރާއްޖެ އަށް ރިހި މެޑަލް ހޯދައިދީފަ އެވެ.
ގައުމީ މުބާރާތުގެ ފިރިހެން ސިންގަލްސް ޗެމްޕިއަންކަން ރާއްޖޭގެ އެންމެ މޮޅު ފިރިހެން ކުޅުންތެރިޔާ މުންސިފް ހޯދީ ޒީސްތު އަތުން 4-3 ސެޓުން މޮޅުވެގެންނެވެ. މުބާރާތުގެ ފުރަތަމަ ޑިވިޝަނުގެ ފިރިހެން ޑަބަލްސް ޗެމްޕިއަންކަން ހޯދީ މުންސިފާއި އަލީ އާދަމް މަނިކެވެ. އެ ޕެއާ މޮޅުވީ ޒީސްތު އާއި މުހައްމަދު ޝައްފާން އިސްމާއިލް އަތުންނެވެ.
މުބާރާތުގެ ފުރަތަމަ ޑިވިޝަން އަންހެން ޓީމު އިވެންޓުގެ ޗެމްޕިއަންކަން ހޯދީ ޓީރެކްސް ބަލިކޮށް ހިންނަވަރު ހައިނަސް އެވެ. އަދި 16 އަހަރުގެ ދަށުގެ ފިރިހެން ސިންގަލްސް ޗެމްޕިއަންކަން ހޯދީ މުހައްމަދު ތަބިން ސުޖާއު ބަލިކޮށް އަކްހަރް އަހުމަދު ހާލިދެވެ.
މުބާރާތުގެ އެއް ވަނަ ޑިވިޝަން ފިރިހެން ޓީމު އިވެންޓުގެ ފައިނަލުގައި މިރޭ ބައްދަލުކުރާނީ ރައީސުލްޖުމްހޫރިއްޔާގެ އޮފީހުގެ އިޖްތިމާއީ ކްލަބާއި ނިއު ރޭޑިއަންޓް ސްޕޯޓްސް ކްލަބެވެ.