މިދިޔަ ހުކުރު ދުވަހުގެރޭ، ދިވެހި ޓޭބަލް ޓެނިހުގެ ތާރީހު ބަދަލުވެގެން ދިޔައީ ޖެހިޖެހިގެން 13 އަހަރު ގައުމީ ސިންގަލްސް ޗެމްޕިއަންކަން ހޯދި މުއީނާ މުހައްމަދު އަތުން ކުޑަކުޑަ އައިޝަތު ރަފާ ނާޒިމް ހޯދި ކާމިޔާބީއާ އެކު އެވެ. އުމުރުން 13 އަހަރުގެ ކުޅުންތެރިޔާގެ މި ކާމިޔާބީއަކީ ޓޭބަލް ޓެނިހަށް ލިބުނު ކުރިއެރުމެއްގެ ގޮތުގައި ގިނަ ބަޔަކު ދެކެ އެވެ. މުއީނާ ވެސް އެކަން ނަގަނީ ވަރަށް ޕޮޒިޓިވްކޮށެވެ.
"ކުޅިވަރުގައި އޮންނާނީ މޮޅުވުމާއި ބަލިވުމުން. ބަލިވުން އެއީ އަދި ނިމުމެއް ނޫން،" މުއީނާ ބުންޏެވެ. "ކުޅުމަކަށް ބަދަލެއް ނާންނާނެ އަދި އުއްމީދު ގެއްލުވައެއް ވެސް ނުލަން. އަދިވެސް އޮތީ ހަމަ ކުރިއަށް."
މުއީނާ އަށް ވުރެ ހުރިހާ ގޮތަކުން ތަޖުރިބާ މަދު އަދި އުމުރުގެ ގޮތުން ވެސް ހަގު ކުޅުންތެރިއެއްގެ އަތުން ބަލިވި ނަމަވެސް މެޗަށް ފަހު އޭނާ ދެއްކި ނަމޫނާ އަށް ކުޅިވަރުގެ އިސް ފަރާތްތަކުން އަންނަނީ ތައުރީފު އޮހެމުންނެވެ. މުއީނާ ބުނީ އޭނާ ނާކާމިޔާބުވިޔަސް އުފާވަނީ އާ ކުޅުންތެރިން ކުރިއަރާތީ ކަމަށެވެ.
"އާ ކުޅުންތެރިޔަކު ކުރިއަރާތަން ފެނުމަކީ ވަރަށް ބޮޑު އުފަލެއް. އަސްލު މާބޮޑަށް ލަސްވެސް ވެއްޖެ އާ ޗެމްޕިއަނެއް ނުފެނި،" 2011 ވަނަ އަހަރުގެ އިންޑިއަން އޯޝަން އައިލެންޑް ގޭމްސް އިން ރިހި މެޑަލް ހޯދާފައިވާ މުއީނާ ބުންޏެވެ. "ބަލިވި ނަމަވެސް އެގޮތަށް ބަލާއިރު އުފާވި ޒުވާން ކުޅުންތެރިޔަކު އެވަރުގެ ކާމިޔާބެއް ހޯދުމުން."
އޭނާ ވަނީ ކުރިއަރަން ތިބި ކުދިންނަށް ނަސޭހަތެއް ވެސް ދީފަ އެވެ. އެއީ މިކަމަށް ޑެޑިކޭޓްވުމާއި ވަގުތު ދިނުމާއި ބުރަކޮށް މަސައްކަތްކުރުން އަދި އުއްމީދު ކަނޑާނުލުމެވެ.
"ތިބޭނެ އިދިކޮޅަށް އަބަދުވެސް ސަޕޯޓަރުންނާއި ކުޅުންތެރިން. އެ ހުރިހާ ކަމަކާ ކުރިމަތިލައިގެން ހިތްވަރާ އެކު ކެތްތެރިކަމާ އެކު މަސައްކަތްކުރަން ޖެހޭނީ. މުއީނާ އަށް ވެސް މިއަދު މިހިސާބަށް އާދެވުނީ ކުޑައިރުއްސުރެ ކުރިމަތިވި އެތަކެއް ހުރަސްތަކެއް ގިރާކޮށްފައި،" އޭނާ ބުންޏެވެ.
މުއީނާ ބުނީ ރާއްޖޭގައި ވެސް ހުނަރުވެރި ގިނަ ކުޅުންތެރިން އުފެދޭ ކަމަށާއި އެކަމަކު ގިނަ ކުޅުންތެރިން ވަކި ހިސާބަކުން ގެއްލެނީ ކަމަށެވެ. އަދި ގިނަ ކުދިންނަށް މިކަމަށް ވަގުތު ނުދެވޭ ކަމަށާއި މި ކުޅިވަރަށް ލޯބި ނެތި ސަމާލުކަން ވެސް ނުދެވެންޏާ ކުރިނާރާނެކަން އޭނާ ފާހަގަކުރި އެވެ.
"އެކަމަކު މިހާރު އޮތް އަންހެން ޓީމު ވަރަށް ވަރުގަދަ ހާއްސަކޮށް ފިރިހެން ޓީމާ ބަލާއިރު. ވަރަށް ކޮމިޓެޑް ކުޅުންތެރިން އެބަތިބި. އުއްމީދުކުރެވޭ ކުރިމަގުގައި ރަނގަޅު ކާމިޔާބަކަށް،" އޭނާ ބުންޏެވެ.
މުއީނާ ވެފައިވަނީ ރާއްޖޭގެ ގައުމީ ޗެމްޕިއަންކަން ޖެހިޖެހިގެން އެންމެ ގިނަ އަހަރު ހޯދި ކުޅުންތެރިޔާ އަށެވެ. މި ފަހަރު ބަލިވި ނަމަވެސް އޭނާގެ ނަން ރަން އަކުރުން އަދިވެސް ފަވާލެވެނީ އެހެންވެ އެވެ. އޭނާ 2003 ވަނަ އަހަރު ތަށި ހޯދިއިރު، ޖެހިޖެހިގެން 13 އަހަރު ހޯދިދާނެ ކަމަށް އުއްމީދު ކުރި ހެއްޔެވެ؟
"އެއްވެސް އިރަކު މުބާރާތަކަށް ނުކުންނަނީ އެފަދަ ވިސްނުމުގައެއް ނޫން. އަބަދުވެސް ބޭނުންވަނީ ވީ އެންމެ ރަނގަޅަކަށް ކުޅެ ދެވޭ އެންމެ މައްޗަކަށް ދާން. ކުރިއަށް އޮންނަ މުބާރާތަކަށް ނުވިސްނަން. އެ އަހަރު، އެއިރަކު ވާދަކުރާ މުބާރާތަކާ މެދު އެކަނި ވިސްނަނީ. މިފަދަ ރެކޯޑަކާ ހަމަޔަށް ދިއުމުގެ ވިސްނުމެއް އެއްވެސް އިރަކު ނޯވޭ،" މުއީނާ ބުންޏެވެ.