ސްޓްރީމިން ސާވިސް ދޭ ނެޓްފްލިކްސް އިން މި ފަހުން ފިލްމްތަކުގެ ޑިސްޓްރިބިއުޝަނާ ހަވާލުވި ވިޔަސް، އެ ކުންފުނިން ސިނަމާތަކުގައި ކުރާ "ކުދި ވިޔަފާރި" އާ އެކު، އޮސްކާ ފަދަ ބޮޑު އެވޯޑަކަށް ނެޓްފްލިކްސްގެ ފިލްމްތައް ވާދަކުރުމުގެ ހައިސިއްޔަތު ދޭން ނުޖެހޭ ކަމަށާއި އެ މީހުންގެ ފިލްމްތަކަށް އޮސްކާ ހައްގު ވެސް ނުވާނެ ކަމަށް، މަޝްހޫރު ޑައިރެކްޓަރު ސްޓީވެން ސްޕީލްބާގް ބުނެފި އެވެ.
އޮސްކާ ހާސިލްކޮށްފައިވާ ޑައިރެކްޓަރު އައިޓީވީ ނިއުސް ދިން އިންޓަވިއުއެއްގައި ބުނީ އޮސްކާއަކީ ގިނަ އަދަދެއްގެ ސިނަމާތަކުގައި ރިލީޒްކޮށްގެން، ފުޅާކޮށް ވިޔަފާރިކުރާ ބޮޑު ސްކްރީން ފިލްމްތަކަށާއި ތިއޭޓަރުތަކަށް ގެންނަ ޑޮކިއުމަންޓްރީތައް ވާދަކުރަން ޖެހޭ އެވޯޑެއް ކަމަށެވެ.
"އަހަރެން ގަބޫލެއް ނުކުރަން ހަފުތާއެއްހާ ދުވަހަށް ނެޓްފްލިކްސް އިން ތިއޭޓަރުގައި ފިލްމް ދައްކާފައި، ދުވަސްކޮޅަކުން ސްޓްރީމިން ސާވިސް އަށް އެ އުފެއްދުންތައް ދޫކޮށްލާތީ އެ މީހުންގެ ފިލްމްތައް އޮސްކާ އަށް ވާދަ ކުރަން ފުރުސަތު ދޭން ޖެހޭނެ ކަމަކަށް. އެކަހަލަ އުފެއްދުންތަކެއް އޮސްކާ އަށް ކޮލިފައިކޮށްގެނެއް ނުވާނެ،" މި މަހުގެ 29 ގައި ރިލީޒް ކުރާ "ރެޑީ ޕްލެޔާ ވަން" ގެ ޑައިރެކްޓަރު ބުންޏެވެ. "އޮސްކާ އަށް ވާދަ ކުރަން ފުރުސަތު ދޭން ޖެހޭނީ ތިއޭޓަރުތަކުގައި ފުޅާކޮށް، ރިލީޒް ކުރާ ފިލްމްތަކަށް. ގިނަ ބަޔަކަށް އެ އެ އުފެއްދުމެއް ސިނަމާތަކުގައި ބެލުމުގެ ފުރުސަތު ލިބޭ އުފެއްދުންތަކަށް."
ސްޕީލްބާގް ބުނި ގޮތުގައި ނެޓްފްލިކްސްގެ އުފެއްދުންތަކަށް އޮތް އެވޯޑަކީ ޓީވީ އުފެއްދުންތަކަށް ހާއްސަކޮށްގެން ދޭ އެމީ އެވޯޑެވެ.
މި އަހަރުގެ އޮސްކާ އަށް ބަލާ އިރު ނެޓްފްލިކްސް އިން ޑިސްޓްރިބިއުޓް ކުރި ޑީ ރީޒްގެ ފިލްމް "މަޑްބައުންޑް" ވަނީ އެންމެ މޮޅު ފިލްމްގެ އޮސްކާ އަށް ވާދަކޮށްފަ އެވެ. އަދި 2016 ގެ އޮސްކާގައި ތިއޭޓަރުގައި ރިލީޒް ވެސް ނުކުރާ ނެޓްފްލިކްސްގެ "ތާޓީންތު" އޮސްކާގެ އެންމެ މޮޅު ޑޮކިއުމަންޓްރީ އަށް ވެސް ވާދަ ކުރި އެވެ.
މި އަހަރުގެ އޮސްކާގެ މޮޅު ފިލްމަށާއި މޮޅު ޑައިރެކްޓަރުގެ މަގާމަށް ވާދަ ކުރި "ޑަންކާކް" ގެ ޑައިރެކްޓަރު ކްރިސްޓޯފާ ނޯލަން ވެސް ވަނީ މީގެ ކުރިން ނެޓްފްލިކްސް އަށް މި މައްސަލާގައި ބަހުގެ ހަމަލާތައް ފޮނުވައިފަ އެވެ. އެކަމަކު ފަހުން ވަނީ ނޯލަން ވަނީ އޭނާ ދެއްކި ވާހަކަތަކަށް ނެޓްފްލިކްސްގެ ޗީފް ކޮންޓެންޓް އޮފިސަރު (ސީސީއޯ) ޓެޑް ސަރަންޑޯޒްގެ ކިބައިން މައާފަށް އެދިފަ އެވެ.