ކުރިއަށް އޮތް ފިތުރު އީދުގައި ރިލީޒްކުރަން ނިންމާފައިވާ ސަލްމާން ހާންގެ ސަސްޕެންސް ތުރިލާ "ރޭސް 3" ގެ ޓްރެއިލާ ދައްކާލައިފި އެވެ.
ކުރިން ވެސް ލަފާކުރި ގޮތަށް ޓްރެއިލާ ވަރަށް ފުރިހަމަވެފައި، ޝައުގުވެރި އެވެ. މީގެ މަންޒަރުތަކުގެ ތެރެއަށް ދެމިގަންނަ އިރު، ވަރުގަދަ އެކްޝަންތަކާއި ވަރުގަދަ މިއުޒިކާއި ޑައިލޮގްތަކާއި ލޮކޭޝަންތަކާއި ތަރިންގެ ރީތިކަމާއި ފިލްމްގެ ސްޓައިލިޝްކަން ފާހަގަކުރެވެ އެވެ. ހާއްސަކޮށް ޓްރެއިލާ އިން ފާހަގަކުރެވުނީ "ރޭސް 3" ގައި ވަރަށް ވެސް ތަފާތު، އެހާމެ ގިނަ އެކްޝަން މަންޒަރުތަކެއް ހިމެނޭނެ ކަމެވެ.
މި ފަހަރު ރެމޯ ޑި ސޫޒާގެ ޑައިރެކްޝަނާ އެކު މި ފިލްމް ބެލުންތެރިންނާ ހަމައަށް އަންނަ އިރު، މި ފިލްމްގެ އެންމެ ބޮޑު ހައިލައިޓަކީ ސަލްމާން ހާނެވެ.
މިއީ "ރޭސް" ފްރެންޗައިޒްގެ ފިލްމަކުން އޭނާ ފެނިގެންދާ ފުރަތަމަ ފަހަރު ވެސް މެ އެވެ. ދެން ކާސްޓުންގެ ތެރޭގައި ހިމެނޭނީ "ރޭސް 2" ގައި ވެސް މުހިއްމު ރޯލެއް ކުޅެފައިވާ ބަތަލާ ޖެކްލިން ފެނަންޑޭޒާއި ފުރަތަމަ ދެބައިން ވެސް ފެނިފައިވާ އަނިލް ކަޕޫރެވެ.
މި ކާސްޓާ ދެން ގުޅޭ ތަރިންގެ ތެރޭގައި ސާގިބް ސަލީމާއި ޑެއިޒީ ޝާހާއި ބޮބީ ޑިއޯލް ވެސް ހިމެނެ އެވެ. "ރޭސް 3" ގެ ޓްރެއިލާ އިން ފެންނަ ގޮތުގައި ޑެއިޒީ އާއި ސާގިބް ފިލްމުން ފެނިގެން ދާނީ އަނިލްގެ ދަރިންގެ ގޮތުގަ އެވެެ. އަދި މުޅި ކާސްޓުންގެ ކުރިމަތިލުންތައް އެކި ގޮތްގޮތަށް ފެނިގެން ދާނެ އެވެ.
މި ފަހަރު ފިލްމްގެ ހާއްސަ ލަވައަކުން ބަތަލާ ސޮނާކްސީ ސިންހާ ވެސް ފެނިގެން ދާނެ އެވެ.
ސަލްމާން ހާންގެ ފިލްމް ކުންފުނި އެސްކޭއެފާއި ރަމޭޝް ތައުރާނީ ޓިޕްސް ގުޅިގެން ގެނެސްދޭ "ރޭސް 3" ޝޫޓްކޮށްފައި ވަނީ އިންޑިއާ އާއި ތައިލެންޑާއި އަބޫދާބީގަ އެވެ.
ބޮކްސް އޮފީހުގައި ބޮޑު ކާމިޔާބީއެއް ހޯދި "ރޭސް" ގެ ފުރަތަމަ ދެ ފިލްމް ޑައިރެކްޓް ކުރީ އައްބާސް-މަސްތާން އެވެ. ފުރަތަމަ ބައި ސިނަމާތަކަށް އައީ 2008 ގަ އެވެ. ދެވަނަ ބައި ރިލީޒް ކުރީ 2013 ގަ އެވެ.