ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު، މެލޭޝިއާގެ ވެރިކަން ކުރާ ކޯލިޝަންގެ ލީޑަރު، އަންވަރު އިބްރާހިމްއާ އިއްޔެ ބައްދަލުކުރައްވައިފި އެވެ.
އަމިއްލަ އަށް އަރުވާލެއްވިގެން އިނގިރޭސި ވިލާތުގައި ދިރިއުޅުއްވާ ޖަމީލް، ލަންޑަންގައި އަންވަރާ ބައްދަލުކުރައްވައި ރާއްޖޭގެ ސިޔާސީ މަސްރަހާ ގުޅޭ ގޮތުން ވަނީ މަޝްވަރާ ކުރައްވައިފަ އެވެ. ރާއްޖޭގައި ޑިމޮކްރަސީއަށް ދިމާވެފައިވާ ގޮންޖެހުންތަކާ ގުޅޭ ގޮތުން ދެ ބޭފުޅުން ވާހަކަ ދެއްކެވި އެވެ.
ރާއްޖޭގެ ރިޔާސީ އިންތިޚާބު އަންނަ ސެޕްޓެމްބަރު މަހު އޮންނައިރު، ޑރ. ޖަމީލް މަސައްކަތް ކުރައްވަނީ ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ އެޑްވައިޒަރެއްގެ ގޮތުގަ އެވެ.
މެލޭޝިއާގެ ބޮޑުވަޒީރު މަހާތިރު މުހައްމަދާއި އަންވަރަކީ ކުރިން ވަރަށް ގާތް ދެ ބޭފުޅުންނެވެ. އެކަމަކު ސިޔާސީ ގޮތުން ދެ ބޭފުޅުން ޚިޔާލު ތަފާތުވެ، މީގެ 20 އަހަރު ކުރިން އަންވަރު މަގާމުން ދުރުކޮށް 1998 ވަނަ އަހަރު، ހަ އަހަރަށް ޖަލަށްލީ މަހާތިރުގެ ވެރިކަމުގަ އެވެ. އަންވަރުގެ މައްސަލަ މެލޭޝިއާގެ އެންމެ މަތީ ކޯޓުން ބެލުމަށް ފަހު އޭނާ މިނިވަން ކުރީ 2004 ވަނަ އަހަރު އެވެ. އަންވަރު ދެ ވަނަ ފަހަރަށް ޖަލަށްލީ ކުރީގެ ބޮޑުވަޒީރު ނަޖީބު ރައްޒާގުގެ ވެރިކަމުގައި 2015 ވަނަ އަހަރު އެވެ. އެތައް އަހަރެއް ވަންދެން ބޮޑުވަޒީރުކަން ކުރެއްވުމަށް ފަހު އިސްތިއުފާ ދެއްވި، މިހާރު އުމުރުން 92 އަހަރުގެ މަހާތީރު އަލުން ވެރިކަމަށް ވަޑައިގަތުމަށް ފަހު އަންވަރަށް ވަނީ ޝާހީ މައާފެއް ހޯއްދަވައިދެއްވައި މިނިވަންކޮށްފަ އެވެ. އެހެންކަމުން، ސިޔާސީ ދާއިރާގައި ހަރަކާތްތެރިވުމަށް އަންވަރަށް މިހާރު ހުރަހެއް ނެތެވެ.