ރަޖްނީކާންތުގެ ސައިންސް ފިކްޝަން ފިލްމް "2.0" ރިލީޒް ކުރާނެ ކަމަށް ބުނެ އެކި ތާރީހުތައް ދޭތެރެ ދޭތެރެއިން އިއުލާން ކުރަނީ 2016 އިން ފެށިގެންނެވެ. އެކަމަކު ބެލުންތެރިންނާ ހަމައަށް ފިލްމް ގެނެސް ނުދެވި ވަރަށް ބޮޑަށް ދިގުލައިގެން ގޮސްފައި ވަނިކޮށް އަނެއްކާ ވެސް އާ ތާރީހެއް އިއުލާންކޮށްފި އެވެ.
މި ފަހަރު "2.0" ސިނަމާތަކަށް ގެންނާނެ ކަމަށް އިއުލާން ކުރި ތާރީހަކީ ނޮވެމްބަރު، 29، 2018 އެވެ.
ފިލްމްގެ ޑައިރެކްޓަރު ޝަންކަރް ކުރި ޓްވީޓެއްގެ އިތުރުން މަޝްހޫރު ފިލްމް ކްރިޓިކް ތަރަން އަދާޝް ވެސް ވަނީ ފިލްމް އެ ތާރީހުގައި ފިލްމް އަންނާނެ ކަމަށް ބުނެ އެކަން ޓްވިޓާގައި ހިއްސާކޮށްފަ އެވެ. އެއާ އެކު ވަނީ "2.0" ގެ އާ ޕޯސްޓަރެއް ވެސް ދައްކާލައިފަ އެވެ.
ޝަންކަރު ބުނި ގޮތުގައި ފިލްމްގެ ރިލީޒް ނުކުރި ލަސްވެގެން ދިޔައީ މީގެ ސްޕެޝަލް އިފެކްޓްސްގެ މަސައްކަތް ނުނިމިގެންނެވެ. އެކަމަކު އެ މަސައްކަތާ ހަވާލުވި ޓީމުން މިހާރު ފިލްމްގެ މަސައްކަތް އެއްކޮށް ފުރިހަމަކޮށް ހަވާލުކުރަން ތައްޔާރުވަމުން އަންނާތީ ނޮވެމްބަރު، 29 ގައި ފިލްމް ދެެއްކޭނެ ކަމަށް ބުންޏެވެ.
އަކްޝޭ ކުމާރް ވަރަށް ތަފާތު ގޮތަކަށް ފިލްމްގެ ވިލަންގެ ރޯލުން ފެނިގެންދާ "2.0" އަކީ 2010 ގައި ޝަންކަރް، ރަޖްނީކާންތާއި އައިޝްވާރިޔާ ރާއީ ލީޑް ރޯލަށް ލައިގެން ގެނެސް ދިން ކާމިޔާބު ފިލްމް އެންތިރަމް (ރޮބޮޓް) ގެ ދެވަނަ ބައެވެ. އެކަމަކު މި ފަހަރު ފިލްމްގެ ބަތަލާއަކީ އެމީ ޖެކްސަން އެވެ.
ރިޕޯޓްތައް ބުނާ ގޮތުން "2.0" ގެ ހާއްސަ ފެނިލުމަކުން އައިޝްވާރިޔާ ވެސް ފެނިގެން ދާނެ އެވެ.
މި ފިލްމަކީ އިންޑިއާގެ ފިލްމަކުން މިހާތަނަށް ފެންނާނެ އެންމެ ފުރިހަމަ އަދި އެންމެ މޮޅު ވީއެފްއެކްސް ފެނިގެން ދާނެ ފިލްމް ކަމަށް ބެލެވެ އެވެ. އަދި މިއީ 500 ކްރޯޑް ރުޕީސްގެ ބަޖެޓަކުން ހަދާފައިވާ ފިލްމެކެވެ.
"ރޮބޮޓް" އަކީ ވެސް ވަރަށް ތަފާތު އިފެކްޓްސްތަކެއް ފެނިގެން ދިޔަ މޮޅު ފިލްމެކެވެ.
އަދި ރަސްމީ ޓްރެއިލާ ވެސް ރިލީޒް ނުކުރާ "2.0" ގެ މިއުޒިކް ތައްޔާރުކޮށްފައި ވަނީ އޭއާރް ރަހްމާނެވެ. މި ފިލްމް ރިލީޒް ނުކުރެވިގެން އުޅެނިކޮށް ރަޖްނީކާންތު، 67، ކުޅުނު "ކާލާ" މިދިޔަ މަހުގެ 7 ގައި ވަނީ ބެލުންތެރިންނަށް ގެނެސް ދީފަ އެވެ.